اسلام آباد : اسپیکر ایاز صادق کی زیر صدارت قومی اسمبلی کے اجلاس میں وزیر دفاع و پیداوار رانا تنویر نے موجودہ دور حکومت میں فروخت کردہ اسلحے کی تفصیلات اسمبلی میں پیش کر دیں۔
تفصیلات کے مطابق اب تک 8 ممالک کو 9790 بندوقیں فروخت کی گئی ہیں۔ جن میں سب سے زیادہ بندوقیں کینیا کو فروخت کی گئیں جن کی تعداد 3600 ہے ۔
وزارت دفاعی پیدوار نے بتایا کہ لکسمبرگ کو 3280 ،امریکہ کو 1791،اور برطانیہ کو 524 بندوقین فروخت کی گئیں ۔ جبکہ کوریا کو 35،جنوبی افریقہ کو 60،بحرین کو 300اور سعودی عرب کو 200 بندوقیں فروخت کی گئیں ۔
قومی اسمبلی کے اجلاس سے ایم کیو ایم نے بلدیاتی نمائندوں کو اختیارات منتقل نہ کرنے پر ایوان سے واک آوٹ کیا۔
پیپلز پارٹی نے میر منور تالپور کے خلاف مقدمات کے اندراج پر ایوان سے واک آوٹ کیا۔نواب یوسف تالپور کا کہنا تھا کہ پیپلز پارٹی کو انتقام کا نشانہ بنایا جارہا ہے،سندھ کے عوام کو سبق سکھانا ہے اور سندھ کے گرد دیوار لگا دی جائے۔
واک آوٹ کے بعد پیپلز پارٹی کے نعمان شیخ نے کورم کی نشاندہی کی،کورم پورا نہ ہونے کے باعث قومی اسمبلی کا اجلاس کل ساڑھے دس بجے تک ملتوی کر دیا گیا۔
