Tag: Hajj flight operations

اسلام آباد: ذرائع کا کہنا ہے کہ پی آئی اے سمیت دیگر ایئر لائنز کو حج فلائٹ آپریشن مرتب کرنے میں مشکلات کا سامنا ہے۔

تفصیلات کے مطابق وزارت مذہبی امور کی جانب سے تاخیر کے باعث حاجیوں کا کوٹہ فائنل نہ ہو سکا، ایئرلائنز ذرائع کا کہنا ہے کہ تاحال وزارت مذہبی امور نے حاجیوں کی تعداد فراہم نہیں کی۔

حاجیوں کا کوٹہ فائنل نہ ہونے کی وجہ سے قومی ایئر لائن سمیت دیگر ایئرلائنز کو حج فلائٹ آپریشن مرتب کرنے میں مشکل درپیش ہے، ذرائع کا کہنا ہے کہ وزارت مذہبی امور کی جانب سے ایئر لائنز کو تاحال اس لیے آگاہ نہیں کیا گیا ہے کیوں کہ حاجیوں کی تعداد کوٹے سے کم ہے۔

اس سے قبل ذرائع نے بتایا تھا کہ رواں سال حج کے لیے مختص پاکستان کا کوٹہ پورا نہیں ہو سکا، کم درخواستیں موصول ہونے کی وجہ سے امکان ہے کہ اسے سعودی عرب کو واپس کر دیا جائے گا۔ ذرائع کا کہنا تھا کہ یہ کوٹہ پرائیویٹ ٹورز آپریٹرز کو دینے پر بھی غور کیا جا رہا ہے۔

حج کوٹہ

رواں سال حج کے لیے پاکستان کا کوٹہ ایک لاکھ 79 ہزار افراد کا ہے، پاکستان کا رواں سال سرکاری حج اسکیم کا مجموعی کوٹہ 79 ہزار 600 ہے، جب کہ اسپانسر شپ کے تحت کوٹہ 43 ہزار تھا۔

حکومت کی جانب سے غیر استعمال شدہ حج کوٹہ سعودی عرب کو واپس کیے جانے کا امکان

اسپانسر شپ کے تحت صرف 6 ہزار درخواستیں موصول ہوئی ہیں، جب کہ ریگولر اسکیم میں 43 ہزار کے کوٹے میں 30 ہزار سے زائد درخواستیں موصول ہوئیں، مجموعی طور پر 86 ہزار کے کوٹے میں صرف 36 ہزار تک درخواستیں موصول ہوئیں۔ کم درخوستوں کی وصولی کی وجہ حج اخراجات میں 200 فی صد اضافہ ہے۔

رواں سال سرکاری حج اسکیم 11 لاکھ 75 ہزار روپے مقرر ہے، جب کہ جنوبی علاقوں کے عازمین کے لیے ساڑھے 12 لاکھ تک کے اخراجات ہیں، اور پرائیویٹ حج آپریٹرز کے لیے کم از کم 13 لاکھ اور زیادہ سے زیادہ 20 لاکھ کے اخراجات ہیں۔