سوات: وزیر اعظم عمران خان نے کہا ہے کہ مسلمان لڑکیوں کو حجاب پہننے سے بھارتی عدالت کا منع کرنا اسلامو فوبیا ہے، آر ایس ایس کی بدولت آج بھارت میں تاثر پرست جماعت کی حکومت ہے۔
خیبر پختون خوا کے شہر سوات میں عوامی جلسے سے خطاب کرتے ہوئے وزیر اعظم نے کہا کہ 3 سال سے ہم کوشش کر رہے تھے کہ اسلاموفوبیا کے خلاف قرارداد منظور ہو، نائن الیون کے بعد مغرب میں ایسا تاثر پھیلایا گیا کہ اسلام کی وجہ سے دہشت گردی ہو رہی ہے، پاکستان کی قرار داد 57 مسلم ممالک نے مل کر پیش کی، گزشتہ روز اس کی منظوری پر تمام مسلم ممالک کی طرف صبح سے مبارک باد کے پیغام آ رہے ہیں۔
انھوں نے کہا یو این میں پہلی بار کسی پاکستان کے سربراہ نے اسلامو فوبیا کے خلاف بات کی، بیرون ملک پاکستانی اور مسلمان آج سب سے زیادہ خوش ہیں، کل ہندوستان میں کرناٹکا کی عدالت نے فیصلہ کیا کہ مسلمان لڑکیاں حجاب نہیں کر سکتیں، مسلمان لڑکیوں کو حجاب پہننے سے بھارتی عدالت کا منع کرنا اسلامو فوبیا ہے۔
انھوں نے کہا مولانا دین کے نام پر سیاست کرتے ہیں اور ہر حکومت میں شامل ہوتے ہیں، کیا مولانا نے اسلامو فوبیا کے خلاف کسی سے بات بھی کی؟ مدرسے کے بچوں کو نکالتے ہیں تو کہتے ہیں کہ یہ یہودی لابی ہے، شرم آنی چاہیے یہودی کہتے تھے اس نے وہ کام کیا جو تم 30 سال میں نہ کر سکے، اقوام متحدہ نے تسلیم کیا کہ اب 15 مارچ کو اسلامو فوبیا کے خلاف دن منایا جائے گا۔
وزیر اعظم نے کہا امریکی صدر ہو یا کوئی بھی عمران خان آنکھوں میں آنکھیں ڈال کر بات کرتا ہے، جو پیسے کی پوجا کرتے ہیں اس کی کانپیں ٹانگتی ہیں، اسلاموفوبیا اور ڈرون حملوں پر کسی حکمران نے آواز تک نہیں اٹھائی، میرے بھی لندن میں محلات، اربوں روپے اور آف شور کمپنیاں ہوتیں تو ان کی طرح پرچی لے کر بیٹھا ہوتا۔
عمران خان نے کہا نواز شریف جب اوباما کے سامنے پرچی پکڑ کر بیٹھتے تھے تو اسلامو فوبیا، کشمیر کی پرچی بھی پکڑ لینی تھی، 100 شیروں کا سردار نواز شریف کی طرح گیدڑ ہو تو قوم ہار جائے گی، لیکن 100 گیدڑوں کا سردار اگر شیر ہو تو وہ قوم جیت جائے گی۔
انھوں نے کہا تین چوہے میرا شکار کرنے نکلے ہیں، آج سوات کے لوگوں کو کہتا ہوں میں ان تینوں کا شکار کروں گا، کچھ لوگ سندھ ہاؤس میں نوٹوں کی بوریاں لے کر بیٹھے ہیں، سندھ کے عوام کا پیسہ لے کر ہمارے ایم این ایز خریدنے آئے ہیں، سیاست دانوں کے ضمیر کی قیمت 20،20 کروڑ لگا دی گئی ہے، ان کو پتا ہے عمران خان تھوڑی دیر اور رہ گیا تو ان سب نے جیلوں میں جانا ہے، الیکشن کمیشن بتائے کیا اس ہارس ٹریڈنگ کی آئین میں اجازت ہے؟
