لاہور : برطانیہ سے آئے شہری کے گھر سے گھریلو ملازمین سوا 3کروڑ روپے لے اڑے، پولیس نے مقدمہ درج کرلیا ہے۔
تفصیلات کے مطابق صوبائی دارلحکومت لاہور میں تھانہ ڈیفنس اے کی حدود میں برطانیہ سے آئے شہری کے گھر میں سوا 3 کروڑ روپے کی چوری کی واردات ہوئی۔
پولیس نے بتایا کہ چوری کی واردات شہری ڈاکٹر فیصل کے گھر پر گھریلوملازمین نے کی، جس میں چور شہری کے گھر سے ڈھائی کروڑ کے زیورات اور 2ہزار پاؤنڈز بھی لے گئے۔
پولیس نے درخواست کے بعد شہری کی مدعیت میں تھانہ ڈیفنس میں مقدمہ درج کرلیا ہے۔
مقدمے میں 3گھریلو ملازمین کو نامزدکیاگیا ہے تاہم پولیس نے ایک نامزد ملزم کو گرفتار بھی کر لیا۔
یاد رہے گذشتہ ماہ کے آخر میں پنجاب کے دارلحکومت لاہور میں دوسری بڑی وارداتیں ہوئیں تھیں، جس میں ملزمان 5 کروڑ روپے لے کر فرار ہوگئے تھے۔
ایک گھر میں ڈھائی کروڑ روپے کی چوری ہوئی تھی ، جہاں گھریلو ملازمہ ساتھیوں کےہمراہ غیرملکی کرنسی ، سونا،لاکھوں روپے چوری کرکے فرار ہوئی۔
دوسری بڑی واردات میں بھی ایک گھر سے ڈھائی کروڑ روپے کی ڈکیتی ہوئی ، جہاں 2 ڈاکوؤں نے گھرسے غیر ملکی کرنسی ، سونا لاکھوں روپے لوٹے۔
