دبئی : متحدہ عرب امارات نے ایم کیوایم کے رکن حماد صدیقی کو پاکستان کے حوالے کردیا،حماد صدیقی سانحہ بلدیہ فیکٹری کیس میں پاکستان کو مطلوب ہے۔
تفصیلات کے مطابق ایم کیوایم کے رکن حماد صدیقی کی گرفتاری سے متعلق اہم پیشرفت سامنے آئی ، متحدہ عرب امارات نے حماد صدیقی کو پاکستان کے حوالے کردیا، حمادصدیقی کیخلاف مقدمے کی تفصیلات حاصل کرنے بعد حوالے کیا گیا۔
ذرائع کا کہنا ہے کہ حماد صدیقی سانحہ بلدیہ فیکٹری کیس میں پاکستان کو مطلوب ہے ، انٹرپول کی جانب سے حماد صدیقی کو پاکستانی حکام کےحوالے کیا گیا۔
یاد رہے کہ اکتوبر کے آخر میں دبئی انٹرپول نے ریڈوارنٹ جاری ہونے پر متحدہ قومی موومنٹ تنظیمی کمیٹی کے سربراہ حماد صدیقی کو گرفتار کرلیا گیا تھا۔
مزید پڑھیں : سانحہ بلدیہ کیس : متحدہ رہنما حماد صدیقی دبئی میں گرفتار
جس کے بعد حماد صدیقی نے سانحہ بلدیہ فیکٹری اور سانحہ 12 مئی کے حوالے سے پی ایس پی کے کچھ لوگوں کے ملوث ہونے کا انکشاف کرتے ہوئے قانون نافذ کرنے والے اداروں کو دونوں واقعات سے متعلق اہم ثبوت فراہم کردیئے تھے۔
واضح رہے کہ بلدیہ کے علاقے میں واقع فیکٹری میں آتشزدگی کی وجہ سے 250 سے زائد افراد جل کر بھسم ہوگئے تھے جب کہ سانحہ 12 مئی میں 30 سے زائد افراد لقمہ اجل بن گئے تھے جس کا ذمہ دار حماد صدیقی کو قرار دیا گیا تھا۔
خیال رہے کہ حماد صدیقی کو کراچی تنظیمی کمیٹی سے 2013 کو سبکدوش کردیا گیا تھا جس کے بعد وہ دبئی منتقل ہوگئے تھے اور مصطفیٰ کمال و انیس قائم خانی کی پاکستان واپسی کے بعد خیال کیا جا رہا تھا کہ وہ پی ایس پی جوائن کرلیں گے۔
