ARYNews.tv | Urdu – Har Lamha Bakhabar

Tag: ICC Cricket World Cup

  • ورلڈ کپ 2019: عماد وسیم کی شاندار بیٹنگ، پاکستان نے افغانستان کو شکست دے دی

    ورلڈ کپ 2019: عماد وسیم کی شاندار بیٹنگ، پاکستان نے افغانستان کو شکست دے دی

    لیڈز : ورلڈکپ کے 36ویں میچ میں پاکستان نے عماد وسیم کی شاندار بیٹنگ کی بدولت سنسنی خیز مقابلے کے بعد افغانستان کو 3 وکٹوں سے شکست دے دی۔

    تفصیلات کے مطابق پاکستان اور افغانستان کی ٹیموں کے مابین لیڈز اسٹیڈیم میں ورلڈکپ کا 36واں میچ کھیلا گیا، سیمی فائنل تک رسائی حاصل کرنے کے لیے قومی ٹیم کو میچ میں فتح حاصل کرنا لازمی تھی۔

    افغانستان اننگز 

    افغانستان کی ٹیم کے کپتان گلبدین نائب نے ٹاس جیت پر پہلے بیٹنگ کا فیصلہ کیا۔ پاکستانی باؤلرز نے پہلے ہی اوور سے شاندار گیند بازی کی جس کی وجہ سے مخالف ٹیم کے بلے بازوں کو محتاط انداز اختیار کیا۔

    افغان ٹیم کی پہلی وکٹ 27 کے مجموعی اسکور پر گری جب کپتان کو شاہین آفریدی نے پویلین کی راہ دکھائی، اسی طرح نئے آنے والے بیٹسمین کو بھی شاہین شاہ نے 27 کے ہی مجموعی اسکور پر آؤٹ کیا۔ عماد وسیم نے اننگز کے بارہویں اوور میں رحمت شاہ کو آؤٹ کیا۔

    بعد ازاں اصغر افغان اور محمد نبی نے 64 رنز کی پارٹنر شپ قائم کر کے ٹیم کی پوزیشن مستحکم کرنے کی کوشش کی، البتہ اصغر افغان 42 رنز کے انفرادی اور 121 کے مجموعی اسکور پر پویلین لوٹے، چار رنز اضافے کے بعد اکرام اخیل بھی آؤٹ ہوئے جبکہ محمد نبی 202 رنز کے مجموعی اسکور پر پویلین روانہ ہوئے، افغان ٹیم کی آٹھویں وکٹ 210 ، نویں 219 کے مجموعی اسکور پر گری۔

    افغانستان نے مقررہ پچاس اوورز میں 9 وکٹوں کے نقصان پر 227 رنز بنائے، نجیب اللہ زادران اور افغر خان 42 ، 42 رنز بناکر نمایاں بلے باز رہے جبکہ شاہین آفریدی نے شاندار باؤلنگ کرتے ہوئے چار اہم کھلاڑیوں کو آؤٹ کیا۔ عماد وسیم، وہاب ریاض نے 2 ، 2 اور شاداب خان نے ایک کھلاڑی کی وکٹ حاصل کی۔

    پاکستان کی اننگز

    228 رنز ہدف کے تعاقب میں پاکستان نے بیٹنگ شروع کی تو پہلا کھلاڑی بغیر کسی رن پر آؤٹ ہوا، بعد ازاں امام الحق اور بابر اعظم نے محتاط انداز سے بیٹنگ کی اور اسکور کو 72 تک پہنچایا اسی لمحے امام الحق بھی 36 رنز بنا کر آؤٹ ہوئے۔

    پاکستان کی تیسری وکٹ 81 کے مجموعی اسکور پر اُس وقت گری جب بابر اعظم 45 رنز کی اننگز کھیل کر آؤٹ ہوئے، حارث سہیل اور محمد حفیظ نے مجموعی اسکور میں 40 رنز کا اضافہ کیا اسی لمحے پروفیسر بھی 19 رنز کی اننگز کھیل کر پویلین لوٹ گئے، 142 پر حارث سہیل بھی آؤٹ ہوئے۔

    کپتان سرفراز 156 کے مجموعی اسکور پر 22 رنز کی اننگز کھیل کر آؤٹ ہوئے، عماد وسیم اور شاداب خان نے 50 رنز کی پارٹنر شپ قائم کر کے صورت حال بہتر بنائی تو 206 پر شاداب کو بھی افغان باؤلر نے آؤٹ کردیا، نئے آنے والے بیٹسمین وہاب ریاض نے زخمی ہونے کے باوجود شاندار بیٹنگ کی، عماد وسیم نے چوکا لگا کر ٹیم کو فتح دلائی۔

    وہاب ریاض نے 1 چھکے اور 1 چوکے کی مدد سے 15 رنز ناٹ آؤٹ کی قیمتی اننگز کھیلی جبکہ عماد سیم بھی 49 رنز کے ساتھ ناٹ آؤٹ رہے، پاکستان نے 2 گیندوں قبل ہدف حاصل کیا اور افغانستان کو تین وکٹوں سے شکست دی۔ پاکستان نے مسلسل تیسری فتح حاصل کر کے پوائنٹس ٹیبل پر چوتھی پوزیشن حاصل کرلی۔

    ٹاس جیتنے کے بعد افغان کپتان گلبدین نائب کا کہنا تھا کہ ہمارے اسپنرز اچھے ہیں، دوسری اننگز میں فائدہ ہوگا۔ پاکستان اچھی ٹیم ہے، ہم اپنا 100 فیصد دینے کی کوشش کریں گے۔ انہوں نے کہا کہ پاکستان کو بڑا ہدف دینے کی کوشش کریں گے۔

    مزید پڑھیں: لیڈز: ممکنہ شکست پر افغانی شائقین آپے سے باہر، پاکستانی شخص پر حملہ کر دیا

    قومی ٹیم کے کپتان سرفراز احمد کا کہنا تھا کہ ہماری بولنگ اچھا پرفارم کر رہی ہے، ٹیم میں کوئی تبدیلی نہیں کی۔ افغانستان کو کم ٹوٹل پر روکنے کی کوشش کریں گے۔

    میچ سے قبل قومی ٹیم نے لیڈز کرکٹ گراؤنڈ میں بھرپور پریکٹس کی، سیمی فائنل میں رسائی کے لیے پاکستان کو افغانستان اور بنگلہ دیش سے اپنے میچز جیتنے ہوں گے۔

    اسکواڈ

    آج کے میچ کے لیے پاکستان ٹیم میں کوئی تبدیلی نہیں کی گئی۔ ٹیم میں سرفراز احمد (کپتان)، امام الحق، فخر زمان، بابر اعظم، محمد حفیظ، حارث سہیل، عماد وسیم، شاداب خان، محمد عامر، وہاب ریاض اور شاہین آفریدی شامل ہیں۔

    افغان ٹیم میں گلبدین نائب (کپتان)، رحمت شاہ، حشمت اللہ شاہدی، اصغر افغان، سمیع اللہ شنواری، محمد نبی، نجیب اللہ زادران، اکرام علی خیل، راشد خان، حامد حسن اور مجیب الرحمٰن شامل ہیں۔

    وہاب ریاض کے ہاتھ میں انجری

    پاکستان کرکٹ بورڈ (پی سی بی) کی جانب سے کہا گیا ہے کہ وہاب ریاض کے دائیں ہاتھ میں ٹریننگ کے دوران چوٹ لگی ہے جس کی وجہ سے ان کے ہاتھ پر سوجن ہو گئی ہے۔

    پی سی بی کے مطابق وہاب ریاض انگلی پر بینڈج لگا کر کھیل رہے ہیں، میچ کے بعد ان کی انجری کا مزید جائزہ لیا جائے گا۔  پاکستانی کرکٹ ٹیم اپنا آٹھواں میچ آج افغانستان کے خلاف لیڈز کے مقام پر کھیل رہی ہے۔ ٹاپ 4 کا مضبوط امیدوار بننے کے لیے پاکستان کو لیڈز میں کھیلا جانے والا میچ جیتنا لازمی ہے۔

  • لیڈز: ممکنہ شکست پر افغانی شائقین آپے سے باہر، پاکستانی شخص پر حملہ کر دیا

    لیڈز: ممکنہ شکست پر افغانی شائقین آپے سے باہر، پاکستانی شخص پر حملہ کر دیا

    لیڈز: پاکستان اور افغانستان کے درمیان میچ کے دوران ممکنہ شکست پر افغانی شائقین آپے سے باہر ہوگئے، غصے میں بھرے افغانیوں نے خوشیاں مناتے پاکستانی پر دھاوا بول دیا۔

    تفصیلات کے مطابق آئی سی سی ورلڈ کپ 2019 کے لیڈز میں ہونے والے پاکستان اور افغانستان کے میچ کے دوران ناخوشگوار واقعہ پیش آگیا۔ لیڈز کے میدان کے باہر افغانی شائقین پاکستانیوں سے الجھ گئے۔

    میچ میں اپنی ٹیم کی پے در پے گرتی وکٹوں سے افغانی شائقین گرم ہوگئے اور بدتہذیبی کی انتہا کرتے ہوئے ایک پاکستانی شخص پر دھاوا بول دیا۔

    پوائنٹس ٹیبل پر صفر پوائنٹس کے ساتھ آخری نمبر پر موجود ٹیم کے شائقین کو پاکستانیوں کی خوشی برداشت نہیں ہوئی اور ایک شخص کے بدتمیزی کرنے پر اسے روکنے کے بجائے وہاں موجود دیگر افغانی بھی مذکورہ شخص کو مارنے لگے۔

    متعدد افغان شائقین نے پاکستانی پر لاٹھی اور گھونسوں کی بارش کردی، مقامی افراد اور پاکستانیوں کی دخل اندازی پر پاکستانی کو چھوڑا گیا۔

    اس موقع پر پولیس کی بھاری نفری وہاں پہنچ گئی جبکہ اسٹیڈیم کے باہر اسکرینیں بند کرنے کا بھی فیصلہ کرلیا گیا۔

  • ورلڈ کپ 2019: جنوبی افریقہ نے سری لنکا کو 9 وکٹوں سے شکست دے دی

    ورلڈ کپ 2019: جنوبی افریقہ نے سری لنکا کو 9 وکٹوں سے شکست دے دی

    چیسٹرلی اسٹریٹ: ورلڈ کپ 2019 کے 35ویں میچ میں جنوبی افریقہ نے سری لنکا کو باآسانی شکست دے دی، فاف ڈوپلیسی اور ہاشم آملہ نے ناقابل شکست نصف سنچریاں اسکور کیں۔

    تفصیلات کے مطابق ورلڈ کپ 2019 کے اہم میچ میں جنوبی افریقہ کو 9 وکٹوں سے شکست دے کر ورلڈ کپ سے باہر کردیا، سری لنکا کی جانب سے دیا جانے والا 204 رنز کا ہدف جنوبی افریقہ نے 37.2 اوورز میں ایک وکٹ کے نقصان پر حاصل کرلیا۔

    کوئن ٹن ڈی کاک 15 رنز بنا کر لیستھ ملنگا کی گیند پر بولڈ ہوئے جس کے بعد سری لنکن بولرز جنوبی افریقہ کے سامنے بے بس نظر آئے اور کپتان فاف ڈوپلیسی نے 96 اور ہاشم آملہ نے 80 رنز کی ناقابل شکست اننگز کھیل کر ٹیم کی جیت میں اہم کردار ادا کیا۔

    سری لنکا کے لیستھ ملنگا صرف واحد وکٹ حاصل کرنے میں کامیاب ہوسکے۔

    جنوبی افریقہ کے ڈیوئن پریٹوریز کو تین وکٹیں حاصل کرنے پر میچ کا بہترین کھلاڑی قرار دیا گیا۔

    اس سے قبل چیسٹرلی اسٹریٹ میں کھیلے جانے والے میچ میں سری لنکا کی ٹیم 47 اوورز میں 203 رنز پر ڈھیر ہوگئی اور جنوبی افریقہ کو جیت کے لیے 204 رنز کا ہدف دیا، پریٹوریز نے تین کھلاڑیوں کو پویلین کی راہ دکھائی۔

    جنوبی افریقہ کے کپتان فاف ڈوپلیسی نے ٹاس جیت کر پہلے فیلڈنگ کا فیصلہ کیا جو درست ثابت ہوا اور اننگز شروع ہوتے ہی ربادا کی پہلی گیند پر سری لنکن کپتان کرونارتنے بغیر کوئی رن بنائے پویلین لوٹ گئے۔

    سری لنکا کی دوسری وکٹ 67 رنز پر گری جب کسل پریرا 30 رنز بنا کر پویلین لوٹ گئے، اویشکا فرنینڈو بھی 30 رنز پر ہمت ہار گئے، مینڈس 23 رنز بنا کر پریٹوریز کا نشانہ بنے۔

    اینجلیو میتھیوز صرف 11 رنز بنا کر کرس مورس کی گیند پر بولڈ ہوئے، ڈی سلوا کو ڈومینی نے پویلین روانہ کیا، جیون مینڈس 18 رنز بنا کر مورس کو وکٹ دے بیٹھے۔

    تھسارا پریرا بھی ٹیم کے اسکور میں خاطر خواہ اضافہ نہ کرسکے اور 21 رنز بنا کر فلک وائیو کی گیند پر آؤٹ ہوئے۔

    جنوبی افریقہ کے پریٹوریزاور کرس مورس نے تین کھلاڑیوں کو آؤٹ کیا، جبکہ ربادا، جے پی ڈومینی اور فلک وائیو نے ایک، ایک وکٹ حاصل کی۔

     آئی سی سی ورلڈ کپ کے 35 ویں میچ میں آج سری لنکا اور جنوبی افریقہ کی ٹیمیں آمنے سامنے ہیں۔

    سری لنکا کی ٹیم میگا ایونٹ میں اب تک 6 میچز کھیل چکی ہے جس میں سے 2 میچز میں انہیں کامیابی حاصل ہوئی، 2 میں ناکامی کا سامنا کرنا پڑا اور 2 میچز بارش کی نذر ہوگئے۔ اس طرح سری لنکن ٹیم 6 پوائنٹس کے ساتھ ٹیبل پر ساتویں نمبر پر ہے۔

    دوسری جانب جنوبی افریقہ کی ٹیم اب تک 7 میچز کھیل چکی ہے جس میں سے صرف 1 میچ جیتنے اور ایک 1 بارش کی نذر ہونے کے باعث پوائنٹس ٹیبل پر 3 پوائنٹس کے ساتھ نویں نمبر پر ہے۔

    اسکواڈ

    آج کے میچ کے لیے سری لنکا کی ٹیم میں دیموت کرونارتنے (کپتان)، کشال پریرا، ایوشکا فرنینڈو، کشال مینڈس، اینجلو میتھیوز، جیون مینڈس، دھننجایا ڈی سلوا، تشارا پریرا، اسورو ادانا، لستھ ملنگا، اور سرنگا لکمل شامل ہیں۔

    جنوبی افریقہ کی ٹیم میں فاف ڈوپلیسی (کپتان)، کوانٹن ڈی کوک، ہاشم آملہ، ایڈن مارکرم، ریسی ون، جے پی ڈومنی، اینڈل پھلکاویو، ڈوائن پریٹورس، کرس مورس، کگسو ربادا اور عمران طاہر شامل ہیں۔

  • ورلڈ کپ 2019: بابر اعظم کی شاندار سنچری، شاہینوں نے ناقابل شکست کیویز کو جھپٹ لیا

    ورلڈ کپ 2019: بابر اعظم کی شاندار سنچری، شاہینوں نے ناقابل شکست کیویز کو جھپٹ لیا

    برمنگھم: کرکٹ ورلڈ کپ 2019 کے 33ویں میچ میں شاہینوں نے ناقابل شکست کیویز کو 6 وکٹوں سے شکست دے دی، بابر اعظم کو شاندار سنچری اسکور کرنے پر مین آف دی میچ کا ایوارڈ دیا گیا۔

    تفصیلات کے مطابق ایجبستن میں کھیلے جانے والے میچ میں نیوزی لینڈ کی جانب سے دئیے جانے والے 238 رنز کا ہدف قومی ٹیم نے 4 وکٹوں کے نقصان پر 49.1 اوورز میں حاصل کرلیا، بابر اعظم نے شاندار سنچری اسکور کی۔

    پاکستان نے اننگز کا آغاز کیا تو اوپنر فخر زمان 9 رنز بنا کر بولٹ کا نشانہ بنے، امام الحق 19 رنز بنا کر فرگوسن کی باؤنسر پر گپٹل کو کیچ دے بیٹھے۔

    سینئر آل راؤنڈر محمد حفیظ ورلڈ کپ میں تیسری مرتبہ پارٹ ٹائم بولر کو وکٹ دے بیٹھے اور 32 رنز بنا کر کین ولیم سن کی گیند پر آؤٹ ہوئے۔

    بابر اعظم نے ناقابل شکست 101 رنز کی اننگز کھیلی، حارث سہیل 68 رنز بنا کر رن آؤٹ ہوئے، کپتان سرفراز احمد نے وننگ شاٹ کھیلتے ہوئے 5 رنز بنائے۔

    نیوزی لینڈ کے ٹرینٹ بولٹ، لوکی فرگوسن اور کپتان کین ولیم سن نے ایک، ایک وکٹ حاصل کی۔

    پاکستان کی ورلڈ کپ میں 7 میچز کھیلے ہیں جن میں تین میں کامیابی تین میں ناکامی اور ایک میچ بارش کی نذر ہوا ہے، گرین شرٹس کے 7 پوائنٹس ہیں۔

    قومی ٹیم ورلڈ کپ میں اپنا اگلا میچ 29 جون بروز ہفتے کو افغانستان کے خلاف کھیلے گی۔

    اس سے قبل ایجبسٹن میں کھیلے جانے والے میچ میں نیوزی لینڈ نے مقررہ اوورز میں 6 وکٹوں کے نقصان پر 237 رنز بنائے اور پاکستان کو جیت کے لیے 238 رنز کا ہدف دیا تھا، نیشم اور گرینڈ ہوم نے نصف سنچریاں اسکور کیں۔

    کین ولیم سن نے ٹاس جیت کر پہلے بیٹنگ کا فیصلہ کیا جو درست ثابت نہیں ہوا اور ابتدائی دو وکٹیں 24 رنز پر گر گئیں، نیوزی لینڈ کی آدھی ٹیم 83 رنز پر پویلین لوٹ چکی تھی۔

    نیشم اور گرینڈ ہوم نے نیوزی لینڈ کی بیٹنگ کا سہارا دیا، جمی نیشم نے 97 رنز کی ناقابل شکست اننگز کھیلی اور کولن ڈی گرینڈ ہوم نے 64 رنز بنا کر آؤٹ ہوئے۔

    مارٹن گپٹل کو محمد عامر نے اپنے ہی اوور میں پویلین بھیج دیا، کولن منرو 12، روس ٹیلر 3 اور ٹام لیتھم 1 رن بنا کر شاہین شاہ آفریدی کا نشانہ بنے۔

    کیوی کپتان کین ولیم سن کو لیگ اسپنر شاداب خان 41 رنز پر سرفراز احمد کے ہاتھوں کیچ آؤٹ کرایا۔

    شاہین شاہ آفریدی نے تین کھلاڑیوں خو پویلین کی راہ دکھائی، شاداب خان اور محمد عامر نے ایک، ایک وکٹ حاصل کی۔

    اس سے قبل ورلڈ کپ 2019 میں آج پاکستان اور نیوزی لینڈ برمنگھم میں آمنے سامنے ہیں۔ بارش کے باعث ٹاس تاخیر کا شکار ہوا۔ 3 بجے ہونے والے ٹاس میں نیوزی لینڈ نے پاکستان کے خلاف ٹاس جیت کر بیٹنگ کا فیصلہ کیا ہے۔

    نیوزی لینڈ کے کپتان کین ولیمسن کا کہنا تھا کہ اچھی بیٹنگ کرنے کی کوشش کریں گے، پچ اچھی لگ رہی ہے، کنڈیشن مختلف ہیں۔ پاکستانی ٹیم اچھی ہے، میچ میں شراکت بنانا اہم ہے۔

    انہوں نے کہا کہ اپنی کارکردگی کو برقرار رکھنے کی کوشش کروں گا۔

    قومی کپتان سرفراز احمد نے کہا کہ کیچ پکڑنے اور فیلڈنگ کے لیے بہت محنت کی ہے۔ ہم بھی پہلے بیٹنگ کرنا چاہتے تھے، نیوزی لینڈ کو کم رنز پر روکیں گے اور ہدف کا تعاقب کریں گے۔ جنوبی افریقہ کے خلاف ٹیم پرفارمنس نے جتوایا۔

    سرفراز احمد کا کہنا تھا کہ پاکستان کی ٹیم کچھ بھی کر سکتی ہے۔ امید ہے اب تمام میچز جیتیں اور سیمی فائنل میں جگہ بنائیں۔ ہمارے بولرز اچھی فارم میں ہیں، امید ہے اچھا کھیلیں گے۔

    اسکواڈ

    آج کے میچ کے لیے قومی ٹیم میں سرفراز احمد (کپتان)، امام الحق، فخر زمان، بابر اعظم، محمد حفیظ، حارث سہیل، عماد وسیم، وہاب ریاض، شاداب خان، محمد عامر اور شاہین آفریدی شامل ہیں۔

    نیوزی لینڈ کی ٹیم میں کین ولیمسن (کپتان)، مارٹن گپٹل، کولن منرو، روس ٹیلر، ٹام لیتھم، جیمز نیشام، کولن گرینڈ ہوم، مچل سینٹنر، میٹ ہنر، لوکی فرگوسن اور ٹرینٹ بولٹ شامل ہیں۔

    اب تک پاکستان ٹیم نے ورلڈ کپ میں 6 میچز کھیلے ہیں جس میں سے 2 میچز جیتے، 3 میں شکست ہوئی اور ایک میچ بارش کی نذر ہوا۔ پوائنٹس ٹیبل پر قومی ٹیم کے 5 پوائنٹس ہیں۔

    دوسری جانب نیوزی لینڈ کی ٹیم میگا ایونٹ کی ناقابل شکست ٹیم ہے اور اس نے پوائنٹس ٹیبل پر 11 پوائنٹس کے ساتھ دوسری پوزیشن حاصل کر رکھی ہے۔

    قومی ٹیم کے لیے یہ میچ نہایت اہم ہے، ورلڈ کپ کا سیمی فائنل کھیلنا ہے تو آج نیوزی لینڈ کو چت کرنا ہوگا۔ تجزیہ کاروں کے مطابق میگا ایونٹ کی ناقابل شکست ٹیم کو ہرانا ہے تو کیوی کپتان ولیمسن اور تجربہ کار بلے باز راس ٹیلر کو جلدی آؤٹ کرنا ہوگا۔

    کیوی کپتان کین ولیمسن ایونٹ میں 187 کی اوسط سے 373 رنز بنا چکے ہیں۔

    اس سے قبل دونوں ٹیمیں ورلڈ کپ میں 8 بار مدمقابل آچکی ہیں جن میں سے پاکستان نے 6 اور نیوزی لینڈ نے صرف 2 میچز میں کامیابی حاصل کی ہے۔ نیوزی لینڈ کے بعد قومی ٹیم کو بنگلہ دیش اور افغانستان کا چیلنج درپیش ہوگا۔

  • ورلڈ کپ 2019: انگلینڈ‌ کو 64 رنز سے شکست، کینگروز کی سیمی فائنل میں‌ رسائی

    ورلڈ کپ 2019: انگلینڈ‌ کو 64 رنز سے شکست، کینگروز کی سیمی فائنل میں‌ رسائی

    لندن: ورلڈ کپ 2019 کے 32ویں میچ میں آسٹریلیا نے میزبان انگلینڈ کو 64 رنز سے شکست دے دی، کپتان ایرون فنچ کو شاندار سنچری پر میچ کا بہترین کھلاڑی قرار دیا گیا۔

    تفصیلات کے مطابق لارڈز میں کھیلے جانے والے میچ میں آسٹریلیا کی جانب سے دئیے جانے والے 286 رنز کے تعاقب میں انگلش ٹیم 9 221 رنز پر ڈھیر ہوگئی، بین اسٹوکس کے 89 رنز بھی انگلینڈ کو شکست سے بچاسکے۔

    ہدف کے تعاقب میں انگلش ٹیم کی ابتدائی دو وکٹیں جلد گر گئیں، جیمز ونس بغیر کوئی رن بنائے پویلین لوٹ گئے جبکہ جو روٹ کو مچل اسٹارک نے 8 رنز پر پویلین بھیج دیا۔

    جونی بریسٹو نے 28 رنز کی اننگز کھیلی، کپتان اوئن مورگن صرف 4 رنز بنا کر آؤٹ ہوئے، بٹلر 25 اور معین علی 6 رنز پر ہمت ہار گئے۔

    بین اسٹوکس کی 89 رنز کی اننگز رائیگاں گئی، کرس ووکس 26 رنز بنا کر آؤٹ ہوئے، عادل رشید 25 رنزبنا کر ناقابل شکست رہے.

    آسٹریلیا کے بھینڈروف نے 5 کھلاڑیوں کو پویلین کی راہ دکھائی، مچل اسٹارک نے بھی تین کھلاڑیوں کو آؤٹ کیا، مارکس اسٹونس کے حصے میں ایک وکٹ آئی۔

    اس سے قبل لارڈز میں کھیلے جانے والے میچ میں کینگروز نے مقررہ اوورز میں 7 وکٹوں کے نقصان پر 285 رنز بنائے اور انگلش ٹیم کو جیت کے لیے 286 رنز کا ہدف دیا تھا، کرس ووکس نے دو وکٹیں حاصل کیں۔

    آسٹریلوی اوپنر نے اننگز کا آغاز کرتے ہوئے شاندار آغاز فراہم کیا، کینگروز کی پہلی وکٹ 123 رنز پر گری جب ڈیوڈ وارنر 53 رنز بنا کر معین علی کی گیند پر جو روٹ کو کیچ دے بیٹھے۔

    عثمان خواجہ 23 رنز بنا کر بین اسٹوکس کا شکار بنے، گلین میکسویل آج پھر ناکام ثابت ہوئے اور صرف 12 رنز بنا کر پویلین لوٹ گئے، اسٹیو اسمتھ نے 38 رنز کی اننگز کھیلی۔

    مارک اسٹونس 8 رنز بنا کر رن آؤٹ ہوئے، کینگروز کپتان ایرون نچ نے شاندار سنچری اسکور کی، پیٹ کمنز ایک رن بنا کر ووکس کا شکار بنے۔

    وکٹ کیپر بلے باز الیکس کیری 38 اور فاسٹ بولر مچل اسٹارک 4 رنز بنا کر ناٹ آؤٹ رہے۔

    انگلینڈ کے کرس ووکس نے دو کھلاڑیوں کو پویلین کی راہ دکھائی، جوفرا آرچر، مارک ووڈ، بین اسٹوکس اور معین علی نے ایک، ایک وکٹ حاصل کی۔

    اس سے قبل ورلڈ کپ 2019 میں آج انگلینڈ اور آسٹریلیا کی ٹیمیں لارڈز کے میدان میں آمنے سامنے ہیں۔ لارڈز میں بارش کی پیشگوئی کی گئی ہے اور میچ بارش کی نذر ہونے کا امکان ہے۔

    اگر میچ بارش کی نذر ہوگیا تو اس کا فائدہ پاکستان کو ہوگا۔ بارش کے باعث میچ نہ ہونے کی صورت میں انگلینڈ کو اپنے بقیہ دونوں میچز جیتنا ہوں گے ورنہ اس کے سیمی فائنل تک پہنچنے کے امکانات معدوم ہوسکتے ہیں۔

    آسٹریلیا ایونٹ میں اب تک 6 میچز کھیل چکی ہے اور ایک میچ میں شکست کے بعد گینگروز 10 پوائنٹس کے ساتھ پوائنٹ اسکورننگ ٹیبل پر دوسرے نمبر پر ہیں۔

    میزبان انگلینڈ نے میگا ایونٹ میں اب تک 6 میچز کھیلے ہیں اور 2 میچز میں شکست کے بعد 8 پوائنٹس کے ساتھ ٹیبل پر چوتھے نمبر پر موجود ہے۔

    اسکواڈ

    آج کے میچ کے لیے انگلینڈ کی ٹیم میں آئن مورگن (کپتان)، جونی برسٹو، جیمز ونس، جو روٹ، بین اسٹوکس، جوز بٹلر، معین علی، کرس ووکس، عادل رشید، جوفرا آرچر اور مارک ووڈ شامل ہیں۔

    آسٹریلوی ٹیم میں ایرون فنچ (کپتان)، ڈیوڈ وارنر، عثمان خواجہ، اسٹیون اسمتھ، گلین میکس ویل، الکس کرے، جیسن بہرنڈورف، پیٹ کمنز، مچل اسٹارک اور نیتھن لیون شامل ہیں۔

  • ورلڈ کپ 2019: بنگلہ دیش کی تاریخی فتح، ویسٹ انڈیزکو 7 وکٹوں سے ہرادیا

    ورلڈ کپ 2019: بنگلہ دیش کی تاریخی فتح، ویسٹ انڈیزکو 7 وکٹوں سے ہرادیا

    ٹاؤنٹن: ورلڈ کپ 2019 کے 23ویں میچ میں بنگلہ دیش نے ویسٹ انڈیز کو 7 وکٹوں سے شکست دے دی، شکیب الحسن کو شاندار سنچری اسکور کرنے پر میچ کا بہترین کھلاڑی قرار دیا گیا۔

    تفصیلات کے مطابق ٹاؤنٹن میں کھیلے جانے والے میچ میں ویسٹ انڈیز کی جانب سے دیا جانے والا 322 رنز کا ہدف بنگلہ دیش نے 41.3 اوورز میں 3 وکٹوں کے نقصان پر حاصل کرلیا، شکیب الحسن نے شاندار سنچری اور لٹن داس نے نصف سنچری اسکور کی۔

    بنگلہ دیشی اوپنرز نے جارحانہ انداز اپنایا اور ٹیم کو 51 رنز کا آغاز فراہم کیا، سومیا سرکار 29 رنز بنا کر آؤٹ ہوئے، تمیم اقبال 48 رنز کی اننگز کھیل کر رن آؤٹ ہوئے۔

    مشفیق الرحیم ایک رن بنا کر تھامس کا شکار بنے، 133 رنز پر تین وکٹیں گرنے کے بعد شکیب الحسن اور لٹن داس کے درمیان عمدہ شراکت داری قائم ہوئی جو بنگلہ دیش کی فتح تک قائم رہی۔

    شکیب الحسن 124 رنز بنا کر ناٹ آؤٹ رہے جبکہ لٹن داس نے 69 گیندوں پر 94 رنز کی اننگز کھیلی، ان کی اننگز میں 4 چھکے اور 8 چوکے شامل تھے۔

    ویسٹ انڈین بولر بنگلہ دیشی بلے بازوں کے آگے بے بس نظر آئے، آندرے رسل اور تھامس کے حصے میں ایک، ایک وکٹ آسکی۔

    واضح رہے کہ بنگلہ دیش کی ورلڈ کپ 2019 میں یہ دوسری کامیابی ہے اس سے قبل بنگلہ دیش نے جنوبی افریقا کو شکست دی تھی۔

    اس سے قبل ٹاؤنٹن میں کھیلے جانے والے میچ میں ویسٹ نے انڈیز نے مقررہ اوورز میں 8 وکٹوں کے نقصان پر 321 رنز بنائے اور بنگلہ دیش کو جیت کے لیے 322 رنز کا ہدف دیا، محمد سیف الدین اور مستفیض الرحمان نے تین، تین وکٹیں حاصل کیں۔

    کرس گیل کو بغیر کوئی رن بنائے پویلین بھیجنے کے باوجود بنگلہ دیشی بولرز ویسٹ انڈیز کو بڑا ہدف دینے سے نہیں روک سکے، ایون لوئس نے 70 اور شائے ہوپ نے 96 رنز کی شاندار اننگز کھیلی۔

    پورن 25 اور شیمرون ہیٹ میئر نے 50 رنز بنائے، آندرے رسل بھی بغیر کوئی رن بنائے پویلین لوٹ گئے، کپتان جیسن ہولڈر نے 15 گیندوں پر 33 رنز کی برق رفتار اننگز کھیلی، ڈیرن براؤو 19 رنز بناسکے۔

    بنگلہ دیش کے محمد سیف الدین اور مستفیض الرحمان نے تین، تین کھلاڑیوں کو پویلین کی راہ دکھائی، شکیب الحسن نے دو وکٹیں حاصل کیں۔

    اس سے قبل  آئی سی سی ورلڈ کپ 2019 میں آج بنگلہ دیش اور ویسٹ انڈیز کی ٹیمیں مدمقابل ہیں، بنگلہ دیش نے ٹاس جیت کر فیلڈنگ کا فیصلہ کیا ہے۔

    پوائنٹس ٹیبل پر دونوں ٹیمیں یکساں پوزیشن پر ہیں۔ دونوں ٹیموں نے 4 میچز کھیلے جن میں سے صرف ایک میں فتح اور 2 میں شکست کھائی۔ دونوں ٹیموں کا ایک میچ منسوخ ہوا جس کے بعد دونوں ٹیموں کے پوائنٹس کی تعداد 3 ہے۔

    یاد رہے کہ رواں برس ہونے والے ورلڈ کپ کو بارش شدید متاثر کر رہی ہے۔ ورلڈ کپ 2019 سب سے زیادہ میچز منسوخ ہونے والا ورلڈ کپ بن گیا ہے۔

    بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔ اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جبکہ مزید میچز کی منسوخی کا بھی خدشہ ہے۔

    رواں برس ہونے والے آئی سی سی ورلڈ کپ کے ایونٹ میں 48 میچز کھیلے جائیں گے۔ فائنل اور سیمی فائنل سے قبل تمام ٹیمیں 9، 9 میچز کھیلیں گی جن میں سے 4 ٹیمیں سیمی فائنل میں جگہ بنائیں گی۔

    آئی سی سی ورلڈ کپ 2019 کا فائنل 14 جولائی کو کھیلا جائے گا۔

  • ورلڈ کپ 2019: انگلینڈ نے ویسٹ انڈیز کو 8 وکٹوں‌ سے باآسانی شکست دے دی

    ورلڈ کپ 2019: انگلینڈ نے ویسٹ انڈیز کو 8 وکٹوں‌ سے باآسانی شکست دے دی

    ساؤتھ ہمپٹن: ورلڈ کپ 2019 کے 19ویں میچ میں انگلینڈ نے ویسٹ انڈیز کو باآسانی 8 وکٹوں سے شکست دے دی، جو روٹ نے ناقابل شکست سنچری اسکور کی۔

    تفصیلات کے مطابق ساؤتھ ہمپٹن میں کھیلے جانے والے میچ میں انگلش ٹیم نے ویسٹ انڈیز کی جانب سے دیا جانے والا 213 رنز کا ہدف 33.1 اوورز میں 2 وکٹوں کے نقصان پر حاصل کرلیا۔

    ہدف کے تعاقب میں انگلینڈ کے اوپنرز نے 95 رنز کا عمدہ آغاز فراہم کیا، جونی بریسٹو 45 رنز بنا کر آؤٹ ہوئے۔

    جو روٹ نے ناقابل شکست 100 رنز کی اننگز کھیلی، کرس ووکس 40 رنز بنا کر آؤٹ ہوئے، فاسٹ بولر گیبرئیل کے علاوہ کوئی ویسٹ انڈین بولر وکٹ حاصل نہ کرسکا۔

    اس سے قبل ساؤتھ ہمپٹن میں کھیلے جانے والے میچ میں ویسٹ انڈیز کی ٹیم 44.4 اوورز میں 212 رنز پر ڈھیر ہوگئی اور انگلینڈ کو جیت کے لیے 213 رنز کا ہدف دیا، جوفرا آرچر اور مارک ووڈ نے تین، تین وکٹیں حاصل کیں۔

    ویسٹ انڈیز کی ٹیم ابتدا سے ہی مشکلات کا شکار رہی، ایون لوئس 4 رنز کے مجموعی اسکور پر 2 رنز بنا کر پویلین لوٹ گئے، 36 رنز بنا کر کرس گیل بھی پلنکٹ کا شکار بنے۔

    شائے ہوپ 11 رنز بنا کر آؤٹ ہوئے، نکولس پورن نے 63 رنز کی شاندار اننگز کھیلی انہیں جوفرا آرچر نے بٹلر کے ہاتھوں کیچ آؤٹ کرایا، ہیٹ میئر 39 رنز بنا کر جو روٹ کا نشانہ بنے۔

    آندرے رسل تیز کھیلنے کے چکر میں وکٹ گنوا بیٹھے، رسل نے 16 گیندوں پر 21 رنز بنائے، بریٹ ویتھ 14 رنز بنا کر پویلین لوٹ گئے، کوٹریل اور گیبرئیل بغیر کوئی رن بنائے آؤٹ ہوئے۔

    انگلینڈ کے جوفرا آرچر اور مارک ووڈ نے تین، تین کھلاڑیوں کو پویلین کی راہ دکھائی، جو روٹ نے دو وکٹیں حاصل کیں، کرس ووکس اور لیام پلنکٹ کے حصے میں ایک، ایک وکٹ آئی۔

    اس سے قبل آئی سی سی ورلڈ کپ 2019 میں آج انگلینڈ اور ویسٹ انڈیز ساؤتھ ہمپٹن کے روز باؤل میدان میں مدمقابل ہیں۔ انگلینڈ نے ویسٹ انڈیز کے خلاف ٹاس جیت کر فیلڈنگ کا فیصلہ کیا ہے۔

    ورلڈ کپ 2019 میں ویسٹ انڈیز اب تک 3 میچز کھیل چکا ہے جس میں سے اسے ایک میں جیت اور ایک میں شکست ہوئی جبکہ ایک میچ بارش کی نذر ہوا۔ انگلینڈ نے 3 میچز کھیلے جن میں سے 2 میں کامیابی اور ایک میں اسے ناکامی کا سامنا کرنا پڑا۔

    پوائنٹ اسکورنگ ٹیبل پر اس وقت انگلینڈ 4 پوائنٹس کے ساتھ چوتھے جبکہ ویسٹ انڈیز 3 پوائنٹس کے ساتھ چھٹے نمبر پر ہے۔

    یاد رہے کہ رواں برس ہونے والے ورلڈ کپ کو بارش شدید متاثر کر رہی ہے۔ ورلڈ کپ 2019 سب سے زیادہ میچز منسوخ ہونے والا ورلڈ کپ بن گیا ہے۔

    بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔ اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جبکہ مزید میچز کی منسوخی کا بھی خدشہ ہے۔

    گزشتہ روز بھارت اور نیوزی لینڈ کا میچ بھی بارش کی نذر ہوگیا اور اس ورلڈ کپ کا یہ چوتھا میچ ہے جو بارش کی وجہ سے منسوخ ہوا۔

  • ورلڈ کپ 2019: بھارت اور نیوزی لینڈ کا میچ بھی بارش کی نذر

    ورلڈ کپ 2019: بھارت اور نیوزی لینڈ کا میچ بھی بارش کی نذر

    ناٹنگھم: ورلڈ کپ 2019 میں آج کھیلا جانے والا بھارت اور نیوزی لینڈ کا میچ بارش کے باعث منسوخ کردیا گیا۔

    تفصیلات کے مطابق ناٹنگھم میں بادل پھر برس پڑے، بھارت اور نیوزی لینڈ کا میچ بھی منسوخ کردیا گیا، بارش کے باعث ٹاس بھی نہیں ہوسکا، دونوں ٹیموں کو ایک ایک پوائنٹ دے دیا گیا۔

    نیوزی لینڈ کی پوائنٹس ٹیبل پر پہلی پوزیشن برقرار ہے، آسٹریلیا 6 پوائنٹس کے ساتھ دوسرے نمبر پر ہے جبکہ بھارتی ٹیم 5 پوائنٹس کے ساتھ تیسرے نمبر پر براجمان ہے۔

    واضح رہے کہ بارش کے باعث منسوخ ہونے والا یہ چوتھا میچ ہے، اس سے قبل پاکستان اور سری لنکا، بنگلہ دیش بمقابلہ سری لنکا، جنوبی افریقہ اور ویسٹ انڈیز کا میچ بھی بارش کی نذر ہوچکا ہے۔

    اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جب کہ مزید میچز کی منسوخی کا بھی خدشہ ہے.

    سوشل میڈیا پر بارش کو آئی سی سی ورلڈکپ کی گیارہویں ٹیم قرار دیا جارہا ہے، شائقین کو تشویش ہے کہ کہیں یہی ٹیم ورلڈ ٹرافی اپنے نام نہ کر لے.

    بارش سے ٹیموں کو نقصان ہورہا ہے، ڈک ورتھ لوئس قانون سے کمزورٹیم بھی فائدہ اٹھا سکتی ہے۔

  • ورلڈ کپ2019: آسٹریلیا کے ہاتھوں پاکستان کو 41 رنز سے شکست

    ورلڈ کپ2019: آسٹریلیا کے ہاتھوں پاکستان کو 41 رنز سے شکست

    ٹاؤنٹن: ورلڈ کپ2019 کے اہم میچ میں آسٹریلیا کے ہاتھوں پاکستان کو  41 رنز سے شکست کا سامنا کرنا پڑا۔

    تفصیلات کے مطابق  308 رنز کا تعاقب کرنے والی پاکستانی ٹیم کو میگا ایونٹ میں دوسری بار شکست کی ہزیمت اٹھانے پڑی۔فاسٹ بولر محمد عامر کی پانچ وکٹیں ضایع گئیں۔

    ٹاؤنٹن کے میدان میں پاکستانی ٹیم308رنز کےہدف کےتعاقب میں 266رنز پر آؤٹ ہوگئی۔ صرف امام الحق نے نصف سنچری اسکور کی۔ فخر  زمان  اور شعیب ملک صفر پر آؤٹ ہوگئے۔ آصف علی  بھی بری طرح ناکام ہوئے۔ محمد حفیظ، سرفراز احمد، حسن علی اور وہاب ریاض کی مختصر، مگر ذمے داری اننگز  رائیگاں گئیں۔

    قبل ازیں محمد عامر کی شان دار بولنگ کے طفیل پاکستان نے دفاعی چیمپین آسٹریلیا کو  307  تک محدود کر  دیا تھا۔

    پاکستان نے ٹاس جیت کر  بولنگ کا فیصلہ کیا۔ آسٹریلیا نے اپنی اننگز کا اغاز اعتماد کے ساتھ کیا، سوائے عامر کے دیگر بولرز رنگ نہیں جما سکے۔

    محمد آصف نے تین کیچز ڈراپ کیے اور یوں لگانے لگا کہ آسٹریلیا بہ آسانی 350 کا سنگ میل عبور کر جائے گا۔ البتہ پھر پاکستان نے کم بیک کیا۔

    ڈیوڈ وارنر 107 اور ارون فنچ 82ر نز بناکر نمایاں رہے، محمدعامر نے10 اوورز میں 30رنز دے کر 5کھلاڑیوں کوآؤٹ کی۔

    میچ کے آغاز سے قبل سرفراز احمد نے کہا تھا کہ پچ گرین لگ رہی ہے، فائدہ اٹھانے کی کوشش کریں گے، پریکٹس میں کافی محنت کی ہے۔

    انہوں نے کہا کہ پاکستانی ٹیم میچ میں سیاہ پٹی پہن کر اترے گی، پاکستانی ٹیم امپائر ریاض الدین کو خراج عقیدت پیش کرے گی۔

    آسٹریلوی کپتان ایرون فنچ کا کہنا ہے کہ پاکستانی ٹیم اچھی ہے، امید ہے اچھا مقابلہ ہوگا۔ کوشش کریں گے پاکستان ٹیم کو بڑا ہدف دیں۔ ’ہم بھی ٹاس جیت جاتے تو پہلے بولنگ کرتے‘۔

    خیال رہے کہ رواں برس ہونے والے ورلڈ کپ کو بارش نے شدید متاثر کیا ہے، یکے بعد دیگرے میچز بارش کی زد میں آرہے ہیں۔ اس سے قبل پاکستان اور سری لنکا کا میچ بھی بارش کے باعث منسوخ ہوچکا ہے جبکہ بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔

    اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جبکہ مزید میچز کی منسوخی کا بھی خدشہ ہے۔

    آج کے میچ کے لیے قومی اسکواڈ میں سرفراز احمد (کپتان)، امام الحق، فخر زمان، بابر اعظم، محمد حفیظ، شعیب ملک، آصف علی، وہاب ریاض، حسن علی، شاہین آفریدی اور محمد عامر شمال تھے۔

    آسٹریلیا کی ٹیم میں ایرون فنچ (کپتان)، ڈیوڈ وارنر، عثمان خواجہ، اسٹیون اسمتھ، شان مارش، گلن میکس ویل، ایلکس کرے، پیٹ کمنز، مچل اسٹارک اور کین اینڈرسن شامل تھے۔

  • ورلڈ کپ 2019: بنگلہ دیش اور سری لنکا کا میچ بھی بارش کی نذر

    ورلڈ کپ 2019: بنگلہ دیش اور سری لنکا کا میچ بھی بارش کی نذر

    برسٹل: ورلڈ کپ 2019 میں آج کھیلا جانے والا بنگلہ دیش اور سری لنکا کا میچ بھی بارش کی باعث منسوخ کردیا گیا۔

    تفصیلات کے مطابق برسٹل میں بادل پھر برس پڑے، بنگلہ دیش اور سری لنکا کا میچ بھی منسوخ ہوگیا، بارش کے باعث ٹاس بھی نہ ہوسکا، دونوں ٹیموں کو ایک، ایک پوائنٹ دے دیا گیا۔

    ورلڈ کپ 2019 سب سے زیادہ میچز منسوخ ہونے والا ورلڈ کپ بن گیا۔

    بارش سے متاثر ہونے والا یہ پہلا میچ نہیں، رواں برس ہونے والے ورلڈ کپ کو بارش شدید متاثر کر رہی ہے۔ یکے بعد دیگرے میچز بارش کی زد میں آرہے ہیں۔

    اس سے قبل پاکستان، سری لنکا اور جنوبی افریقہ، ویسٹ انڈیز کا میچ بھی بارش کے باعث منسوخ ہوچکا ہے جبکہ بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔

    اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جب کہ مزید میچز کی منسوخی کا بھی خدشہ ہے.

    سوشل میڈیا پر بارش کو آئی سی سی ورلڈکپ کی گیارہویں ٹیم قرار دیا جارہا ہے، شائقین کو تشویش ہے کہ کہیں یہی ٹیم ورلڈ ٹرافی اپنے نام نہ کر لے.

    بارش سے ٹیموں کو نقصان ہورہا ہے، ڈک ورتھ لوئس قانون سے کمزورٹیم بھی فائدہ اٹھا رہی ہے۔