حیدر آباد : پیپلز پارٹی کے مرکزی رہنما اور مشیر اطلاعات سندھ مولابخش چانڈیو نے کہا ہے کہ اپوزیشن سڑکوں پر آئی تو حکمرانوں کیلئے حالات اچھے نہیں ہوں گے، بلاول کے احتساب کی باتیں کرنے والوں کو پہلے اپنے قائد کےاحتساب کا سوچنا چاہیئے۔
ان خیالات کا اظہار انہوں نے حیدرآباد میں افطار پارٹی سے خطاب کرتے ہوئے کیا، مولا بخش چانڈیو نے وزیر داخلہ چوہدری نثار کو بلاول اور آصف زرداری کی جائیدادوں سے متعلق بیان پر ترکی بہ ترکی جواب دیا اور کہا کہ بلاول بھٹو زرداری کے احتساب کی بات کرنیوالے پہلے اپنے قائد کا احتساب کرائیں۔
ان کا کہنا تھا کہ وزیراعظم کا ایک وزیر جمہوریت کو چلتا ہوا نہیں دیکھ سکتا، انہوں نے کہا کہ پاناما لیکس پراچھا کمیشن بنناچاہئیے۔
ان کا کہنا تھا کہ اپوزیشن کوسڑکوں پرنہ لا یاجائے، اگر اپوزیشن سڑکوں پرآئی توحالات اچھےنہیں ہونگے، میاں صاحب آپ ایک جھٹکا بھی برداشت نہیں کر سکیں گے۔ خدا نہ کرے آپ پر برا وقت آئے۔ آپ سے کسی کو ہمدردی نہیں۔
انہوں نے کہا کہ وفاقی حکومت سندھ سے سوتیلی ماں کا سلوک کر رہی ہے۔ ن لیگ کی پالیسیاں سندھ میں ن لیگ کا نام بھی غائب کر دیں گی۔ پہلے ہی ان کا سندھ میں کوئی وجود نہیں۔
مشیر اطلاعات نے کہا کہ نیب اگر پیپلز پارٹی کیخلاف کام کرے تو جائزہے، اور آپ کیخلاف کام کرے تو غلط۔، یہ کہاں کا انصاف ہے؟
مولا بخش چانڈیو نے کہا کہ کچھ وفاقی وزراء جمہوریت کو پٹری سےاتارنے کی کوشش کررہے ہیں۔ انہوں نے کہا کہ پیپلزپارٹی عدالتوں سےکبھی نہیں بھاگی۔
