اسلام آباد: صوبہ بلوچستان کا ضلع ہرنائی ملک بھر سے کٹ چکا ہے، اطراف کی تمام سڑکیں تباہ ہونے کے باعث گزشتہ 10 دن سے ضلعے کا رابطہ پورے ملک سے منقطع ہے۔
تفصیلات کے مطابق صوبہ بلوچستان کے ضلع ہرنائی کا ملک بھر سے زمینی رابطہ گزشتہ 10 دنوں سے منقطع ہے، ہرنائی کوئٹہ روڈ پر 2 بڑے پل سیلاب میں بہہ گئے۔
ہرنائی کوئٹہ روڈ چھپر ریفٹ کے مقام پر لینڈ سلائیڈنگ کے باعث جگہ جگہ سے بیٹھ چکی ہے، جبکہ کئی مقامات پر سیلاب میں بہہ چکی ہے۔
ہرنائی تا بائیس میل شاہرہ پر پہاڑوں سے لینڈ سلائیڈنگ کے باعث بڑے پتھر بھی گرے، محکمہ سی اینڈ ڈبلیو کے پاس مشینری نہ ہونے کی وجہ سے ٹریفک کی بحالی میں مشکلات کا سامنا ہے۔
زمینی رابطہ منقطع ہونے کی وجہ سے ضلع میں خوردنی اشیا کی بھی قلت پیدا ہوچکی ہے، لوگوں نے حکومت سے شاہراہوں کی بحالی کا مطالبہ کیا ہے۔
