Tag: Hockey

انچون: پاکستان نے ایشین گیمز کے ہاکی ایونٹ میں ملائیشیا کو سنسنی خیز مقابلے کے بعد پنالٹی شوٹ آؤٹ پر شکست دیکر فائنل میں جگہ بنالی، گولڈ میڈل کے حصول کےلئے پاکستان اور روایتی حریف بھارت میں جنگ ہوگی۔

ایشین گیمز ہاکی کے سیمی فائنل میں دفاعی چیمپیئن پاکستان اور ملائیشیا کے درمیان دلچسپ مقابلہ دیکھنے کو ملا ہے،میچ کے آغاز سے ہی دونوں ٹیموں نے ایک دوسرے کے گول پوسٹ پر تابڑ توڑ حملے شروع کردئیے، پہلے کوارٹرمیں دونوں ٹیمیں گول کرنے میں ناکام رہیں، دوسرے کوارٹر میں کوئی گول نہ ہووکا، تیسرے اور چوتھے کوارٹر میں پاکستان نے بہتر کھیل کا مظاہرہ کیا۔

جارحانہ کھیل کے باوجود پاکستانی شاہین گول نہ کرسکے، مقررہ وقت تک ایک بھی ٹیم گول کرنے میں کامیاب نہ ہوئی، جس کے بعد میچ کافیصلہ پنالٹی شوٹ آؤٹ پر ہوا۔

پنالٹی شوٹ آؤٹ میں پاکستانی گول کپیر عمران بٹ نے شاندار کارکردگی دکھاتے ہوئے حریف ٹیم کے چار گولز روک کر پاکستان کو مسلسل دوسری مرتبہ فائنل میں پہنچانے میں اہم کردار ادا کیا۔ راشد محمود نے سڈن ڈیتھ پر آخری گول داغ کر ایشین گیمز میں پاکستان کا ایک اور میڈل یقینی بنایا۔

ایشین گیمز کی تریسٹھ سالہ تاریخ میں پاکستان سولہویں مرتبہ شرکت کررہا ہے۔ ایشین گیمزمیں پاکستان کا دوسوتہتررکنی دستہ شریک ہے۔ قومی ہاکی ٹیم اپنےاعزازکا دفاع کرے گی۔

پاکستان نے اب تک پندرہ گیمز میں مجموعی طورپرایک سو چورانوے میڈلز حاصل کررکھے ہیں۔ جس میں تینتالیس گولڈ، تریسٹھ سلوراوراٹھاسی برونز شامل ہیں۔

انیس سوباسٹھ کے جکارتہ ایشین گیمزمیں پاکستانی ایتھلیٹس نے سب سے زیادہ اٹھائیس تمغے سینوں پرسجائے جن میں آٹھ گولڈ، گیارہ سلوراورنوبرونزمیڈل شامل تھے۔

پاکستان نے ایشین گیمز کی تاریخ میں سب سے زیادہ گولڈ میڈلز ایتھلیٹکس مقابلوں میں اپنے نام کیے،جن کی تعداد چودہ ہے۔ ہاکی میں آٹھ گولڈ جبکہ باکسنگ اورریسلنگ میں چھ، چھ سونے کے تمغے جیتے ہیں۔