ریاض : ہوٹل میں بیٹھے لوگوں اور عملے کو مسلح نوجوان نے یرغمال بنالیا، ایک بہادر شخص نے ہمت کرنے اسے قابو کرلیا، پولیس نے نوجوان کو گرفتار کرلیا۔
تفصیلات کے مطابق ریاض کے ایک ریستوران میں اس وقت خوف ہراس پھیل گیا اچانک ایک نوجوان تیز دھار خنجر لہراتے ہوئے داخل ہوا اور وہاں موجود لوگوں اور عملے کو یرغمال بنا تے ہوئے انہیں ڈرانا دھمکانا شروع کردیا۔
نوجوان کے ہاتھ میں دھار دار آلہ دیکھ کر وہاں موجود افراد خوفزدہ ہوگئے۔ اسی دوران ایک شخص نے ہمت کی اور پیچھے سے چھلانگ لگا کر اسے قابو کرلیا، اور اسے بے بس کرکے پولیس کے حوالے کردیا۔
اس واقعے کی ویڈیو سوشل میڈیا پر وائرل ہوگئی، اور صارفین نے اپنے کمنٹس میں دکھ کا اظہار کیا کیونکہ ایسے واقعات میں عمومی طور پر سعودی عرب میں نہیں ہوتے۔
لوگوں نے اس بہادر کی تعریف کی اور کہا کہ ایسے موقع پر لوگ حواس باختہ ہوجاتے ہیں لیکن اس بہادر شخص نے بہت ہمت دکھائی اور حملہ آور کو قابو کرلیا۔
گجرات: بھارتی ریاست گجرات کے ایک ہوٹل میں حفاطتی اقدامات کے فقدان کے باعث سات افراد اپنی زندگی سے ہاتھ دھو بیٹھے.
تفصیلات کے مطابق گجرات کے ضلع ودودارا میں ایک ہوٹل کے بند گٹر کو کھولنے کی کوشش میں سات افراد ہلاک ہو گئے۔
ہلاکتیں زہریلی گیس کے باعث ہوئیں، ہوٹل میں حفاظتی انتظامات کا فقدان ہے، گٹر کھولنے والے افراد کے پاس نہ تو ماسک تھے، نہ ہی دیگر انتظامات کیے گئے تھے.
ہلاک ہونے والوں میں چار سینیٹری ورکرز شامل تھے، ہوٹل کے تین ملازمین بھی اس خوف ناک حادثے کی لپیٹ میں آئے. عینی شاہدین کے مطابق گٹر کھولنے کی کوشش ایک ورکر نیچے اترا، مگر وہ واپس نہیں آیا.
دنیا بھر میں کئی پرتعیش ہوٹل موجود ہیں جہاں پر صرف ایک رات قیام کا کرایہ لاکھوں ڈالرز ہوتا ہے، یہ ہوٹل سروسز، سہولیات اور خوبصورتی میں بھی نہایت شاندار ہوتے ہیں۔
وقت گزرنے کے ساتھ ساتھ ایسے ہوٹل بھی بنائے جارہے ہیں جہاں قدرتی نظارے اپنی پوری آب و تاب اور سحر انگیزی کے ساتھ موجود ہوتے ہیں اور وہاں قیام کرنا زندگی کا شاندار ترین تجربہ ہوسکتا ہے۔
تاہم ناروے کے جس ہوٹل کے بارے میں آج ہم آپ کو بتانے جارہے ہیں، وہ یقیناً ایک منفرد اور خوبصورت ترین ہوٹل ہے اور جس کی خوبصورتی دیکھ کر آپ کی سانسیں تھم جائیں گی۔
ناروے کے مضافاتی علاقے میں زیر تعمیر یہ ہوٹل مکمل ہونے کے بعد نہ صرف فن تعمیر کا شاہکار ہوگا بلکہ اس کا محل وقوع بھی اسے دنیا کا حسین ترین مقام بنادے گا۔
ناروے قدرتی حسن کی دولت سے مالا مال ہے اور شہروں کی بھیڑ بھاڑ سے دور، دور دراز علاقوں میں چھپا اس کا حسن دنگ کردینے والا ہے اور یہ نیا ہوٹل یہیں پر تعمیر کیا جارہا ہے۔
دارالحکومت اوسلو سے 80 میل دور شمال میں یہ ہوٹل برفانی پہاڑوں یعنی گلیشیئرز کے دامن میں بنایا جارہا ہے۔ یہ ہوٹل ماحول دوست بھی ہے اور اپنے استعمال کے لیے خود توانائی پیدا کرسکتا ہے۔
اس ہوٹل میں رہتے ہوئے آپ دنیا کے حسین ترین نظارے یعنی قبطی روشنیوں سے بھی لطف اندوز ہوسکتے ہیں۔ ہوٹل کے مہمانوں کو پھولوں سے بھری پگڈنڈیوں میں ہائیکنگ اور سائیکلنگ کا موقع بھی ملے گا۔
قطب شمالی پر ہونے کی وجہ سے یہاں دو ماہ ایسے بھی آتے ہیں جس میں سورج غروب نہیں ہوتا۔ اس عرصے میں آدھی رات کے وقت بھی سورج کی روشنی موجود ہوتی ہے جسے مڈ نائٹ سن کہا جاتا ہے۔
اس ہوٹل میں رہتے ہوئے اس روشنی میں مچھلیاں پکڑنا، چہل قدمی کرنا اور کشتی چلانا یقیناً زندگی کا شاندار ترین تجربہ ہوگا۔
یہ خوبصورت ہوٹل سنہ 2021 تک مکمل ہوجائے گا جس کے بعد اسے عام افراد کے لیے کھول دیا جائے گا۔
کولمبو : سری لنکا میں خودکش بم دھماکوں کے بعد ایک ہوٹل نے سعودی سیاح کی بکنگ یہ کہہ کر منسوخ کی ہے کہ ہم آپ کو خوش آمدید نہیں کہہ سکتے کیونکہ آپ مسلمان ہیں۔
تفصیلات کے مطابق عیسائیوں کےمذہبی تہوار ایسٹر سنڈے پر سری لنکا میں تین گرجا گھروں اور ہوٹلوں میں ہونے والے خودکش بم دھماکوں کے نتیجے میں سینکڑوں افراد ہلاک ہوئے تھے، جس کے باعث سری لنکن ہوٹل کی انتظامیہ کا سعودی سیاح کے ساتھ ایسا رویہ اختیار کیا گیا ہے۔
سعودی سیاح عبداللہ الرسی نے ایک مقامی ویب سائٹ کو بتایا کہ ہوٹل انتظامیہ کی جانب سے انہیں بھیجا گیا پیغام تعصب پر مبنی ہے۔
عبداللہ الرسی کا کہنا تھا کہ انہیں ہوٹل انتظامیہ کی جانب سے اس قسم کے امتیازی سلوک کی قطعی توقع نہیں تھی حالانکہ انہوں نے ایک ماہ قبل ہوٹل بکنگ کی ویب سائٹ بکنگ ڈاٹ کام کے ذریعے کمرہ بک کرکے اس کا کرایہ بھی ادا کردیا تھا۔
انہوں نے کہا کہ بکنگ کی منسوخی کے حوالے سے جب خبریں سماجی رابطوں کی ویب سائٹ پر سامنے آئیں تو بکنگ ڈاٹ کام کی جانب سے انہیں ای میل پر ایک پیغام موصول ہوا جس میں کہا گیا تھا کہ ہوٹل انتظامیہ کے رویے کے حوالے سے معذرت خواہ ہیں، ان کی جانب سے کسی قسم کے امتیازی سلوک کو قطعی طور پر مسترد کرتے ہیں۔
غیر ملکی خبر رساں ادارے کے مطابق ہوٹل انتظامیہ کا کہنا تھا کہ اس حوالے سے تحقیقات کر رہے ہیں اگر ہوٹل انتظامیہ کی جانب سے امتیازی سلوک ثابت ہوگیا تو اس کے خلاف کارروائی کرتے ہوئے مذکورہ ہوٹل کو اپنی لسٹ سے خارج کر دیں گے۔
متاثرہ سعودی عبداللہ الرسی کا کہنا تھا کہ بکنگ ڈاٹ کام نے اب تک کسی مناسب کارروائی کا آغاز نہیں کیا جس پر وہ خاموش نہیں رہ سکتے۔
انہوں نے کہا کہ ویب سائٹ کی جانب سے کسی خاص رد عمل کا اظہار نہ کرنا معنی خیز ہے، اس حوالے سے سعودی عرب میں سوشل میڈیا پر لوگوں نے ملا جلا ردعمل دیا ہے اور کہا کہ ہوٹل انتظامیہ کی جانب سے اس قسم کا رد عمل مناسب نہیں جو انہو ں نے مسلمانوں کے خلاف امتیازی سلوک کے ذریعے ظاہر کیا ہے۔
دبئی: دنیا کی بلند ترین عمارت ’برج الخلیفہ‘ میں دنیا کے بلند ترین ہوٹل کا افتتاح کردیا گیا ہے، یہ ہوٹل دلکش ڈیزائن اور بلندی پر ہونے کے باعث لوگوں کی توجہ کا مرکز بن گیا ہے۔
تفصیلات کے مطابق متحدہ عرب امارات کی ریاست دبئی میں دنیا کی بلند ترین اور دلکش عمارتیں پہلے ہی موجود ہیں لیکن اب دبئی کی شان میں دنیا کے بلند ترین ہوٹل کا اضافہ بھی ہوگیا ہے جسے برج الخلیفہ میں بنایا گیا ہے۔
اماراتی میڈیا کا کہنا ہے کہ 160 منزلوں پر محیط برج الخلیفہ کی 152، 153، 154 ویں منزل پر ہوٹل بنایا گیا ہے جسے 14 فروری کو عوام کےلیے کھول دیا گیا تھا۔
مقامی خبر رساں ادارے کا کہنا ہے کہ تین منزلہ ہوٹل میں سیاح اور مقامی افراد ہائی ٹی، لذیذ کھانے اور موسیقی سے لطف اٹھا سکیں گے، ہائی ٹی کےلیے سیاحوں و مقامی شہریوں کو ساڑھے 12 بجے سے 4 بجے تک ہوٹل کا دورہ کرنا ہوگا اور ہائی ٹی کی قیمت 550 درہم یعنی ہاکستانی کم از کم 20 ہزار روہے فی بندہ ہے۔
اماراتی خبر رساں ادارے کا کہنا تھا کہ 575 میٹر کی بلندی پر موجود ہوٹل میں مشروب، پکوان اور مٹھائیوں کے مختلف دام ہیں اور کسی بھی کھانے یا مشروب کی ابتدائی قیمت کم از کم 550 درہم فی کس ہے۔
مقامی میڈیا کا کہنا ہے کہ مذکورہ ہوٹل میں دنیا کی بلند ترین بالکونی بھی موجود ہے اور کسی سیاح یا مقامی فرد نے سن سیٹ کا مظاہرہ بلند ترین لاؤنج سے کرنا ہو تو اس کےلیے اسے 600 درہم ادا کرنے ہوں۔
ریاض : سعودی عرب کے شہر مدینہ منورہ میں عمرہ زائرین کی رہائش گاہ میں اچانک ہولناک آگ بھڑک اٹھی۔
تفصیلات کے مطابق سعودی عرب کے شہر مدینہ منورہ کے ایک مقامی ہوٹل کی عمارت میں اچانک آگ بھڑک اٹھی ہے، مذکورہ ہوٹل ہزاروں عمرہ زائرین بھی موجود ہیں۔
غیر ملکی خبر رساں اداروں کا کہنا ہے کہ مدینہ منورہ کی امدادی خدمات انجام دینے ٹیمیں آگ پر قابو پانے میں مصروف ہیں جبکہ ہوٹل میں پھنسے بیشتر عمرہ زائرین کو باہر نکال لیا گیا ہے۔
ریسکیو عملے کے ترجمان کا کہنا تھا کہ ہوٹل کی 14 ویں منزل پر ہونے والی آتشزدگی کی وجہ شارٹ سرکٹ کو ہوسکتی ہے۔
واضح رہے کہ متاثرہ ہوٹل میں پاکستان، عراق، مصر اور شام سے عمرے کی ادائیگی کے لیے جانے والے زائرین قیام پذیر ہیں، رپورٹ کے مطابق کم از کم 250 پاکستانی شہری عمرے کی غرض سے سعودی عرب گئے ہیں۔
یاد رہے کہ 9 فروری سنہ 2014 میں مدینہ منورہ کے مقامی ہوٹل میں آتشزدگی کے باعث 15 عمرہ زائرین اپنی جان کی بازی ہار گئے تھے جبکہ 130 سے زائد افراد جھلس کر زخمی ہوئے تھے۔
مصری خبر رساں ادارے کی تحقیقاتی رپورٹ کے مطابق سنہ 2014 میں لگنے والی آگ شارٹ سرکٹ ہونے کی وجہ سے بھڑکی تھی۔
رپورٹ میں بتایا گیا ہے کہ ریسکیو عملے کو ہوٹل میں ہونے والی ہولناک آتشزدگی پر قابو پانے اور ہوٹل میں قیام پذیر 700 غیر ملکی افراد کو باہر نکالنے میں 2 گھنٹے لگ گئے تھے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
ریگا : شمالی یورپ میں آزادی کی اہمیت کواجاگرکرنے کے لیےمنفرد ہوٹل بنایا گیا ہے، جس میں مہمانوں کوخاطر و تواضح تشدد سے کی جاتی ہے۔
تفصیلات کے مطابق شمالی یورپ میں ایک ایسا ہوٹل بھی موجود ہے جہاں انسان کی نظروں میں آزادی کی اہمیت اجاگر کرنے کے لیے جیل کی تھیم کو اپنایا گیا ہے اور یہاں آنے والوں کو ہوٹل میں ایک قیدی کی طرح زندگی گزارنی پڑتی ہے۔
ہوٹل کے اندر کا ماحول جیل کی طرز پر ہے
یورپ کے شمالی حصے میں واقع چھوٹے سے ملک لٹویا کے شہرلی پاجا میں ایک تاریخی جیل کو ہوٹل میں تبدیل کردیا گیا ہے، جہاں آپ کو کمرہ لیتے وقت ہتھکڑی کا کرایہ بھی ادا کرنا ہوتا ہے۔ جی ہاں! ہوٹل کے ملازمین آپ کو ہتھکڑی پہناکر آپ کو کمرے میں بند کرکے چابی ساتھ لے جاتا ہے۔
ہوٹل کی عمارت درحقیقت سن 1900 میں روس کی بحری افواج کے زیرِ استعمال تھی، جہاں قواعد و ضوابط کی خلاف ورزی کرنے والے فوجیوں کو سزا کے طور پر یہاں رکھا جاتا تھا، بعد ازاں اس عمارت کو روس کی خفیہ غیر ملکی جاسوسوں اور خطرناک قیدیوں سے تفتیش کے لیے کے جی بی کے حوالے کردیا تھا۔
لی پاجا ہوٹل کی عمارت کو آج اصلی حالت میں رکھا گیا ہے جو جیل کے زمانے میں تھی۔ مذکورہ ہوٹل کا تمام فرنیچر اسی دور کا ہے اور مہمانوں کو بھی قیدیوں کی کال کوٹھڑیوں میں ٹہرایا جاتا ہے، جہاں آرام دہ بستر کی جگہ لوہے کے ٹوٹے ہوئے پلنگ ہیں۔
ہوٹل میں مہمانوں کے سونے کے لیے قیدیوں کی طرز کا بشتر ہے
ہوٹل کا مینیجر آپ کو جیلر کی وردی میں ملبوس ہوتا ہے، جو بوسیدہ سے رجسٹر اور پُرانی اسٹیشنری سے کام کرتا ہوا دکھائی دے گا جیسے جیل کے حکام کرتے تھے اور جیلر کے عقب میں دیوار پر زار روس کی تصویر لگی ہوئی نظر آئے گی۔
ہوٹل کا مینیجر بھی مہمانوں کے ساتھ جیلر کی طرح برتاؤ کرتا ہے
لی پاجا ہوٹل کے بروشر میں درج ہے کہ ہوٹل کے عملے کا رویہ نامناسب اور غیر دوستانہ ہوگا، اگر آپ چاہیں تو آپ کی خاطر داری تشدد سے بھی کی جاسکتی ہے جس کی فیس علیحدہ دینی ہوگی لیکن اس کے لیے آپ کو دس افراد کے گروپ کی صورت میں ہوٹل آنا ہوگا۔
ہوٹل میں داخل ہونے کے بعد ایک اسلحہ بردار گارڈ آپ کو ایک قیدی کی طرح کال کوٹھڑی میں بندوق کا بٹ مارتا ہوا کمرے کے اندر بند کرکے چابی اپنے ساتھ ہی لے جاتا ہے۔
ہوٹل کا گارڈ مہمانوں کو بندوق کے بٹ مارتا ہوا کمرے تک لے کر جاتا ہے
لٹویا میں واقع یہ تاریخی جیل ہوٹل نہایت سستا ہے۔ صرف سات یورو خرچ کر کے آپ ایک رات قیدیوں کی زندگی گزار سکتی ہیں۔ سات یورو میں رہائش کے ساتھ مفت کھانا بھی شامل ہے۔ لیکن خیال رہے کہ بروشر میں نمایاں طور پر لکھا ہے کہ آپ کو صرف قیدیوں کا کھانا فراہم کیا جائے گا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
منیلا: ہوٹل کی عمارت میں لگنے والی ہولناک آگ کے باعث چار افراد جُھلس کر ہلاک ہوگئے، ایمرجنسی ٹیمیں 5 گھنٹے گزرنے کے باوجود آگ پر قابو پانے میں ناکام ہیں۔
تفصیلات کے مطابق فلپائن کے دارالحکومت منیلا کے ایک مقامی ہوٹل اور کسینو کی عمارت میں اچانک آگ بھڑک اٹھی جس کے نتیجے میں چار افراد جُھلس کر ہلاک ہوگئے جبکہ 6 افراد کو تشویشناک حالت میں اسپتال منتقل کردیا گیا ہے۔
پولیس کا کہنا ہے کہ منیلا پویلین ہوٹل اور کسینو میں لگی آگ پر پانچ گھنٹے گزر جانے کے بعد بھی قابو نہیں پایا جاسکا ہے، آگ کسینوں اور ہوٹل کے زِیرمرمت حصّے بھڑکی تھی۔
فلپائن کے پویلین ہوٹل میں لگی آگ کے باعث عمارت سے دھواں اٹھ رہا ہے
منیلا ایمرجنسی سینٹر کے ترجمان کا خبر رساں ادارے کو واقعے کی تفصیلات بتائے ہوئے کہنا تھا کہ آتشزدگی کے باعث عمارت میں شدید دھواں بھر جانے کی وجہ سے 6 افراد ہلاک ہوئے تھے، مرنے والوں میں دو سیکیورٹی گارڈ اور اکاؤنٹس عملے کے بھی دو افراد شامل ہیں۔
ترجمان کا کہنا تھا کہ ہوٹل میں دھواں اتنا زیادہ تھا کہ امدادی کام کرنے والے عملے کو بھی ریسکیو آپریشن کرنے میں مشکلات کا سامنا تھا۔
ان کا مزید کہنا تھا کہ ریسکیوعملے نے ہوٹل میں موجود 300 افراد کو بحفاظت نکال کر محفوظ مقام پر منتقل کیا ہے، جبکہ لاپتہ 19 افراد میں سیکیورٹی کیمرے پر موجود دو افراد کی تصدیق ہوگئی ہے جنہیں نکالنے کی کوشش کی جارہی ہے۔
پولیس اور ریسکیو عملے نے ہوٹل کے ارد گرد متاثرہ علاقے کو رکاوٹیں لگا کر بند کردیا جبکہ ایک درجن سے زائد فائر بریگیڈ کی گاڑیاں آگ پر قابو پانے میں مصروف ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
اسلام آباد : وہاڑی کے رہائشی ہوٹل میں خفیہ کیمروں سے ریکارڈنگ کرنے والا بلیک میلر اسلام آباد میں رقم وصول کرتے ہوئے پکڑا گیا، ایف آئی اے نے عدالت سے ملزم کا پانچ روزہ جسمانی ریمانڈ حاصل کرلیا۔
تفصیلات کے مطابق خفیہ کیمروں سے خواتین کی نازیبا ویڈیوز ریکارڈنگ کے بعد بلیک میلنگ کرنے والا ملزم ایف آئی اے نے رنگے ہاتھوں گرفتار کرلیا۔
ایف آئی اے سائبر کرائم ونگ نے اسلام آباد میں کارروائی کرتے ہوئے ہوٹل پر چھاپہ مارا اور اس دوران ہوٹل کے ملازم کو خفیہ کیمروں سے خواتین کو بلیک میل کرنے کے الزام میں گرفتار کر لیا جس کی شناخت محمد امجد کے نام سے ہوئی ہے۔
ڈپٹی ڈائریکٹر ایف آئی اے نے انکشاف کیا ہے کہ ملزم اسلام آباد بھی متاثرہ خاتون سے رقم وصول کرنے گیا اور دھرلیا گیا، ملزم سے خواتین کی تصویریں اور دیگر آلات بھی برآمد ہوئے ہیں۔
کارروائی ایک متاثرہ خاتون کی شکایت پرکی گئی ہے جسے ملزم بلیک میل کررہا تھا، ایف آئی اے کا کہنا ہے کہ گندے دھندے میں پورا گروہ ملوث ہے۔
ایف آئی اے نے عدلات سے ملزم کا پانچ روزہ جسمانی ریمانڈ حاصل کرلیا ہے، یاد رہے کہ اے آر وائی نیوز کے پروگرام سرعام کی ٹیم نے بھی کراچی ڈیفنس میں گیسٹ ہاؤسز میں خفیہ کیمروں کا انکشاف کیا تھا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
ایجیئن: بحریہ ایجئین کے جزیرے سینتورینی میں سیاحوں کو متاثر کرنے کے لیے اپنی نوعیت کا انوکھا ہوٹل کھولا گیا ہے جس کی انفرادیت یہ ہے کہ قیام کرنے والا شخص کمرے سے سیدھا سوئمنگ پول میں جاسکتا ہے۔
العربیہ ڈانٹ نیٹ کے مطابق یونان اور ترکی کے درمیان بحیرہ ایجیئن میں واقع جزیرہ سینتورینی میں اپنی نوعیت کا ایک منفرد ہوٹل ہے جہاں کمروں میں یہ سہولت موجود ہے کہ آپ ناقابل یقین راستے (سرنگ) کے ذریعے کمروں سے براہ راست سوئمنگ پول تک پہنچ سکتے ہیں۔
سیاحوں کو متاثر کرنے کے لیے ہوٹل کی انتظامیہ نے کمروں میں موجود غسل خانوں میں سرنگیں بنا رکھیں ہیں، ہوٹل میں قیام کرنے والا شخص جب غسل خانے پہنچتا ہے تو اُسے یہ خفیہ راستہ نظر آتا ہے۔
اپنی نوعیت کے منفرد ہوٹل میں قیام کرنے والے مہمان کھلے آسمان میں جائے بغیر سیدھا سوئمنگ پول پہنچتے ہیں اور اسی راستے سے کمرے میں واپس آتے ہیں۔
منتظمین کی جانب سے سوئمنگ پول پر نہانے کے علاوہ دیگر سرگرمیوں اور مطالعے کی بھی اجازت دی گئی ہے جہاں قیام کرنے والے حضرات سکون سے بیٹھ کر کتابیں بھی پڑھ سکتے ہیں۔ ہوٹل کے ایک کمرے کا کرایہ 491 برطانوی پاؤنڈ یعنی پاکستانی روپے کے حساب سے تقریباً 70 ہزار روپے کے قریب بنتا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
