سعودی عرب میں حج سیکیورٹی فورسز کا کہنا ہے کہ حج سیزن کے اختتام تک مشاعر مقدسہ میں غیر مجاز گاڑیوں اور موٹرسائیکلوں کا داخلہ ممنوع ہوگا۔
سعودی خبر رساں ادارے کی رپورٹ کے مطابق مکہ مکرمہ گورنریٹ اعلان کیا ہے کہ غیر اجازت یافتہ گاڑیوں اور موٹرسائیکلوں کے مشاعر مقدسہ میں داخلے پر پابندی کے فیصلے پر عملدرآمد شروع کر دیا گیا ہے۔
گورنریٹ کے مطابق غیر مجاز گاڑیوں کے داخلے پر پابندی ٹریفک کی روانی کو یقینی بنانے کے لیے ہے۔
گورنریٹ نے کہا ہے کہ گاڑیوں اور موٹر سائیکلوں کو مکہ مکرمہ اور مشاعر مقدسہ میں چلانے کے لیے خصوصی اجازت نامہ جاری کرنا ضروری ہے۔
دوسری جانب سعودی عرب میں وزارت اسلامی امور نے جامع مساجد اورعید گاہوں میں عیدالاضحی کی نماز کے انعقاد کے ایک جامع منصوبے کی منظوری دی ہے۔
وزارت کی جانب سے نمازعید ام القری کیلنڈر کے مطابق سورج طلوع ہونے کے 15 منٹ بعد ادا کرنے کی ہدایت جاری کی گئی ہے۔
رپورٹس کے مطابق تمام جامع مساجد اور عید گاہوں میں نماز کا اہتمام کرنے کے لیے کہا گیا ہے ماسوائے ان مساجد کے جو عید گاہ کے قریب واقع ہیں اور جہاں لوگ عید کی نماز کے لیے نہیں جاتے۔
وزارت کی جانب سے میٹنٹینس کمپنیوں کو عید کی نماز کے لیے تمام انتظامات اورضروری خدمات مکمل کرنے کی بھی ہدایت کی گئی ہے۔
سعودی عرب: 13 لاکھ سے زائد عازمین حج مقدس سرزمین پہنچ گئے
رپورٹس کے مطابق مملکت میں بدھ 28 مئی کو یکم ذوالحجہ تھی۔ حج کا رکن اعظم وقوف عرفہ جمعرات 5 جون 2025 کو ہوگا۔ عیدالاضحی جمعہ 6 جون کو منائی جائے گی۔
