دکی / لورالائی : آئی جی ایف سی میجرجنرل شیر افگن نے کہا ہے کہ دشمن پاک چین اقتصادی راہداری منصوبے کیخلاف ہے، عوام کے ساتھ مل کرسازشوں کو ناکام بنائیں گے۔
دکی میں میڈیکل سینٹر کے افتتاح پر خطاب کرتے ہوئے آئی جی ایف سی کاکہنا تھا کہ قلات آپریشن میں ہلاک نو دہشت گردوں کا تعلق سانحہ مستونگ میں ملوث گروپ سے تھا۔
انہوں نے کہا کہ سانحہ مستونگ میں ملوث شر پسند عناصر انسان نہیں درندے ہیں، جو چند پیسوں کی خاطر دہشت گردی کر رہے ہیں، ان دہشت گردوں کو خون کے ایک ایک قطرے کا حساب دینا ہوگا۔
کوئٹہ : آئی جی ایف سی میجرجنرل شیر افگن نے کہا ہے کہ بلوچستان کو پرامن بنانے مثالی صوبہ بنانے کے لئے کسی قربانی سے دریغ نہیں کیا جائے گا۔
وہ کوئٹہ میں سیکورٹی کانفرنس سے خطاب کررہے تھے،انہوں نے کہا کہ صوبے میں امن وامان کے قیام کیلئے ایف سی،پولیس اور سول انتظامیہ مربوط حکمت عملی اختیارکریں۔
کانفرنس میں ڈی آئی جی ایف سی بریگیڈیئرطاہر محمود،سیکٹرکمانڈرنارتھ بریگیڈیئرارشدمحمود،سیکٹرکمانڈرساؤتھ بریگیڈیئر اللہ نواز، ایف سی کے تمام یونٹ کمانڈنٹس،ڈویژنل کمشنرزبلوچستان اکبر حریفال، محمدفواد، قمبر دشتی، غلام علی بلوچ اور ریجنل پولیس آفیسران مظہر بلوچ،افتخار الحق،معظم شاہ،شکیل درانی اوراعتزازگورایہ سمیت دیگراعلیٰ حکام نے شرکت کی۔
آئی جی ایف سی نے کہا کہ قانون نافذکرنے والے اداروں کے تمام آفیسرز اپنی اپنی ذمہ داریوں کے علاقے میں امن وامان کی صورتحال پر کڑی نظر رکھیں اور عوام کے ساتھ موثر رابطہ رکھیں تاکہ شرپسندوں اور جرائم پیشہ افراد کے ساتھ ٹھوس انداز میں نمٹا جا سکے۔
تربت : آئی جی ایف سی میجر جنرل شیر افگن نے کہا ہے کہ دہشت گردوں کے خلاف جنگ جیتنے کیلئے عوام اور سول انتظامیہ ایف سی کا ساتھ دے۔
آئی جی ایف سی پیر کو ہنگامی دورے پر تربت پہنچے جہاں انہوں نے سیکورٹی کا جائزہ لیا، اس موقع پر میجر جنرل شیر افگن کا کہنا تھا کہ دہشت گردوں کے خلاف آپریشن کا دائرہ وسیع کرکے ان کی بیخ کنی کیلئے تمام وسائل بروئے کار لائے جائیں گے۔
مقامی لوگوں اور لیویز فورسز میں دہشت گردوں کے چھپے ہوئے ہمدردوں کے ساتھ آہنی ہاتھوں سے نمٹا جائے گا، اس موقع پر ان کا مزید کہنا تھا کہ قانون نافذ کرنے والے اداروں کے درمیان باہمی تعاون کی ضرورت ناگزیر ہے۔
دورے کے موقع پر وزیراعلیٰ بلوچستان ڈاکٹر عبدالمالک بلوچ سے ملاقات کی، ملاقات میں تربت سمیت صوبے بھر میں سیکورٹی کے حوالے سے بات چیت کی گئی ۔
اس موقع پر صوبائی وزیر داخلہ سرفراز احمد بگٹی ،آئی جی پولیس بلوچستان ،چیف سیکرٹری بلوچستان و دیگر اعلیٰ حکام بھی موجود تھے۔