کراچی : ڈی آئی جی سی ٹی ڈی عمرشاہد نے آئی جی سندھ مشتاق مہر کو خط لکھ کر ایم کیوایم لندن کے دہشت گرد سلیم بیلجیئم کی گرفتاری کے لیے بیلجئم حکام سے قانونی مدد کی درخواست کردی۔
تفصیلات کے مطابق ایم کیو ایم لندن کے دہشت گرد سلیم بیلجیئم کیخلاف تحقیقات میں پیشرفت ہوئی ، ڈی آئی جی سی ٹی ڈی عمر شاہد کاآئی جی سندھ مشتاق مہر کو خط لکھا ، جس میں سلیم بیلجئم کی گرفتاری کیلئے بیلجئم حکام سےقانونی مدد کی درخواست کردی۔
ڈی آئی جی سی ٹی ڈی نے کہا سلیم بیلجیئم کراچی میں ٹارگٹ کلنگ کی ٹیمیں چلاتا ہے، دہشت گردی کے 3 مقدمات میں سلیم بیلجیئم براہ راست ملوث ہے جبکہ دہشت گرد سرگرمیوں کیلئے فنڈنگ اور ریکروٹمنٹ میں بھی ملوث ہے۔
عمرشاہد کا کہنا تھا کہ گرفتار دہشت گرد واحد حسین عرف سوداگرنے بھی اہم انکشافات کئے واحد حسین کے مطابق سلیم بیلجیئم یورپ میں متعدد وارداتوں میں ملوث ہے۔
ڈی آئی جی سی ٹی ڈی نے بتایا کہ سلیم بیلجیئم بانی ایم کیو ایم کے قریب لندن میں مقیم ہے، اسے بانی ایم کیوایم کا قریبی ساتھی مانا جاتا ہے، واحد حسین کے بیان کے مطابق سلیم بیلجیئم کاشہری ہے۔
عمر شاہد نے کہا کہ درخواست کوایف آئی اے کے توسط سے بیلجیئم حکام کوبھیجا جائے، بیلجیئم حکام سے خط کے ذریعے ملزم کی گرفتاری میں مدد لی جائے۔
ڈی آئی جی سی ٹی ڈی نے سلیم بیلجیئم کے خلاف ثبوت بھی منسلک کردیئے،جس میں بتایا گیا ہے کہ سلیم بیلجیئم نے8دسمبر2018کو ایم کیو ایم پاکستان قیادت پردھماکا کرایا ، میلاد کانفرنس میں خواجہ اظہار ،خالد مقبول ،عامرخان ، فیصل سبزواری موجود تھے۔
23دسمبر کوپی ایس پی کارکنان پرحملہ ہواجس میں ایک ہلاک،دیگر زخمی ہوئے جبکہ 11فروری2019کوملزمان کے حملے میں ایک ہلاک اور کئی زخمی ہوئے۔
