مایونیز کو ویسے تو ترش اور تیکھی اشیا کے ساتھ کھایا جاتا ہے اور میٹھی اشیا کے ساتھ کھانے سے اسے گریز کیا جاتا ہے، تاہم حال ہی میں مایونیز سے بنی ہوئی آئسکریم پیش کی گئی ہے۔
اسکاٹ لینڈ کے ایک اسٹور میں پیش کی جانے والی اس آئسکریم کو مایونیز سے بنایا گیا ہے اور یہ آئسکریم کھانے میں نہایت کریمی محسوس ہوتی ہے۔
ابتدا میں اس آئسکریم کو زیادہ پسند نہیں کیا گیا، تاہم پھر ٹویٹر پر کئی افراد نے بتایا کہ وہ مایونیز کو کن کن اشیا میں استعمال کرچکے ہیں۔ ایک صارف کا کہنا تھا کہ انہوں نے مایونیز کو چاکلیٹ کیک بنانے میں استعمال کیا۔
مایونیز سے بنی آئسکریم پیش کرنے والا یہ اسٹور اس سے پہلے بھی کئی مختلف ذائقوں کی اشیا متعارف کروا چکا ہے۔
اسٹور انتظامیہ کا کہنا ہے کہ ذائقوں کے تضاد کے باعث عجیب سا محسوس کرنے کے باوجود لوگ اس آئسکریم کو ضرور چکھنا چاہتے ہیں اور چکھنے کے بعد یہ انہیں ضرور پسند آتی ہے۔
کیا آپ یہ آئسکریم کھانا چاہیں گے؟
