کراچی: ہزارہ ایکسپریس حادثے کے باعث ملک میں ریلوے شیڈول بری طرح متاثر ہو گیا ہے، مختلف ٹرینوں کی روانگی اور آمد میں 20 گھنٹوں تک تاخیر ہوگی۔
تفصیلات کے مطابق کراچی سے اندرون ملک ٹرینوں کی روانگی میں 12 گھنٹے تک تاخیر ہوگی، ریلوے حکام کا کہنا ہے کہ ملتان جانے والی بہاالدین زکریا ایکسپریس کو منسوخ کر دیا گیا ہے، اس لیے جو مسافر سفر نہیں کرنا چاہتے وہ ٹکٹ کا فل ریفنڈ لے سکتے ہیں۔
ریلوے حکام کے مطابق فرید ایکسپریس 1 بجکر 30 منٹ پر روانہ ہوگی، قراقرم ایکسپریس 11 گھنٹے تاخیر سے رات 2 بجے روانہ ہوگی، تیز گام 12 گھنٹے تاخیر سے منگل کی صبح 5 بجکر 30 منٹ پر روانہ ہوگی۔
راولپنڈی سے آنے والی گرین لائن ایکسپریس 17 گھنٹے تاخیر سے 6 بجے کراچی پہنچے گی، پشاور سے آنے والی خیبر میل 4 گھنٹے تاخیر سے 8 بجے کراچی پہنچے گی، تیز گام 19 گھنٹے اور علامہ اقبال 20 گھنٹے تاخیر سے کراچی پہنچے گی۔
حویلیاں سے آنے والی ہزارہ ایکسپریس 8 گھنٹے تاخیر سے 8 بجے صبح کراچی پہنچے گی، لاہور سے آنے والی کراچی ایکسپریس 20 گھنٹے تاخیر سے ساڑھے 6 بجے کراچی پہنچے گی، لاہور سے آنے والی شالیمار ایکسپریس 8 گھنٹے تاخیر سے صبح 8 بجے کراچی پہنچے گی۔
لاہور سے آنے والی پاک بزنس ایکسپریس 20 گھنٹے تاخیر سے ساڑھے 5 بجے صبح کراچی پہنچے گی، لاہور سے آنے والی فرید ایکسپریس 4 گھنٹے تاخیر سے 11 بجے صبح کراچی سٹی پہنچے گی۔
واضح رہے کہ گزشتہ رات 11 بجے سرہاری کے مقام پر اپ ٹریک بحال کر دیا گیا تھا، جب کہ ٹرین آپریشن اپ اور ڈاؤن ٹریک پر جاری ہے۔
