اسکردو : برفباری کے باعث اسکردو کی اسلام آباد سے فضائی سروس اور درجنوں بالائی علاقوں سے زمینی رابطہ معطل ہوگیا جبکہ معمولات زندگی متاثر ہے اور لوگ گھروں تک محدود ہوگئے ہیں۔
تفصیلات کے مطابق اسکردو سمیت بلتستان میں برفباری جاری ہے ، محکمہ موسمیات کا کہنا ہے کہ بالائی علاقوں میں 8 انچ برفباری اور میدانی علاقوں میں 4 انچ تک برفباری ریکارڈ کی گئی۔
ذرائع کا کہنا ہے کہ برفباری کے باعث اسکردو کا درجنوں بالائی علاقوں سے زمینی رابطہ معطل جبکہ اسکردو کی اسلام آباد سے فضائی سروس بھی معطل ہوگئی ہے۔
اسکردو میں برفباری کے باعث معمولات زندگی متاثر ہے اور لوگ گھروں تک محدود ہوکر رہ گئے ہیں۔
محکمہ موسمیات کا کہنا ہے کہ اسکردو کا درجہ حرارت منفی 5 ڈگری سینٹی گریڈریکارڈ کیا گیا جبکہ بالائی علاقوں میں درجہ حرارت منفی10 ڈگری سینٹی گریڈتک گرگیا۔
محکمہ موسمیات نے کہا ہے کہ برفباری کا سلسلہ آئندہ چوبیس گھنٹے بھی جاری رہے گا۔
