کراچی: جناح اسپتال کراچی میں ایئر ایمبولینس کے لیے ہیلی پیڈ فعال کر دیا گیا۔
تفصیلات کے مطابق دو دہائیوں کے بعد سندھ حکومت کا ایک ہیلی کاپٹر جناح پوسٹ گریجویٹ میڈیکل سینٹر میں تعمیر شدہ ہیلی پیڈ پر اترا۔
جناح اسپتال میں ہیلی پیڈ فعال ہونے کے بعد ملک کے دور دراز علاقوں سے شدید زخمی اور بیمار مریضوں کی آمد و رفت کی راہ ہموار ہوگئی، سول ایوی ایشن اتھارٹی کی جانب سے لینڈنگ کے لیے جے پی ایم سی کو نان اعتراض سرٹیفکیٹ بھی دیا جا چکا ہے۔
جناح اسپتال کی سربراہ ڈاکٹر سیمی جمالی نے اس موقع پر کہا کہ اب جناح میں سرکاری اور نجی ہوائی ایمبولینس کے ذریعے مریض لائے جا سکتے ہیں۔
انھوں نے کہا ہیلی کاپٹر ایمبولینسیں 1990 کی دہائی میں مریضوں کو جے پی ایم سی میں لاتی تھیں، لیکن ہیلی پیڈ کی حالت خراب ہونے پر طویل عرصے تک ہیلی کاپٹر کی پروازیں بند تھیں، اب ملک کے کسی بھی علاقے سے چند گھنٹوں میں مریض کو جے پی ایم سی لایا جا سکتا ہے۔
ڈاکٹر سیمی جمالی نے کہا ہیلی پیڈ کی بحالی پر سندھ حکومت اور محکمہ صحت کا شکریہ ادا کرتے ہیں۔
