Tag: hajj 2017

حج اسلام کا پانچواں بنیادی رکن ہے اور ہر صاحبِ استطاعت مسلمان پر زندگی میں ایک بار حج لازمی قرار دیا گیا ہے اور ہر سال لاکھوں کی تعداد میں فرزندان توحید اس فریضے کی ادائیگی کے لیے مسلمانوں کے مقدس ترین شہر مکہ پہنچتے ہیں۔

حج کیا ہے؟ 

---

حج دراصل 8 ذوالحجہ سے 12 ذوالحجہ تک مکہ مکرمہ میں کی جانے والی عبادتوں کے مجموعہ کا نام ہے جس میں احرام باندھنا، طواف کعبہ، سعی کرنا، شیطان کو کنکریاں مارنا ، منٰی میں خطبہ سننا، عرفات کی شب بیداری اور مدینہ میں روضہ رسول صلی اللہ علیہ وسلم میں حاضری شامل ہے۔

حج کی فرضیت 

---

قرآن پاک میں ارشاد باری تعالیٰ ہے ’’  فِيهِ آيَاتٌ بَيِّنَاتٌ مَقَامُ إِبْرَاهِيمَ وَمَنْ دَخَلَهُ كَانَ آمِنًا وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا وَمَنْ كَفَرَ فَإِنَّ اللَّهَ غَنِيٌّ عَنِ الْعَالَمِينَ ﴿۹۷﴾

اس میں کھلی نشانیاں ہیں جن میں سے ایک ابراہیم علیہ السلام کے کھڑے ہونے کی جگہ ہے جو شخص اس (مبارک) گھر میں داخل ہوا اس نے امن پالیا اور لوگوں پر خدا کا حق (یعنی فرض) ہے کہ جو اس گھر تک جانے کی استطاعت رکھتا ہے وہ اس کا حج کرے اور جو اس حکم کی تعمیل نہ کرے گا تو خدا بھی اہلِ عالم سے بے نیاز ہے۔(آل عمران )

مناسک حج سے متعلق حضرت عبد اللہ بن عمرؓ کہتے ہیں رسول اللہﷺ نے فرمایا اسلام کی بنیاد پانچ چیزوں پر رکھی گئی ہے۔ (i) اس بات کی شہادت کہ اللہ کے سوا کوئی معبود نہیں اور محمدﷺ اللہ کے رسول ہیں (ii) نماز قائم کرنا (iii ) زکوٰۃ ادا کرنا (v i) رمضان کے روزے رکھنا اور (v ) حج ادا کرنا۔

مناسک حج

---

حج کے دوران کی جانے والی عبادتوں کو مناسک حج کا کہا جاتا ہے جن کا ادا کرنا ضروری ہوتا ہے اور کسی رکن حج کی عدم ادائیگی پر دم بھی واجب ہوجاتا ہے۔

منی 

---

منیٰ خیموں پر مشتمل شہر کانام ہے جہاں آٹھ ذوالحجہ کو حاجی پہنچتے ہیں اور سنتِ آخری رسول جناب حضرت محمد صلی اللہ علیہ وآلہ وسلم کی سنتوں پر عمل کرتے ہوئے یہاں قیام کریں گے اور عہد نبوی کی یاد تازہ کریں گے۔

عرفات 

---

نو ذوالحجہ کو توحید کے پروانے اللہ کی کبریائی بلند کرتے ہوئے عرفات کے میدان پہنچتے ہیں جہاں مسجد نمرہ میں خطبہ دیا جاتا ہے اور حاجی عرفات کے میدان میں یہ خطبہ سنتے ہیں جس کے بعد حاجی نماز ظہر اور نماز عصر مشترکہ طور پر ادا کی جاتی ہے اور پورا دن اللہ کے ذکر و عبادت میں گزارتے ہیں۔

یہ حج کا لازمی رکن ہے جس کی عدم ادائیگی پر حج مکمل نہیں ہوتا۔

مزدلفہ 

---

مزدلفہ میں حاجی ایک ساتھ نماز مغرب اور نماز عشاء ایک ساتھ ادا کی جاتی ہے اور تمام رات یہی قیام کرتے ہیں عبادت کرتے ہیں اور زمین پر ہی سوجاتے ہیں بعد ازاں دس ذوالحجہ کو سر منڈھوانے کے بعد حاجی قربانی کا جانور ذبح کرتے ہیں۔

جمرات 

---

اس مقام پر تین شیطانوں کو کنکریاں ماری جاتی ہیں یہ بھی حج کا لازمی رکن ہے جس کے بغیر حج ممکن نہیں ہوتا حاجی حضرت ابراہیم علیہ السلام کی سنت کی پیروی کرتے ہوئے شیطانوں کو کنکریاں مارتے ہیں۔

حضرت ابراہیم علیہ السلام جب اللہ کے حکم پر اپنے پیارے صاحبزادے جناب حضرت اسماعیل علیہ السلام کو ذبح کرنے جا رہے تھے تو تین مقامات پر انہیں شیطان نے مختلف بھیس بدلتے ہوئے بہکانے کی کوشش کی تاکہ وہ اپنے بیٹے کی قربانی نہ دیں۔

لیکن ہر بار حضرت ابراہیم علیہ السلام نے شیطان کو کنکری مار کر بھگا دیا تھا بعد ازاں جن مقامات پر شیطان نے جناب ابراہیم کو بہکانے کی کوشش کی تھی وہاں ستون نما چیز بنا دی گئی ہے جسے حاجی کنکریاں مارتے ہیں۔