Tag: Hira Soomro

معروف اداکارہ حرا سومرو کا کہنا ہے کہ ان کے مداحوں کو علم نہیں کہ ان کی شادی ہوچکی ہے، جب انہیں علم ہوتا ہے تو وہ بہت مایوسی کا اظہار کرتے ہیں۔

ایک انٹرویو میں حرا نے بتایا کہ اداکاری سے قبل ہی وہ ایک بچی کی ماں بن چکی تھیں اور حال ہی میں ان کے ہاں دوسرے بچے کی پیدائش بھی ہوئی ہے، ان کی بیٹی کی عمر 4 سال ہے جبکہ ان کا ایک بیٹا بھی ہے۔

اداکارہ کے مطابق کیریئر کے آغاز میں جہاں مداح ان کی شادی سے بے خبر تھے، وہیں انڈسٹری کے بہت سارے افراد کو بھی ان کی شادی اور بچوں سے متعلق کوئی معلومات نہیں تھی اور زیادہ تر لوگ انہیں غیرشادی شدہ سمجھتے تھے۔

اداکارہ نے بتایا کہ اب جب لوگوں کو معلوم ہو چکا ہے کہ وہ شادی شدہ ہیں، تب سے ان کے مرد مداح مایوسی کا اظہار کرتے دکھائی دیتے ہیں اور ان کی سوشل میڈیا پوسٹس میں بھی کمنٹس کر کے ان سے پوچھتے ہیں کہ انہوں نے جلدی شادی کیوں کی۔

حرا سومرو کا کہنا تھا کہ وہ اپنی سوشل میڈیا پوسٹس پر مرد مداحوں کے اپنی شادی سے متعلق کمنٹس پڑھ کر، جس میں ان سے محبت یا شادی کی خواہش کا اظہار کیا جائے، ہنس پڑتی ہیں جبکہ ان سے پہلے ان کے شوہر ہنس پڑتے ہیں۔

اداکارہ کا کہنا تھا کہ مرد مداحوں کی جانب سے محبت کا اظہار کرنے یا شادی کی خواہش پر ان کے شوہر ہلکی آواز میں ایسے لوگوں کو کہتے ہیں کہ وہ پاگل ہیں اور انہیں حرا کا کچھ پتہ ہی نہیں۔

شادی سے متعلق پوچھے گئے سوال کے جواب میں اداکارہ نے بتایا کہ ان کی شادی کزن سے ہوئی ہے، تاہم شادی سے قبل ان کے درمیان محبت ہوگئی تھی، لیکن ایک ہی خاندان سے ہونے کی وجہ سے رشتہ طے ہوا تو زیادہ تر لوگوں کو لگتا ہے کہ ہم نے خاندان کی مرضی سے شادی کی۔

انہوں نے شوہر اور سسرالیوں کی تعریف کرتے ہوئے کہا کہ وہ اپنے اہلخانہ کی مدد کے بغیر اداکاری میں نہیں آسکتی تھیں اور ان کے شوہر ان کی ہمت افزائی کرتے ہیں۔

خیال رہے کہ حرا سومرو نے چند سال قبل ڈرامہ ماں صدقے سے اداکاری کا آغاز کیا تھا مگر انہیں مقبولیت چپکے چپکے اور خدا اور محبت 3 سے ملی۔ اب وہ تیرے بن میں مریم کا کردار ادا کررہی ہیں۔

حرا سومرو نے اداکاری سے قبل دوران تعلیم ہی ماڈلنگ شروع کردی تھی اور اداکاری سے قبل ہی وہ شادی کرچکی تھیں اور وہ ایک بچی کی ماں بھی بن چکی تھیں۔