کراچی : شہر قائد میں آج بھی شدید گرمی پڑنے کا امکان ہے ،درجہ حرارت40ڈگری سے تجاوز کرے گا جبکہ گرمی کے مارے کراچی والوں کیلئے خوشخبری ہے کہ سات روز سے بند سمندری ہوائیں کل سے چلنا شروع ہوجائیں گی اور شہر میں شدید گرمی کا زور ٹوٹ جائے گا۔
تفصیلات کے مطابق کراچی میں سورج سوا نیزے پر ہے، گرم ہوا اور جھلساتی دھوپ نے شہریوں کی زندگی مشکل بنارکھی ہے، محکمہ موسمیات نے خبردار کیا ہے کہ شہر قائد میں آج بھی شدید گرمی پڑے گی، پارہ 40 ڈگری سے تجاوز کرسکتا ہے، ویک اینڈ پر درجہ حرارت معمول پر آجائے گا۔
کراچی کا موجودہ درجہ حرارت 33ڈگری سینٹی گریڈ ہے جبکہ ہوا میں نمی کا تناسب38 فیصد ہے جبکہ گذشتہ روز پارہ بیالیس ڈگری تک پہنچ گیا تھا۔
ڈی جی میٹ ڈاکٹرغلام رسول نے اے آر وائی نیوز سے خصوصی گفتگو کراچی میں آج گرمی کا آخری دن ہوگا، کراچی میں آج بھی درجہ حرارت40ڈگری سےتجاوزکرےگا جبکہ ہیٹ ویو کی شدت میں کل سے کمی ہونا شروع ہوجائے گی۔
ڈاکٹرغلام رسول نے بتایا کہ ہفتے سے درجہ حرارت معمول پر آنا شروع ہوجائےگا ، اس سال سردیاں 10سے15دن دیر سے آئیں گی، اگلے2مہینوں میں بارشیں کم ، درجہ حرارت 2سے3ڈگری زیادہ ہوگا۔
چیف میٹرولوجسٹ عبدالرشید کا کہنا ہے کہ مئی اور اکتوبر سال کے گرم ترین ماہ شمار کئے جاتے ہیں اور ہر سال کی طرح اس سال بھی اکتوبر کا مہینہ شہر قائد پر سورج پوری آب و تاب کے ساتھ گرمی برسائے گا اور گرمی کی شدت میں اضافہ ہوتا رہے گا۔
ماہرین کے مطابق ہیٹ اسٹروک سے بچاو کیلئے حفاظتی اقدامات اور احتیاطی تدابیر اختیار کی جائیں، گرمی کی شدت سے بچنے کیلئے شہری پانی کا استعمال زیادہ کریں، شہری دھوپ میں نکلنے سے گریز اور کھانے پینے میں احتیاط کریں۔
دوسری جانب محکمہ موسمیات کے مطابق کراچی اور سندھ سمیت مکران کے سا حلی علاقوں میں آج بھی موسم شدید گرم رہےگا،لیکن مالا کنڈ، ہزار ہ، راولپنڈی ڈویژن، بالائی فاٹا، کشمیر، گلگت بلتستان، اور اسلام آباد میں چند مقامات پرگرج چمک کےساتھ بارش کا امکان ہے۔
گز شتہ روزسب سے زیاد درجہ حرارت مٹھی میں تینتالیس ڈگری سینٹی گر یڈ رہا۔
