سکھر : حالیہ بارشوں کے بعد پیدا ہونے والی صورتحال کے باعث سکھر کے تحصیل صالح پٹ کے کئی دیہات زیر آب آگئے۔ درجنوں گھرمسمار ہوگئے۔
اپنے گھروں سے محرومی کے بعد علاقہ مکین سخت مشکلات شکار ہیں، بارش سے کھڑی فصلیں تباہ ہو گئیں اسکولوں کی عمارتیں ڈوبنے سے تعلیمی ادارے بھی بری طرح متاثر ہیں۔
ملک بھر کی طرح ضلع سکھر میں بھی حالیہ بارشوں نے جہاں تباہی مچا دی ہے وہاں نظام زندگی مفلوج ہو کر رہ گیا ہے ،بارش کے پانی نے کئی دہات کو لپیٹ میں لے لیا ہے۔
متعدد گھر زمین بوس ہوگئے، لوگ کھلے آسمان تلے بیٹھے مشکلات سے گزر رہے ہیں جن کا کوئی پرسان حال نہیں، سڑکیں تا حال زیر آب ہونے کے باعث لوگوں کو آنے جانے میں دشواری کا سامنا ہے تو اسکولوں کی عمارتیں ڈوبنے سے طلبا کی تعلیم بھی متاثر ہو کر رہ گئی ہے۔
صالح پٹ کے علاقے میں ہزاروں ایکڑ پر تیار فصلیں تباہ ہونے سے کاشتکاروں کی امیدوں پر پانی پھر گیا ہے تو انسانی زندگی خطرے میں ہونے کے ساتھ مویشی بھی مرنے لگے ہیں۔
سرکاری مدد سے محروم بارش متاثرین اس وقت منتظر ہیں کہ کئی روز سے جمع پانی نکال کر انہیں مصیبت سے چھٹکارا حاصل کرنے کے انتظامات کیے جائیں۔
