حیدرآباد : آن لائن امتحانی پورٹل بندش سے نویں اور دسویں جماعت کے سینکڑوں طلبا و طالبات کے امتحانی فارم جمع نہ ہوسکے، امتحانی سلپ اور ایڈمٹ کارڈ بھی جاری نہ ہوسکے۔
اے آر وائی نیوز حیدرآباد کے نمائندے جام فرید لاکھو کی رپورٹ کے مطابق آن لائن امتحانی پورٹل پر تعلیمی کوائف جمع نہ ہونے سے 600 سے زائد طلبہ کو امتحانی کارڈ جاری نہیں ہوسکے۔
رپورٹ کے مطابق دو سیاسی جماعتوں کے درمیان چپقلش کے باعث بورڈ کے انتظامی عہدوں کی تعیناتی کا جھگڑا چل رہا تھا اور کمپیوٹرز کے آئی ڈیز اور پاسورڈ نہ ہونے سے طلباءو طالبات کو امتحانی سلپس جاری نہ ہوسکیں۔
اس حوالے سے تعلیمی بورڈ حیدرآباد کے ترجمان نے بتایا کہ جن طلباءو طالبات نے آن لائن پورٹل پر امتحانی فارم جمع کرائے تھے ان کو بھی سلپس جاری نہیں کی جاسکیں۔
طلبا و طالبات کی بڑی تعداد رات گئے تک اپنے والدین کے ہمراہ تعلیمی بورڈ آفس میں دربدر ہوگئے۔
اے آر وائی نیوز سے گفتگو کرتے ہوئے نویں اور دسویں جماعت کے طلبا و طالبات کے والدین کا کہنا تھا کہ بورڈ انتظامیہ نے ہمارے بچوں کا مستقبل داؤ پر لگادیا ہے۔
ایک خاتون نے بتایا کہ صبح پہلا پرچہ ہے لیکن ابھی تک میری بیٹی کی امتحانی سلپ جاری نہیں ہوسکی۔
اس موقع پر بچوں کے والدین نے کنڈکٹ برانچ کے سپرنٹنڈنٹ محمد حسین پر رشوت وصولی کے الزامات بھی عائد کیے۔
واضح رہے کہ حیدرآباد تعلیمی بورڈ کے تحت نویں اور دسویں جماعت کے سالانہ امتحانات کا آغاز آج 7 اپریل سے ہورہا ہے۔
مزید پڑھیں : انٹرمیڈیٹ کے ضمنی امتحانات
علاوہ ازیں انٹرمیڈیٹ کے ضمنی امتحانات کیلئے فارم جمع کرانے کی تاریخ کا اعلان کردیا گیا ہے، اعلامیے کے مطابق طلبہ کے امتحانی فارم متعلقہ تعلیمی اداروں کے ذریعے جمع کروائے جائیں گے۔
ضمنی امتحانات 2024 میں ناکام امیدواروں کیلئے فارم جمع کرانے کے جاری شیڈول کے مطابق امتحانی فارم 7 اپریل سے 10 اپریل 2025 تک جمع کرائے جاسکتے ہیں۔
اعلامیے کے مطابق طلبہ کے امتحانی فارم متعلقہ تعلیمی اداروں کے ذریعے جمع کروائے جائیں گے۔
500روپے لیٹ فیس کے ساتھ فارم 11 سے 15 اپریل تک جمع کروائے جا سکتے ہیں، 1000 روپے لیٹ فیس کے ساتھ فارم 16 سے 18 اپریل 2025 تک جمع کرانے کی اجازت ہوگی۔
اس کے علاوہ فیس جمع کرانے کے بعد واؤچر اور فارم بورڈ آفس کی انکوائری میں لازمی جمع کرانا ہوگا۔
