Tag: hajj-sermon

  • خطبہ حج آج ہوگا

    خطبہ حج آج ہوگا

    خطبہ حج آج پاکستانی وقت کے مطابق ایک بج کر 40 منٹ پر دیا جائے گا۔

    سعودی عرب میں حج کے لیے موجود 10 لاکھ عازمین نماز فجر ادا کر کے آج حج کا رکن اعظم وقوف عرفہ ادا کرنے میدان عرفات روانہ ہو گئے ہیں، عازمین نے رات منیٰ میں قیام کیا اور عبادت میں مصروف رہے۔

    میدان عرفات میں 14 سو سال قبل پیغمبر اسلام ﷺ نے اپنا آخری خطبہ دیا تھا، ڈاکٹر محمد بن عبدالکریم العیسیٰ آج 9 ذوالحجہ کو عرفات کی مسجد النمرۃ میں حج کا خطبہ دیں گے۔

    عرب نیوز کے مطابق جمعرات کو عازمین مسجد الحرام سے منٰی کی وادی میں پہنچے تھے، وہاں تک جانے کے لیے 7 کلو میٹر کا سفر کچھ عازمین نے پیدل طے کیا جب کہ بعض بسوں کے ذریعے پہنچے۔

    عازمین اذان مغرب سے قبل میدان عرفات سے مزدلفہ روانہ ہو جائیں گے، مزدلفہ میں عازمین حج مغرب اور عشا کی نمازیں ایک ساتھ ادا کریں گے، مزدلفہ میں رات قیام اور رمی کے لیے عازمین کنکریاں جمع کریں گے، اور نماز فجر کے بعد رمی بڑے شیطان کو کنکریاں مارنے جمرات جائیں گے، رمی کے بعد عازمین قربانی کریں گے اور پھر حلق کروا کے احرام اتاریں گے۔

    مناسک حج کا آغاز جمعرات کو ہوا تھا، اس برس سعودی عرب نے 10 لاکھ مقامی اورغیر ملکی عازمین کو حج کی اجازت دی تھی، جمعرات کو لاکھوں زائرین نے مسجد الحرام میں خانہ کعبہ کا طواف کیا۔

  • رواں سال خطبہ حج کا ترجمہ اردو سمیت 10 زبانوں میں نشر کیا جائے گا

    رواں سال خطبہ حج کا ترجمہ اردو سمیت 10 زبانوں میں نشر کیا جائے گا

    مکہ مکرمہ : رواں سال خطبہ حج کا ترجمہ اردو سمیت دس زبانوں میں نشر کیا جائے گا جبکہ کورونا کے باعث مطاف میں پچیس ٹریک تیار کئے گئے ہیں۔

    تفصیلات کے مطابق حرمین انتظامیہ کی جانب سے حج انتظامات کے حوالے سے بیان میں کہا گیا ہے کہ اس سال خطبہ حج اردو سمیت 10 زبانوں میں نشر ہوگا اور عازمینِ حج کو سہولیات فراہم کرنے کے لیے جدید ٹیکنالوجی سے استفادہ کیا جائے گا۔

    حرمین انتظامیہ کا کہنا تھا کہ طوافِ کعبہ کے لیے پچیس ٹریک تیار کیے گئے ہیں، عازمین حج کی خدمت کے لیے دس ہزار افراد مامور ہوں گے، کسی بھی ہنگامی حالات سے نمٹنے کے لیے خصوصی انتظامات کیے گئے ہیں۔

    انتظامیہ کےمطابق مسجد الحرام کی سینیٹائزنگ کے لیے پانچ ہزار کارکنان کی خدمات بھی حاصل کر لی گئی ہیں، کورونا ایس او پیز پر مکمل عمل درآمد کیا جائے گا۔

    یاد رہے سعودی عرب میں عازمین حج کے خیر مقدم کی تیاریاں مکمل کر لی گئیں ہیں ، سعودی وزارت حج و عمرہ کا کہنا تھا کہ حج سے متعلق 30 سے زائد اداروں کے تعاون سے اسٹریٹیجک اور آپریشنل منصوبے تیار کیے گئے ہیں، حجاج کرام کے لیے کرونا وائرس سے محفوظ رہائش گاہیں تیار کی گئی ہیں۔

    خیال رہے سعودی عرب کی وزارت حج و عمرہ کو 5 لاکھ سے زائد ‏درخواستیں موصول ہوئی تھیں، جن میں سے 60 ہزار کا انتخاب کیا گیا ہے۔

  • ممتاز عالم دین شیخ محمد بن حسن آل الشیخ  خطبہ حج دیں گے

    ممتاز عالم دین شیخ محمد بن حسن آل الشیخ خطبہ حج دیں گے

    ریاض : ممتاز عالم دین، علماء کونسل کے رکن اور خادم الحرمین الشریفین آڈیٹوریم برائے حدیث کے چیئرمین شیخ محمد بن حسن آل الشیخ خطبہ حج دیں گے، خطبۂ حج کی ذمہ داری سعودی فرماں رواں شاہ سلمان بن عبدالعزیز کی ہدایت پر دی گئی۔

    تفصیلات کے مطابق الحرمین الشریفین کے انتظامی امور کی ذمہ دار کمیٹی کی جانب سے رواں سال یوم عرفہ کو خطبہ حج کی ذمہ داری ممتاز عالم دین، علماء کونسل کے رکن اور خادم الحرمین الشریفین آڈیٹوریم برائے حدیث کے چیئرمین الشیخ محمد بن حسن آل الشیخ کو سونپی ہے۔

    الشیخ محمد آل الشیخ کا شمار سعودی عرب کے ممتاز علماء کرام میں ہوتا ہے، الشیخ محمد آل الشیخ 10 سال سے الشریعہ کالج میں لیکچرار کی خدمات انجام دیتے رہےہیں۔

    انہوں نے ابتدائی تعلیم سعودی عرب کے سرکاری اسکولوں سے حاصل کی اور اعلیٰ تعلیم کے لیے جامعہ امام محمد بن سعود کے الشریعہ کالج میں داخلہ لیا اور یم اے کی ڈگری ہائرجوڈیشل انسٹیٹیوٹ سے حاصل کی۔

    الشیخ محمد آل الشیخ 1426ھ سے سعودی عرب کے سپریم علماء بورڈ کے رکن ہیں جبکہ انہیں سائنس وافتاء ریسرچ کمیٹی کارکن مقرر کیا گیا۔

    یاد رہے گذشتہ سال مسجدنبوی ﷺ کےخطیب ڈاکٹرحسین بن عبدالعزیزآل الشیخ نے خطبہ حج دیاتھا۔

    عرب میڈیا کے مطابق حرمین شریفین کی انتظامیہ نے ہرسال کی طرح امسال بھی خانہ کعبہ کے لیے نیا غلاف تیار کرلیا جو 9 ذی الحج بروز پیر کو اسے تبدیل کیا جائے گا۔

    خیال رہے کہ دنیا بھر سے لاکھوں عازمین حج سعودی عرب کے شہروں خصوصاً مکہ اور مدینہ میں موجود ہے ، جہاں عازمین حج کا رکن اعظم و قوف عرفہ 10 اگست کو ادا کریں گے۔