لاڑکانہ : رتو ڈیرو میں ایچ آئی وی ایڈز کے مزید11کیسز سامنے آگئے، مجموعی طور پر کیسز کی تعداد764ہوگئی، متاثرین میں615 بچے بھی شامل ہیں۔
تفصیلات کے مطابق سندھ کے دوسرے شہروں کی طرح لاڑکانہ میں بھی ایچ آئی وی ایڈز کے شکار لوگوں کی تعداد میں اضافہ ہوتا جا رہا ہے، لاڑکانہ کے تحصیل اسپتال رتو ڈیرو میں مزید11کیسز سامنے آگئے۔
اس حوالے سے متعلقہ حکام کا کہنا ہے کہ ایڈز کے سلسلے میں 104افراد کی اسکریننگ کی گئی، 11بچوں میں وائرس کی تصدیق ہوئی، سندھ میں ایڈز کے متاثرین کی تعداد مجموعی طور پر764 ہو گئی ہے جس میں615بچے بھی شامل ہیں۔
علاوہ ازیں عالمی ادارہ صحت ڈبلیو ایچ او کے ماہرین نے تحصیل اسپتال رتوڈیرو کا دورہ کیا، عالمی ماہرین نے بلڈ اسکریننگ کے عمل پر تشویش کا اظہار کرتے ہوئے گرمی میں اسکریننگ کٹس کو فرج یا آئس باکس میں رکھنے کی ہدایات دیں۔
مزید پڑھیں: رتوڈیرو، 700 افراد میں ایچ آئی وی کی تشخیص ہوئی: ڈاکٹر سکندر میمن
اس کے علاوہ عالمی ماہرین نے بلڈ اسکریننگ کٹس کا بھی جائزہ لیا، کٹس کی کوالٹی چیک کرنے کے بعد کٹس باکس اپنے ساتھ لے گئے، طبی ماہرین نے حکام سے26ہزار افراد کی بلڈاسکریننگ کاریکارڈ بھی طلب کرلیا ہے۔
