سعودی عرب میں موسمیات کے قومی مرکز کا اپنے بیان میں کہنا ہے کہ مملکت کے بیشتر علاقوں میں بدھ سے اتوار تک درمیانی سے تیز بارش اور گرد آلود ہوائیں چلنے کا امکان ہے۔
سعودی خبر رساں ادارے کی رپورٹ کے مطابق قومی مرکز کا کہنا ہے جمعرات کو 60 کلومیٹر فی گھنٹے یا اس سے زیادہ رفتار سے گرد آلود ہواؤں کے ساتھ مکہ مکرمہ ریجن میں موسلا دھار بارش ہوسکتی ہے۔
رپورٹس کے مطابق اس کے اثرات جدہ، رابغ، اللیث، القنفذہ، طائف، اضم، میسان، العرضیات، المویہ، الخرمہ، الجموم، الکامل، بحرۃ، خلیص، رنیہ اور تربہ تک پڑ سکتے ہیں۔
مدینہ منورہ ریجن کے علاقے خیبر، بدر، المھد، وادی الفرع، الحناکیہ اور مدینہ منورہ شہر تیز ہواؤں سے متاثر ہوں گے۔ یہاں بھی ہوا کی رفتار 60 کلو میٹر فی گھنٹہ تک ہوسکتی ہے جو گردو و غبار کی صورت اختیار کرے گی، جس کے سبب تیز بارش کا امکان موجود ہے۔
موسمیاتی مرکز کا الباحہ کے حوالے سے کہنا ہے درمیانی سے شدید بارش ہوسکتی ہے، جبکہ تیز ہواؤں اور گرد آلود ہواؤں کا سلسلہ یہاں بھی رہے گا۔ اس کے علاوہ سیلابی صورتحال اور برف باری کا امکان موجود ہے۔
سعودی عرب کے دارالحکومت ریاض، القصیم، حائل، مشرقی ریجن، حدود شمالی، الجوف، الباحہ، جازان کے علاقے ہلکی سے درمیانی بارش سے متاثر رہیں گے اس کے علاوہ یہاں بھی تیز اور گرد آلود ہوائیں بدھ سے اتوار تک متوقع ہیں۔
جیزان میں بھی درمیانے سے موسلا دھار بارش کے امکانات ہیں۔ گردوغبار، ژالہ باری ہوسکتی ہے جبکہ نجران کا علاقہ درمیانے درجے کی بارش اور گردآلود ہواؤں سے متاثر رہے گا۔
سعودی عرب میں عید الفطر کی تعطیلات کا اعلان
عسیر ریجن کے زیادہ تر علاقوں میں درمیانی سے تیز بارش کا امکان ہے جو جمعے اور سنیچر کو شدت اختیار کرسکتی ہے اس کے علاوہ گرد آلود تیز ہوائیں چلنے اور سیلابی صورتحال کا بھی خطرہ ہے۔
