کراچی: جناح انٹرنیشنل ایئرپورٹ پر جاپان کے تعاون سے مطلوب ملزمان کی نشان دہی کے لیے نصب کیا جانے والا سسٹم ایک عرصے سے غیر فعال ہو گیا ہے۔
تفصیلات کے مطابق جاپان کے تعاون سے کراچی ایئرپورٹ پر مطلوب ملزمان کی نشان دہی کے لیے نصب ایف آر ایس نامی سسٹم عملی طور پر غیر فعال ہو چکا ہے، پولیس اور دیگر اداروں کی جانب سے مطلوب ملزمان کا مکمل ڈیٹا سسٹم میں اندارج کے لیے تاحال فراہم نہیں کیا گیا۔
ایف آئی اے کے پاس افرادی قوت کی کمی بھی سسٹم کی مکمل فعالیت کی راہ میں رکاوٹ بنی ہوئی ہے، فیس ریکگنیشن سسٹم تنصیب کے بعد مانیٹرنگ روم سمیت ایف آئی اے کے انتظام میں دیا گیا تھا، سسٹم میں بین الاقوامی روانگی کے انٹری گیٹ اور مختلف حصوں میں جدید کیمرے نصب کیے گئے تھے۔
واضح رہے کہ مطلوب ملزمان کے ٹرمینل میں داخلے کے ساتھ ہی ایف آر ایس میں موجود تصاویر کی مدد سے ملزمان کی نشان دہی کرنا ممکن ہے، مانیٹرنگ روم میں موجود ڈیوٹی اہلکار کی نشان دہی پر ملزم کی حراست یقینی بنائی جاتی ہے۔