حیدرآباد : پیپلز پارٹی کے رہنما مولا بخش چانڈیو نے ایم کیو ایم پر شدید تنقید کا اظہار کرتے ہوئے کہا ہے کہ 30سال تک جن کے پاس اختیارات تھے آج وہ ہم پرالزام لگارہے ہیں، ایم کیوایم پرجان دینے والے آج بھاگ رہے ہیں۔
یہ بات انہوں نے حیدرآباد میں میڈیا سے گفتگو کرتے ہوئے کہی۔ مولا بخش چانڈیو کا کہنا تھا کہ ایم کیوایم ہمارے ساتھ 3 مرتبہ حکومت میں رہی، وہ سیاست ضرور کریں لیکن سیاست میں سیاسی لہجہ ہوناچاہئیے۔
ایک سوال کے جواب میں ان کا کہنا تھا کہ ن لیگ کے پیالے میں چھوٹے صوبوں کیلئے دودھ نہیں، ان کے پیالے میں صرف مخصوص علاقوں کیلئے دودھ ہے۔
انہوں نے کہا کہ شہبازشریف نے بجلی نہ ہونے کی صورت میں اپنا نام تبدیل کرنے کا کہا تھا جو اب تک نہیں کیا۔
بلاول بھٹو پاکستانی عوام کی غیر معمولی قیادت ہے، بلاول بھٹو آنے والے دنوں میں پاکستان کی قیادت کرینگے، ان کا کہنا تھا کہ ہم نے اپنے پیاروں کی قربانیاں دیں لیکن پاکستان کےخلاف کبھی بات نہیں کی۔
