کراچی : ریلوے پولیس کینٹ اسٹیشن کراچی ڈویژن نے ایمانداری اور فرض شناسی کی مثال قائم کرتے ہوئے لاوارث بیگ اس کے مالک کے حوالے کردیا۔
اے آر وائی نیوز کی رپورٹ کے مطابق ریلوے پولیس اہلکار کو کراچی کینٹ اسٹیشن پر کھڑی رحمان بابا ایکسپریس کی بوگی میں لاوارث بیگ برتھ پر رکھا ملا تھا۔
مذکورہ لاوارث بیگ میں لاکھوں روپے مالیت کی گھڑی، زیورات، قیمتی سامان اور ہزاروں روپے کی نقدی موجود تھی۔
ریلوے پولیس حکام نے بتایا ہے کہ قیمتی سامان سے بھرا یہ بیگ اس کے حقیقی مالک کے حوالے کردیا گیا ہے، جسے وہ ٹرین کے اندر بھول گیا تھا۔
پولیس ہیلپ سینٹر کینٹ اسٹیشن سے رابطہ کرنے پر لاوارث بیگ اور اس میں رکھا قیمتی سامان مالک کے حوالے کردیا گیا ہے۔
مسافر نے اپنا بیگ اور قیمتی سامان بحفاظت ملنے پر ریلوے پولیس کا خصوصی طور پر شکریہ ادا کیا اور اپنی نیک تمناؤں کا اظہار کیا۔
یاد رہے کہ اس سے قبل گزشتہ سال ریلوے پولیس نے ایمانداری کی مثال قائم کرتے ہوئے زیورات سے بھرا بیگ مالک کے حوالے کردیا تھا۔
مسافر اپنا بیگ کراچی کینٹ اسٹیشن پر بھول گیا تھا، بیگ میں سونے کے زیورات، کپڑوں کے جوڑے اور لیڈیز پرس موجود تھا۔
