Tag: hasan askari

لاہور : نگراں وزیراعلیٰ پنجاب حسن عسکری کا کہنا ہے کہ مقررکردہ وقت میں عوام کی خدمت کرنی ہے، کارکردگی دکھائیں گے تو لوگوں کے تحفظات دور ہوں گے۔

تفصیلات کے مطابق لاہور میں نگراں وزیراعلیٰ پنجاب حسن عسکری نے مزاراقبال پر حاضری دی، مزار پر پھول چڑھائے اور فاتحہ خوانی کی جبکہ مہمانوں کی کتاب میں تاثرات قلمبند بھی کیے۔

نگراں وزیراعلیٰ پنجاب ڈاکٹر حسن عسکری کی مزاراقبال پرحاضری کے بعد میڈیا سے گفتگو کرتے ہوئے کہا کہ میڈیا سے تعلق تھا اور رہے گا، مقرر کردہ وقت کیلئے آیا ہوں، ہمارے آنے کا مقصد شفاف انتخابات کرانا ہے۔

ڈاکٹر حسن عسکری کا کہنا تھا کہ ہم نے تمام جماعتوں کو یکساں مواقع دینے کی ذمہ داری نبھانی ہے، قیام امن بھی نگراں حکومت کی ذمہ داری ہے، مقرر کردہ وقت میں عوام کی خدمت کرنی ہے، ہماری بنیادی ترجیح شفاف انتخابات کیلئے ماحول دینا ہے۔

نگراں وزیراعلیٰ پنجاب نے کہا کہ علامہ اقبال ایک عالمی حیثیت رکھتے ہیں، نگراں حکومت پر لوگوں کا اعتماد کارکردگی سے پیداہوگا، کارکردگی دکھائیں گے تو لوگوں کے تحفظات دور ہوں گے۔

ان کا مزید کہنا تھا کہ ہم نے آئین میں رہتے ہوئے سب کو یکساں مواقع دینے ہیں، نگراں کابینہ محدود ہوگی، کسی جماعت سے تعلق نہیں ہوگا، اکھاڑ پچھاڑ بڑا لفظ ہے، شفافیت کیلئے معمولی تبدیلیاں کرسکتے ہیں۔

ڈاکٹر حسن عسکری نے کہا کہ میڈیا میں جو کردار ہے، وہ جاری رہے گا، میں پہلے کوئی سیاسی ایجنڈا رکھتا تھا نہ اب رکھتا ہوں، انتخابات میں ڈسٹرکٹ ایڈمنسٹریشن کا اہم کردار ہوتا ہے، ہمارا مقصد ڈسٹرکٹ ایڈمنسٹریشن کو شفافیت فراہم کرنا ہے۔

نگراں وزیراعلیٰ پنجاب کا کہنا تھا کہ خلائی مخلوق والابیان سیاسی ہے، لوگ مفاد کیلئے استعمال کرتےہیں، مختلف سیاسی جماعتیں ووٹوں کیلئے ایسے بیانات استعمال کرتی ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں