اسلام آباد: ہائی کورٹ نے حج کرپشن کیس کی سماعت کے دوران سابق وفاقی وزیر حامد کاظمی، راؤشکیل اورجوائنٹ سیکریٹری حج کو بری قرار دے دیا.
تفصیلات کے مطابق حج کرپشن کیس کی ہائی کورٹ میں سماعت ہوئی، عدالت نے سابق وفاقی وزیر حامد کاظمی، راؤشکیل اورجوائنٹ سیکریٹری حج کو بری کردیا، ہائی کورٹ کا فیصلہ جسٹس محسن اختر کیانی نے پڑھ کرسنایا.
واضح رہے کہ حامد کاظمی, راؤشکیل، آفتاب اسلام نے سزا کے خلاف ہائی کورٹ سے رجوع کیا تھا.
خیال رہے گذشتہ سال اسلام آباد ہائی کورٹ میں حج کرپشن کیس کی سماعت کے دوران چیف جسٹس محمد انورخان کاسی نے ریمارکس دیتے ہوئے کہا تھا کہ حاجیوں کو دی گئی رہائش نامناسب تھی، نہ تو باتھ روم تھا ، نہ اس کی چھت، اس غیر معیاری حالات کو سعودی حکومت نے بھی محسوس کیا تھا.
خصوصی عدالت کی سزا
خیال رہے کہ اسلام آباد کے اسپیشل جج سینٹرل ملک نذیر احمد نے حج کرپشن کیس کا فیصلہ سنایاتھا، کرپشن کیس میں سابق وفاقی وزیر مذہبی امور حامد سعید کاظمی کو جرم ثابت ہونے پر 16 سال قید کی سزا جبکہ سابق ڈی جی حج راؤ شکیل کو 40 سال قید کی سزا جبکہ سابق ایڈیشنل سیکریٹری وزارت مذہبی امور آفتاب احمد کو 16 سال قید کی سزا سنائی تھی.
یاد رہے کہ حج کرپشن اسکینڈل کے سامنے آنے کے بعد حامد سعید کاظمی کو وزارت مذہبی امور سے ہاتھ دھونا پڑے تھے جبکہ دو ہزار گیا رہ کے اوائل میں انہیں گرفتار کیا گیا اور تقریباً ایک برس جیل میں گذارنے کے بعد انہیں رہا بھی کردیا گیا تھا۔
