نیویارک : معروف برطانوی اداکار ادریس البا نے فلسطین میں جاری خونریزی پر تشویش کا اظہار کرتے ہوئے عالمی طاقتوں سے معاملے کا نوٹس لینے اور خونریزی روکنے کا مطالبہ کردیا۔
تفصیلات کے مطابق معروف اداکار ادریس البا نے سماجی رابطے کی ویب سائٹ انسٹاگرام پر فلسطین میں جاری اسرائیلی درندگی پر اظہار تشویش کرتے ہوئے عالمی طاقتوں سے معاملے میں مداخلت کی اپیل کردی۔
اداکارادریس البا نے لکھا کہ ’ ابھی بہت ساری زندگیاں ضائع ہو رہی ہیں ۔‘ یہ وہ سفاکی اور خونریزی ہے، جس نے مجھے تشویش کا اظہار کرنے پر مجبور کر دیا ہے، اسے روکنا ہوگا، معاملے میں مداخلت کرنے کی ضرورت ہے اس سے پہلے کہ مزید جانی نقصان ہو۔‘
View this post on Instagram
اداکار نے پیغام کے آخر میں لکھا کہ ’ہم جانتے ہیں کہ لوگوں کی طاقت تبدیلی لاسکتی ہے اور ہمیں امن کے نام پر بات کرنی چاہئے تاکہ فلسطین میں خونریزی کو بند کرایا جاسکے۔
یاد رہے اس سے قبل ریحانہ ، بیلا حدید سمیت دیگر اداکار بھی بڑھتے ہوئے اسرائیل اور فلسطین تنازعہ کے بارے میں اپنے خیالات کا اظہار کرچکے ہیں۔
خیال رہے کہ عالمی برادری کی جانب سے بھرپور احتجاج کے باوجود اسرائیلی حکومت کی جارحانہ کارروائیاں جاری ہیں ، اسرائیلی حملوں میں شہید افراد کی تعداد 200 سے زائد ہو گئی ہے جبکہ 1200 سے زائد زخمی ہیں۔
