ریاض: رواں برس حج کے ایام قریب آنے کے بعد سعودی حکام نے اجازت نامے کے بغیر مکہ مکرمہ جانے پر پابندی عائد کردی گئی، عمرہ یا حج پرمٹ رکھنے والے افراد کے علاوہ کسی شخص کو مکہ مکرمہ نہیں جانے دیا جائے گا۔
اردو نیوز کے مطابق سعودی محکمہ امن عامہ نے کہا ہے کہ سوموار 15 مئی 2023 سے مقیم غیر ملکی اجازت نامے کے بغیر مکہ مکرمہ نہیں جا سکتے۔
محکمہ امن عامہ کا کہنا ہے کہ مکہ مکرمہ جانے کے خواہشمند مقیم غیر ملکیوں کے حوالے سے حج سیزن کی ہدایات پر عمل درآمد شروع کیا جارہا ہے۔
حکام کے مطابق 15 مئی سے ایسا کوئی مقیم غیر ملکی جس کے پاس متعلقہ اداروں کے جاری کردہ مکہ جانے کا پرمٹ نہیں ہوگا، اسے مقدس شہر میں داخلے سے روکا جائے گا۔
امن عامہ کا کہنا ہے کہ حج 1444 ہجری کے قواعد و ضوابط پر عمل درآمد کروانے کے لیے مکہ جانے والی چیک پوسٹوں پر پرمٹ چیک کیے جائیں گے۔
حکام کے مطابق ایسے کسی بھی شخص کو جس کے پاس متعلقہ ادارے کی جانب سے حج مقامات پر جانے کا اجازت نامہ نہیں ہوگا، اسے اور بغیر پرمٹ مکہ جانے والی گاڑیوں کو واپس لوٹا دیا جائے گا۔
بیان میں کہا گیا ہے کہ حج سیزن ضابطے کے تحت ایسے افراد جن کے پاس مکہ سے جاری کردہ اقامہ ہوگا، یا عمرہ پرمٹ یا حج پرمٹ ہوگا تو وہ اس سے مستثنیٰ ہوں گے۔