Tag: Hijab ban

نئی دہلی: بھارت میں تعلیمی اداروں میں حجاب پر پابندی لگائے جانے کے بعد سے طالبات نجی اداروں میں تعلیم حاصل کرنے پر مجبور ہیں، تاہم اس مسئلے سے نجات کے بعد اب وہ ایک اور مسئلے سے دوچار ہو گئی ہیں۔

بھارتی میڈیا رپورٹس کے مطابق سرکاری تعلیمی اداروں میں حجاب پر پابندی کی وجہ سے نجی تعلیمی اداروں میں تعلیم حاصل کرنے والی مسلمان طالبات کو اب امتحانات کا مسئلہ درپیش ہے، جس کے لیے انھیں انھی تعلیمی اداروں کی طرف رخ کرنا پڑے گا۔

ریاست کرناٹک میں طالبات کے ایک گروپ نے ایک بار پھر سپریم کورٹ سے رجوع کر لیا ہے، اور درخواست کی ہے کہ سرکاری تعلیمی اداروں میں انھیں حجاب پہن کر امتحان دینے کی اجازت دی جائے۔

چیف جسٹس آف انڈیا ڈی وائی چندرچوڑ نے درخواست پر سماعت کی، انھوں نے کہا کہ حجاب کے معاملے میں اکتوبر میں دو ججز نے الگ الگ فیصلہ دیا تھا، اس لیے وہ اب اس پر جلد ہی تین ججز پر مشتمل بنچ قائم کریں گے۔

طالبات کے وکیل نے عدالت کو بتایا کہ امتحانات 9 مارچ سے شروع ہو رہے ہیں اور سرکاری اداروں میں حجاب پر پابندی کی وجہ سے طلبہ کو امتحانی مراکز میں جانے کی اجازت نہیں ہوگی۔

وکیل نے بتایا کہ پابندی کی وجہ سے وہ پہلے ہی پرائیویٹ اداروں میں جا چکی ہیں، لیکن امتحانات سرکاری اداروں میں ہونے جا رہے ہیں، اور ان میں سے کچھ طالبات حجاب پر پابندی کی وجہ سے پہلے ہی ایک سال کی تعلیم کا نقصان اٹھا چکی ہیں۔

وکیل نے کہا کہ اس وقت ہم جس چیز کی درخواست کر رہے ہیں وہ یہ ہے کہ طالبات کو حجاب میں امتحانات دینے کی اجازت دی جائے۔

کرناٹک: بھارتی ریاست میں تعلیمی اداروں میں حجاب پر پابندی کے کیس میں سپریم کورٹ آج فیصلہ سنائے گی۔

تفصیلات کے مطابق کرناٹک میں ڈریس کوڈ کی وجہ سے تعلیمی اداروں میں حجاب پر پابندی پر سپریم کورٹ آج اپنا فیصلہ سنائے گی۔

حجاب پر پابندی کے معاملے میں کرناٹک حکومت کے حکم کو چیلنج کرتے ہوئے کئی عرضیاں دائر کی گئی تھیں، حکومت نے ایک حکم کے تحت یونیورسٹیوں، کالجز اور اسکولز کے کلاس رومز کے اندر حجاب پہننے پر پابندی لگا دی تھی۔

22 ستمبر کو جسٹس ہیمنت گپُتا اور سدھانشو دھولیا نے ریاستی حکومت، اساتذہ اور درخواست گزاروں کی نمائندگی کرنے والے وکیل کے دلائل سننے کے بعد اپنا فیصلہ محفوظ کر لیا تھا۔

واضح رہے کرناٹک میں حجاب تنازعہ اس سال جنوری میں تب شدت اختیار کر گیا تھا جب سرکاری پی یو کالج نے مبینہ طور پر حجاب پہن کر آنے والی 6 طالبات کو کلاس روم میں بیٹھنے سے روک دیا تھا۔