کراچی/ لاہور/ پشاور: ملک کے مختلف شہروں میں آج سورج آگ برساتا رہا، روزہ داروں کو مشکلات کا سامنا رہا۔
تفصیلات کے مطابق آج تربت ملک کا گرم ترین شہر رہا، جس کا درجہ حرارت 53ڈگری سینٹی گریڈریکارڈ کیاگیا، دیگر شہروں کے حوالے سے محکمہ موسمیات کا کہنا ہے کہ سبی کا درجہ حرارت 51ڈگری سینٹی گریڈ ریکارڈ کیا گیا۔
اس کے علاوہ لسبیلہ49، جیکب آباد اور حیدرآباد کادرجہ حرارت46ڈگری سینٹی گریڈ رہا، جبکہ دادو، دالبندین کا درجہ حرارت 46ڈگری سینٹی گریڈ ریکارڈ کیا گیا، محکمہ موسمیات کے مطابق کراچی 38، لاہور39، پشاور41 کوئٹہ کا درجہ حرارت 37ڈگری سینٹی گریڈ ریکارڈ کیا گیا۔
ماہرین کا کہنا ہے کہ شہر کراچی میں گرمی مئی اور جون میں یہ اپنے عروج پر ہوگی، لہٰذا متعلقہ ادارے اور شہری ہیٹ ویوز کے پیش نظر حفاظتی اقدامات کریں۔
سندھ حکومت نے ہیٹ اسٹروک سے بچاؤ کیلئے انتظامات شروع کردیئے ہیں، ہیٹ اسٹرک سے بچاؤ کی مہم شروع کی جارہی ہے، تمام اضلاع میں کیمپ قائم کئے جائیں گے، دھوپ سے بچاؤ کیلئے عوام احتیاطی تدابیر اختیارکریں، گرمی کی شدت بڑھ رہی ہے،ہیٹ اسٹروک سے بچاؤ ضروری ہے۔
ماہرین نے شہریوں کو مشورہ دیا ہے کہ وہ بڑھتی ہوئی گرمی کے پیش نظر کھانے پینے اور گھر سے باہر نکلنے میں احتیاط برتیں۔
واضح رہے گزشتہ دو تین سال میں گرمیاں اپنے عروج پر ہیں اور ہیٹ اسٹروک کے باعث درجنوں لوگ اپنی جانوں سے گئے لیکن رواں سال اپریل کے آغاز سے ہی سورج اپنے جوبن پر ہے جس کے باعث ملک کے مختلف حصوں میں گرمی کے سابقہ ریکارڈ ٹوٹ گئے ہیں۔
