کراچی : قومی ویمن کرکٹ ٹیم کے ہیڈ کوچ باسط علی نے گزشتہ روز ہونے والے معاملے کے بعد اہم قدم اٹھالیا، انہوں نے پی سی بی کی جانب سے ملنے والے دونوں عہدے چھوڑنے کا اعلان کردیا ہے۔
تفصیلات کے مطابق سابق کرکٹر باسط علی نے گزشتہ روز ہونے والے واقعے کے بعد پی سی بی کے عہدوں سے مستعفی ہونے کا فیصلہ کرلیا، باسط علی جونیئر سیلکشن کمیٹی کے سربراہ اور ویمنز کرکٹ ٹیم کے ہیڈکوچ کے طورپر خدمات انجام دے رہے تھے۔
جمعرات کو سابق کرکٹر محمود حامد سے ہونے والی جھڑپ کے بعد اب انہوں نے پی سی بی سے الگ ہونے کا فیصلہ کرلیا ہے۔ انہوں نے اپنے اعلان میں کہا ہے کہ قومی ویمن کرکٹ ٹیم کے ہیڈ کوچ کے عہدے سے استعفیٰ دے رہا ہوں جبکہ جونیئر سلیکشن کمیٹی کی چیئرمین شپ سے بھی مستعفی ہو رہا ہوں۔
مزید پڑھیں: باسط علی اور محمود حامد تنازعہ، پی سی بی کا نوٹس
ان کا کہنا ہے کہ وہ قومی ٹیم کیخلاف بے جا تنقید برداشت نہیں کرسکتے، عہدہ چھوڑنے کا فیصلہ سوچ سمجھ کر کیا ہے۔ پی سی بی کے سربراہ سے ملاقات کرتے ہوئے استعفی پیش کروں گا۔
یاد رہے کہ باسط علی نے گزشتہ روز کسی بات پرسابق کرکٹر محمود حامد کو مبینہ طور پر تھپڑ مارا تھا، جس کی باسط علی نے تردید بھی کردی ہے۔۔
