کوئٹہ: بلوچستان میں ایف آئی اے نے انسانی اسمگلرز کے خلاف کارروائی کرتے ہوئے 19 افراد کو حراست میں لے لیا۔
تفصیلات کے مطابق صوبائی دارالحکومت کوئٹہ میں ایف آئی اے نے انسانی اسمگلرز کے خلاف اہم کارروائی کی جس کے باعث غیر قانونی طور پر یورپ جانے والے 19 افراد کو گرفتار کرلیا گیا۔
ڈپٹی ڈائریکٹر ایف آئی اے عباس بلوچ کا کہنا ہے کہ اس اہم کارروائی میں ایجنٹ اور سہولت کار بھی گرفتار ہوئے ہیں۔
عباس بلوچ کا کہنا تھا کہ کوچ کی چھت پر خفیہ خانے قائم کرکے مسافروں کو بٹھایا گیا تھا، خفیہ خانے میں پانی اور ہوا کی سہولت نہ ہونے سے اموات کا خطرہ تھا۔
اسسٹنٹ ڈائریکٹر جواد حسین کا کہنا تھا کہ گرفتار افراد براستہ ایران یورپ جارہے تھے۔
لاہور:انسانی اسمگلنگ کرنے والےگروہ کے دوملزمان گرفتار
اس سے قبل مئی 2016 میں لاہور میں پولیس نے انسانی اسگلنگ کرنے والے گروہ کے سرغنہ مجاہد حسین اور اس کے ساتھی محمد امین کو گرفتار کیا تھا۔
خیال رہے کہ ملزمان گزشتہ کئی سالوں سے انسانی اسمگلنگ کا کاروبار کر رہے تھے، دونوں ملزمان ایف آئی اے کو مطلوب تھے ملزمان کے قبضہ سے ملکی وغیر ملکی پاسپورٹس دولاکھ سے ذائد نقدی ویزا کارڈز اور شناختی کارڈز برآمد ہوئے تھے۔
واضح رہے کہ دسمبر 2014 میں ایف آئی اے نے انسانی اسمگلنگ میں ملوث سات ملزمان کو گرفتار کیا تھا۔
