ARYNews.tv | Urdu – Har Lamha Bakhabar

Tag: Hurriyat Conference

  • کشمیریوں سے اظہار یکجہتی، حریت کانفرنس کا پاکستانی حکومت اور عوام کا شکریہ

    کشمیریوں سے اظہار یکجہتی، حریت کانفرنس کا پاکستانی حکومت اور عوام کا شکریہ

    سرینگر: کشمیریوں سے اظہار یکجہتی پر کل جماعتی حریت کانفرنس نے پاکستانی حکومت اور عوام کا شکریہ ادا کیا ہے۔

    تفصیلات کے مطابق غیر قانونی طور پر بھارت کے زیر قبضہ جموں و کشمیر میں کل جماعتی حریت کانفرنس نے 5 اگست کو یوم استحصال کے موقع پر کشمیریوں سے بھرپور اظہار یکجہتی کرنے پر پاکستانی حکومت اور عوام کا شکریہ ادا کیا۔

    حریت کانفرنس کے جنرل سیکریٹری مولوی بشیر احمد عرفانی نے سرینگر میں جاری ایک بیان میں کہا کہ مسئلہ کشمیر پر پاکستانی حکومت اور عوام کے ٹھوس مؤقف سے کشمیری عوام کے حوصلے بلند ہوئے ہیں۔

    انھوں نے کہا پاکستانی عوام نے ہر مرحلے اور ہر آزمائش پر کندھے سے کندھا ملا کر کشمیریوں کا ساتھ دیا ہے اور یوم استحصال منا کر دنیا اور خاص کر بھارت کو یہ واضح پیغام دیا ہے کہ آزادی کی اس تحریک میں پوری پاکستانی قوم کشمیریوں کی پشت پر ہمالیہ کی طرح کھڑی ہے۔

    مولوی بشیر احمد عرفانی نے کہا کہ 5 اگست کشمیر کی تاریخ کا ایک نہایت ہی دردناک اور کربناک دن ہے جب مودی حکومت نے ریاست جموں و کشمیر پر شب خون مارا اور بین الاقوامی قوانین کی کھلی خلاف ورزی کی کرتے ہوئے اس کی خصوصی حیثیت ختم کی اور اس کو دو حصوں میں تقسیم کر دیا۔

    انہوں نے کہا مودی حکومت نے ریاست جموں و کشمیر کو ایک کھلی جیل میں تبدیل کر دیا ہے جہاں تقریباً ایک کروڑ لوگوں سے ان کے بنیادی سیاسی، مذہبی اور سماجی حقوق چھین کر پوری انسانیت کی تذلیل کی گئی ہے۔

  • مودی حکومت نے کُل جماعتی حریت کانفرنس کا دفتر سیل کر دیا

    سری نگر: بھارت نے مقبوضہ کشمیر کے شہر سری نگر میں کُل جماعتی حریت کانفرنس کا دفتر سیل کر دیا۔

    تفصیلات کے مطابق بھارت نے سری نگر میں کُل جماعتی حریت کانفرنس کا دفتر سیل کر دیا ہے، دفتر کی عمارت کو سیل کرنے کا حکم نئی دہلی کی عدالت نے دیا تھا۔

    کُل جماعتی حریت کانفرنس کے رہنما میر واعظ عمر فاروق کا کہنا ہے کہ یک طرفہ عدالتی حکم کے تحت دفتر کو سیل کیا گیا، انسانی حقوق کی تنظیمیں بھارتی جیلوں میں قید تمام کشمیری قیادت اور کارکنان کی طویل نظر بندی کا نوٹس لیں۔

    حریت کانفرنس نے بھارتی بدنام زمانہ نیشنل انویسٹی گیشن ایجنسی کے اہل کاروں کی جانب سے سری نگر میں اپنے دفتر کو سیل کرنے کی شدید مذمت کی ہے۔

    واضح رہے کہ دہلی کی ایک عدالت کے ایڈیشنل سیشن جج شیلندر ملک نے کل مقبوضہ کشمیر میں فنڈنگ سے متعلق ایک فرضی کیس میں حریت دفتر سری نگر کو سیل کرنے کا حکم دیا تھا۔

    کشمیر میڈیا سروس کے مطابق حریت کانفرنس کے ترجمان نے کہا کہ اے پی ایچ سی کا دفتر عوامی ملکیت ہے اور یہ بھارتی فوجیوں کے ہاتھوں کشمیریوں پر ڈھائے جانے والے مظالم کو اجاگر کرتا ہے، جس کا وہ گزشتہ سات دہائیوں سے سامنا کر رہے ہیں۔

    انھوں نے بھارتی حکام کی جانب سے مقبوضہ علاقے میں صنعتیں لگانے کے لیے زمین کو باہر کے لوگوں کے حوالے کرنے کی مہم پر بھی تشویش کا اظہار کیا، اور کہا کہ یہ اقدام جموں و کشمیر کے لوگوں کو مزید بے اختیار اور مفلوج کر دے گا۔

  • بھارت کے پاس کشمیریوں کا موقف تسلیم کرنے کے سوا اور کوئی راستہ نہیں، سید فخر امام

    بھارت کے پاس کشمیریوں کا موقف تسلیم کرنے کے سوا اور کوئی راستہ نہیں، سید فخر امام

    اسلام آباد : کشمیر کمیٹی کے چیئرمین سید فخر امام نے کہا ہے کہ بھارت کے پاس کشمیریوں کا موقف تسلیم کرنے کے علاوہ اور کوئی راستہ نہیں ہے، اس کا مکروہ چہرہ دنیا کے سامنے بے نقاب ہوگیا ہے۔

    ان خیالات کا اظہار انہوں نے اسلام آباد کے ڈی چوک پر کل جماعتی حریت کانفرنس کے زیر اہتمام منعقدہ جلسے سے خطاب کرتے ہوئے کیا۔

    انہوں نے کہا کہ کشمیر میں بھارتی ظلم و بربریت پر اقوام متحدہ میں چین نے پاکستان کی بھر پور حمایت کی ہے جس کے بعد روس بھی کھل کر سامنے آگیا ہے، اس عمل سے دیگر بیرون ممالک نے کشمیر کے حوالے سے اپنا موقف پیش کیا،جس سے بھارت کا مکرو چہرہ بے نقاب ہوا ہے۔

    ان کا کہنا تھا کہ کشمیریوں کے حق خود ارادیت کیلئے پاکستان کا ایک موقف ہے اور اس موقف پر افواج پاکستان  حکومت اور عوام تمام ایک پیلٹ فارم پر کھڑے ہیں۔

    بھارت کے پاس کشمیریوں کا موقف تسلیم کرنے کے علاوہ اور کوئی راستہ نہیں ہے،عالمی برادری بھی اس حوالے سے بھارت پر اپنا دباؤ بڑھائے تاکہ کشمیریوں کو انکے جائز حق مل سکے۔

    کل جماعتی حریت کانفرنس کے جلسے سے خطاب میں ان کا مزید کہنا تھا کہ مقبوضہ کشمیر میں ایک لاکھ سے زائد کشمیر یوں کو شہید کیا جا چکا ہے جبکہ ہزاروں کی تعداد میں عورتوں کی عصمت دری سے دنیا آگاہ ہے، کرفیو کے باعث نہتے کشمیری اپنے گھروں میں محصور ہیں۔