اسلام آباد : وزیرمذہبی امور سینیٹر طلحہٰ محمود کا کہنا ہے کہ جدہ و مدینہ ایئرپورٹس پر پاکستانی عازمین کیلئے استقبالیہ ڈیسک قائم ہوں گے اور شعبہ گمشدگی و بازیابی، رہنمائی، شکایات کا سیل بھی قائم کیا جائے گا۔
تفصیلات کے مطابق وزیرمذہبی امورسینیٹرطلحہٰ محمود کی زیرصدارت حج انتظامات اور معاونین کی تربیت پر اجلاس ہوا۔
اجلاس میں وزیر مذہبی امور نے بتایا کہ جدہ و مدینہ ایئرپورٹس پر پاکستانی عازمین کیلئے استقبالیہ ڈیسک قائم ہوں گی جبکہ شعبہ گمشدگی و بازیابی، رہنمائی، شکایات کا سیل قائم کیا جائے گا۔
سینیٹرطلحہٰ محمود نے کہا کہ رہائش ،خوراک ، سفری سہولیات، نجی حج اسکیم کی مانیٹرنگ کے شعبے قائم کیے جائیں گے جبکہ مکہ ،مدینہ میں مرکزی اسپتال سمیت 14 ڈسپنسریاں قائم کی جائیں گی۔
ان کا کہنا تھا کہ حج میڈیکل مشن 500 تجربہ کار افراد پر مشتمل ہے،حج میڈیکل مشن میں آرمی و سول ڈاکٹرز اور پیرامیڈیکل اسٹاف شامل ہے، میڈیکل مشن میں 180ڈاکٹرزاور 320پیرا میڈیکل اسٹاف شامل ہے، جہاں مفت ادویات، ایکسرے، لیبارٹری، پاکستانی طبی عملہ 24 گھنٹے دستیاب ہو گا۔
وزیر مذہبی امورنے کہا کہ حج2023 کیلئے معاونین کی تربیت کا آّغاز کردیا گیا ہے، معاونین کی تربیت اور مشقوں کا اہتمام حاجی کیمپ اسلام آباد میں کیا گیا ہے۔
انھوں نے مزید بتایا کہ ملک بھر سے 550 بہترین معاونین حج کا انتخاب کیا گیاہے، وزارت کا 220افراد پر مشتمل عملہ و افسران بھی عازمین کی معاونت کریں گے۔
