سابق کرکٹر اور چیف سلیکٹر عامر سہیل نے اگلے میچوں میں اسامہ میر کو کھلانے کا مشورہ دیتے ہوئے امام کو بھی ڈراپ کرنے کی تجویز دی ہے۔
عامر سہیل نے کہا کہ اگر اسامہ میر اس قابل ہی نہیں تھا تو وہ ٹیم میں کیوں ہے آپ انھیں ورلڈکپ میں لے کر کیوں گئے۔ بھارتی ٹیم نے ایشون کو کافی عرصے بعد ٹیم کا حصہ بنایا، وہ آیا اور اس نے کارکردگی بھی دکھائی۔
سابق اوپنر نے کہا کہ پاکستان ٹیم میں اگر کوئی موجود ہے تو ایسا نہیں ہے کہ آپ انھیں اہم میچ کھلا کر چانس نہیں لے سکتے، تو پھر ایسا کھلاڑی ٹیم میں نہیں ہونا چاہیے پھر تو سلیکشن ہی غلط ہے۔ آپ کو دلیری دکھانی پڑے گی اگر آپ رسک نہیں لیں گے تو آپ انعام بھی نہیں ملے گا۔
انھوں نے ٹیم میں تبدیلی کا طریقہ بتاتے ہوئے کہا کہ امام کو ڈراپ کردیں اور بابر اعظم خود اوپن کرلیں اور اسامہ کو ٹیم میں لے آئیں۔ آپ کے پاس پھر بھی ساتویں اور آٹھویں نمبر تک بیٹنگ ہوگی۔
اگلی ٹیم کی وننگ اسٹریک توڑنی ہے تو دلیری کے ساتھ ہوگا، اگر آپ دفاعی حکمت عملی اپنائیں گے تو وہ شاید کام نہ کرے، ہوسکتا ہے میچ میں اسامہ میر کو مار پڑجائے۔ تاہم ٹیم کے پاس کوئی آپشن بھی نہیں ہے۔
اگر ان کو خدانخواستہ اسامہ کو مار پڑ بھی جاتی ہے تو سعود شکیل اور محمد افتخار کو بھی استعمال کرسکتے ہیں۔جب آپ کے پاس وسائل ہیں تو اسے استعمال کرنے میں کیا قباحت ہے۔
انھوں نے قومی کپتان کے بارے میں اظہار خیال کرتے ہوئے کہا کہ بابر پھنسا ہوا ہے لیکن کلاس اس میں ہے وہ کسی بھی وقت فارم میں آجائے تو اچھا ہی کھیلے گا۔
