اسلام آباد :اقتصادی رابطہ کمیٹی کےاجلاس میں پاکستان اسٹیل ملز اورمشین ٹول فیکٹری کےملازمین کی تنخواہوں کی منظوری دے دی گئی۔
وفاقی کابینہ کی اقتصادی رابطہ کمیٹی اجلاس کاوزیر خزانہ اسحاق ڈار کی زیرصدارت میں ہوا،وزرات خزانہ ذرائع کےمطابق اجلاس میں مشین ٹول فیکٹری اور پاکستان اسٹیل ملز کے ملازمین کو دو ماہ کی تنخواہوں کی ادائیگی کی منظوری دے گئی۔
ملازمین کو جون اور جولائی کی تنخواہ اد کی جائے گی جس کیلئے چھیانوئے کروڑ روپے جاری کئے جائیں گے۔
کراچی : وزیر اعلیٰ سندھ نے اپیکس کمیٹی کا اجلاس کل طلب کر لیا، اجلاس میں گورنر ،ڈی جی رینجرز، آئی جی سند ھ اور حساس اداروں کے نمائندے شریک ہوں گے۔
تفصیلات کے مطابق وزیرِ اعلیٰ سندھ کی زیرِ صدارت ایپکس کمیٹی کا اجلاس کل وزیر اعلی ہاؤس کراچی میں ہوگا۔ وزیر اعلی سندھ کی زیرِ صدارت اجلاس میں قومی ایکشن پلان میں پیش رفت کے حوالے سے غور کیاجا ئے گا۔
جس میں ڈی جی رینجرز،آئی جی سندھ سمیت حساس اداروں کے نمائندے شریک ہونگے،ذرائع کے مطابق ایپکس کمیٹی کا اجلاس ہر مہینے قومی ایکشن پلان پر پیش رفت کے لئے طلب کیا جاتا ہے۔اجلاس میں کراچی آپریشن مزید تیز کرنے پراتفاق کئےجانےکابھی امکان ہے۔
اسلام آباد : وزیراعظم کے مشیر برائے قومی سلامتی امور سرتاج عزیز کی زیر صدارت دفتر خارجہ میں بین الوزارتی اجلاس منعقد ہوا۔
جس میں اقوام متحدہ کے سال 2015 کے بعد کے ترقیاتی اہداف کے ایجنڈے کے حوالے سے پاکستان کی تیاریوں کا جائزہ لینے کے لئے غور خوص کیا گیا۔
اس موقع پر منصوبہ بندی، ترقی کے وفاقی وزیر اور اصلاحات احسن اقبال، وفاقی اور صوبائی حکومتوں کی جانب سے سینئر حکام نے شرکت کی۔
اجلاس سے خطاب کرتے ہوئے سرتاج عزیز نے کہا کہ پاکستان کی ترقی ،ضروریات اور ترجیحات کے حوالے سے میلینئم ڈیولپمنٹ کے اہداف کے حصول کی تکمیل کیلئے مربوط نظام وضع کرنا ہوگا۔
انہوں نے کہا کہ اس سے قبل ترقیاتی اہداف کے ایجنڈے کے مقاصد کے حصول کیلئے پاکستان کی کارکردگی ناکافی رہی ہے، اجلاس میں بتایا گیا کہ اقوام متحدہ کی جنرل اسمبلی کے رواں ماہ کے آخر میں ہونے والے اجلاس میں مذکورہ ترقیاتی ایجنڈا اختیار کیا جائے گا۔
پاکستانی وفد کی قیادت وزیر اعظم میاں ںواز شریف کریں گے، جنرل اسمبلی کے اجلاس میں پیش کئے جانے والے ایجنڈے میں اقتصادی، سماجی اور ماحولیاتی مسائل کے 17 مقاصد اور 169 اہداف پر مشتمل پائیدار ترقی کے طول و عرض کا احاطہ کیا گیا ہے۔
ایجنڈے میں غربت اور بھوک کا خاتمہ صنفی مساوات اور خواتین کو بااختیار بنانے کے حصول، جامع اور پائیدار اقتصادی ترقی اور مکمل اور پیداواری روزگار کو فروغ دینے، تعلیم، صحت، پانی اور صفائی ستھرائی کے لئے توانائی تک رسائی کو یقینی بنانے، موسمیاتی تبدیلی سے نمٹنے اور پائیدار تحفظ کو یقینی بنانے اور اس کے قدرتی وسائل کی اہم ترجیحات شامل ہیں۔
کراچی : نیب اور ایف آئی اے نے اینٹی کرپشن اسٹیبلشمنٹ کو صوبے میں کرپشن اور بے ضابطگیوں کی چالیس سے زائد انکوائریاں بھیجی ہیں ان کیسز کی انکوائری کیلئے دو رکنی کمیٹی تشکیل دیدی گئی ہے۔
وزیر اعلیٰ سندھ نے ہدایت جاری کی ہے کہ ایف آئی اے اور نیب کی جانب سے محکمہ اینٹی کرپشن کو بھیجی جانیوالی انکوائریوں پر بلا تعطل سخت کاروائی کی جائے۔
تفصیلات کے مطابق وزیر اعلیٰ سندھ سید قائم علی شاہ کی صدارت میں کرپشن کیسز کے حوالے سے اجلاس ہوا جس میں چیئرمین اینٹی کرپشن ممتاز علی شاہ نے وزیر اعلیٰ سندھ کو بریفنگ دیتے ہوئے بتایا کہ محکمہ اینٹی کرپشن نے 72 کرپشن کی ایف آئی آر درج کی ہیں جبکہ 209 انکوائریوں کو بھی کھولا گیا ہے جس کے باعث 72 مختلف محکموں کے افسران کو کرپشن کے الزام میں گرفتار کیا گیا ہے۔
ممتاز علی شاہ نے بریفنگ دیتے ہوئے بتایا کہ یہ کاروائیاں 2 ماہ کے دوران کی گئی ہے جب کہ مزید تحقیقات کا دائری وسیع کیا جارہا ہے۔
انھوں نے وزیر اعلیٰ سندھ کو بتایا کہ نیب اورآیف آئی اے اینٹی کرپشن سندھ کو کرپشن کی انکوائری بھیجنا شروع کردی ہیں جس پر اینٹی کرپشن نے کیسز کی انکوائریوں کیلئے دو رکنی کمیٹی قائم کی ہے ۔
بریفنگ کے دوران بتایا کہ نیب اور ایف آئی اے کی جانب سے بھیجی جانیوالی انکوائریوں میں کرپشن بدعنوانی زمینوں پر گھپلے کے مختلف کیسز شامل ہیں۔
انھوں نے بتایا کہ اینٹی محکمہ اینٹی کرپشن کی جانب سے محکمہ تعلیم، صحت ،بلدیات، آبپاشی سمیت ریونیو کے محکموں میں تحقیقات کی جارہی ہیں جن میں بوگس الاٹمنٹ اور کھاتوں کی تبدیلی کے کیسز شامل ہیں۔
اس موقع پر وزیر اعلیٰ سندھ سید قائم علی شاہ نے کہا کہ یہ خوش آئند عمل ہے کہ وفاقی تحقیقاتی اداروں نے محکمہ اینٹی کرپشن پر اعتماد کا اظہار کیا ہے۔
وزیر اعلیٰ سندھ نے ایف آئی اے اور نیب کی جانب سے بھیجی جانیوالی انکوائریوں پر بلا تعطل سخت کاروائی کی ہدایت جاری کرتے ہوئے کہا کہ اینٹی کرپشن اسٹیبلشمنٹ کے تمام ریکارڈ کو کمپیوٹرائز کیا جائے اور موصول ہونیوالی شکایات پر فوری مقدمات درج کئے جائیں ۔
اسلام آباد : پاکستان تحریک انصاف نے قومی اسمبلی کا بائیکاٹ ختم کردیا۔ پیر سے عمران خان اینڈ کمپنی قومی اسمبلی جائیں گے، قومی اسمبلی کے اجلاس میں شرکت کا فیصلہ پارٹی کی کور کمیٹی کے اجلاس میں کیا گیا۔
تفصیلات کے مطابق اسمبلی میں ڈی سیٹ کی تحریک ٹھنڈی ہونے کے بعد عمران خان اپنے رفقا کے ہمراہ سر جوڑ کر بیٹھےاور بنی گالہ میں مشاورت کے بعد بالآخر قومی اسمبلی میں جانے کا فیصلہ کرلیا گیا۔
مشاورتی اجلاس کے بعد شاہ محمود قریشی نے میڈیا سے گفتگو کرتے ہوئے کہا کہ عمران خان اور پارٹی ارکان پیر کو قومی اسمبلی اجلاس میں شریک ہوں گے۔
شاہ محمود قریشی کا کہنا تھا کہ ایوان میں اپوزیشن کا کردار ادا کریں گے، عمران خان کواسمبلی میں بات کرنے کاموقع نہ ملاتومنفی ردعمل ہوگا۔
شاہ محمود قریشی نے کہا کہ جس طرح کا سلوک ہوا اسی طرح کا جواب دیں گے۔ پی ٹی آئی رہنما نے کہا کہ تحاریک واپس لینے کیلئے ایم کیو ایم اور جے یو آئی سے مذاکرات حکومت کا کام تھا۔
تحریک انصاف کا اس میں کوئی عمل دخل نہیں تھا۔ اسمبلیوں سے باہر جانے کا ایک مقصد تھا واپسی بھی مقصد کے تحت ہی ہے۔ پی ٹی آئی کے رہنما نے کہا کہ جوڈیشل کمیشن کا فیصلہ تسلیم کرچکے اب بات ختم ہوگئی۔
لاہور : تحریک انصاف کے رہنما حامدخان نے انٹرا پارٹی الیکشن میں دھاندلی سے متعلق جسٹس وجیہ کی رپورٹ پرعمل درآمد کیلئے تحریک چلانے کا اعلان کردیا۔
تحریک انصاف کے مرکزی رہنماء حامد خان پارٹی اجلاس کے دوران جہانگیر ترین ، پرویز خٹک اور عبدالعلیم خان پر برس پڑے۔
انہوں نے موقع پرستوں کو پارٹی سے نکالنے کا مطالبہ کر دیا۔ لاہور میں کارکنوں سے خطاب کرتے ہوئے تحریک انصاف کے مرکزی رہنماء حامد خان کا کہنا تھا کہ عمران خان پر اس وقت شوگر اور لینڈ مافیا کا قبضہ ہے۔
جہانگیر ترین اور پرویز خٹک جیسے موقع پرستوں کو پارٹی میں لانے سے عمران خان کو منع کیا تھا۔ انہوں نے کہا کہ جب تک جسٹس وجیہہ الدین ٹربیونل کے فیصلے پر مکمل عمل درآمد نہیں کیا جاتا، تب تک ناراض کارکنوں کی تحریک بند نہیں ہو گی۔
انہوں نے کہا کہ جوڈیشل کمیشن میں تحریک انصاف کو دھچکا موقع پرستوں کی وجہ سے لگا، اسحاق خاکوانی اور شعیب صدیقی اس قابل نہیں تھے مگر انہیں جوڈیشل کمیشن میں بھیجا جاتا رہا۔
لینڈ اور شوگر مافیا کی جگہ تحریک انصاف نہیں بلکہ نون لیگ ہے۔ انہوں نے کہا کہ جہانگیر ترین جہاں پارٹی میں ہر چیز کے ایڈوائزر بنے ہیں وہیں پارٹی کا بیڑا غرق بھی انہی کے مشوروں سے ہوا۔
حامد خان نے پنجاب میں تحریک انصاف کے نئے منتخب ہونے والے آرگنائزر چودھری سرور کی بنائی گئی تمام صوبائی اور ضلعی تنظیمی کمیٹیوں کو بھی مسترد کر دیا۔
اسلام آباد : قومی اسمبلی کا اجلاس آج شام چار بجےپارلیمنٹ ہاؤس میں ہورہا ہے۔ قومی اسمبلی کے اجلاس کی صدارت اسپیکر سردار ایاز صادق کریں گے۔ قومی اسمبلی کااجلاس دو ہفتے جاری رہے گا۔
اجلاس میں اسلام آباد میں بلدیاتی انتخابات سے متعلق اہم قانون سازی کی جائے۔ دھاندلی سے متعلق جوڈیشل کمیشن کی رپورٹ بھی قومی اسمبلی میں پیش کی جائے گی۔
اجلاس میں مون سون بارشوں کے باعث خیبر پختونخواہ، آزاد کشمیر، پنجاب اور سندھ سمیت ملک بھر میں سیلاب کی تباہ کاریوں سے ہونے والے نقصانات اور حکومت اقدامات بھی زیر بحث آئیں گے۔
لندن: ایم کیو ایم اور تحریک انصاف کے کارکنوں میں تصادم ہوگیا ،ایک دوسرے پربوتلیں اورجوتے برسا دیئے۔
ایم کیو ایم اور تحریک انصاف کراچی کے بعد لندن میں بھی آمنے سامنے آگئیں ایم کیو ایم سیکریٹریٹ کےباہر تحریک انصاف کے کارکنوں نے الطاف حسین کے خلاف نعرے لگائے تو ایم کیو ایم کے کارکن بھی سامنے آگئے،اورعمران خان اور تحریک انصاف کے خلاف نعرے بازی کی۔
پی ٹی آئی کا مظاہرہ جاری تھا کہ اس ہی دوران ایم کیو ایم کے کارکن جمع ہوئے اور انہوں نے پی ٹی آئی کے خلاف احتجاج کیا اور عمران خان کے خلاف نعرے بازی کی۔
اس دوران مشتعل افرد نے ایک دوسرے پر جوتے اور بوتلیں پھینکیں، جو وہاں موجود صحافیوں کو بھی لگیں اشتعال پھیلنے پر برطانوی پولیس نےمظاہرین کو منتشر کر دیا۔
پی ٹی آئی نے اتوار کو ٹین ڈاؤننگ اسٹریٹ پر برطانوی وزیر اعظم کی رہائش گاہ کے سامنےمظاہرےکا اعلان کیا ہے۔
کراچی /لندن : متحدہ قومی موومنٹ کے قائدالطاف حسین کی سربراہی میں رابطہ کمیٹی پاکستان اور لندن کے ارکان کا مشترکہ اجلاس ہوا جس میں رابطہ کمیٹی کے سینئر ڈپٹی کنوینر ندیم نصرت بھی شریک تھے ۔
اجلاس میں رابطہ کمیٹی کی جانب سے ایم کیوایم کے رہنماؤں ، ذمہ داروں اورکارکنوں کی غیرقانونی اور غیرآئینی گرفتاریوں پر گہری تشویش کااظہار کیا گیا اور گرفتارشدگان کی قانونی معاونت کے حوالہ سے مختلف تجاویز پر غوروخوض کیا گیا۔
اجلاس میں گرفتارشدگان کی قانونی معاونت کے نظام کو مزیدبہتر اور منظم بنانے کیلئے ایم کیوایم کی لیگل ایڈ کمیٹی کی تنظیم نوپر بھی تبادلہ خیال کیاگیا ۔
اجلاس میں متفقہ طورپر سینئر ترین قانون داں اورمعروف سیاستداں ڈاکٹر محفوظ یارخان کو ایم کیوایم کی لیگل ایڈ کمیٹی کا صدر بنانے کا فیصلہ کیاگیاہے۔
جبکہ لیگل ایڈ کمیٹی کے موجودہ صدر نعیم صدیقی ، لیگل ایڈ کمیٹی کے نائب صدر کی حیثیت سے ذمہ داریاں انجام دیں گے۔ قائد تحریک الطاف حسین نے رابطہ کمیٹی کے فیصلے کی توثیق کردی ہے ۔
کوئٹہ : بلوچستان کے نئے مالی سال کے لئے دوکھرب تینتالیس ارب روپے سے زائد کا بجٹ پیش کردیا گیا ہے ،صوبے میں پانچ ہزار نئی آسامیوں اور سرکاری ملازمین کی تنخواہوں میں وفاق کی طرز پر ساڑھے سات فیصد اضافہ کرنے کا اعلان کیا گیا ہے۔
مشیر خزانہ کہتے ہیں کہ معاوضے کی کم شرح پر عملدرآمد نہ کرنے والے اداروں کے خلاف کارروائی ہوگی،تفصیلات کے مطابق بلوچستان کے نئے مالی سال دوہزار پندرہ سولہ کا دو کھرب تینتالیس ارب باون کروڑ اسی لاکھ روپے کا بجٹ پیش کردیا گیا ہے، بجٹ میں چھبیس ارب روپے کا خسارہ ظاہر کیا گیا ہے۔
قائم مقام اسپیکر میرعبدالقدوس بزنجو کی زیر صدارت بلوچستان اسمبلی کے بجٹ اجلاس میں ایوان سے خطاب کرتے ہوئے مشیر خزانہ بلوچستان میر خالد خان لانگو کا کہنا تھا کہ نئے مالی سال کے صوبائی بجٹ میں امن وامان کے قیام ،شعبہ تعلیم ،صحت اور پینے کے پانی کی فراہمی حکومت کی اولین ترجیحات ہیں۔
بجٹ میں ترقیاتی اخراجات کے لئے چون ارب پچاس کروڑ جبکہ غیر ترقیاتی اخراجات کے لئے ایک کھرب نواسی ارب روپے رکھے گئے ہیں،سرکاری ملازمین کی تنخواہوں میں وفاق کی طرز پر ساڑھے سات فیصد اضافہ کیا گیا ہے جبکہ معاوضے کی کم سے کم شرح دس ہزار سے بڑھا کر تیرہ ہزار روپے کردی گئی۔
مشیر خزانہ نے کہا کہ بجٹ کو عوام دوست بنانے کے لئے ہر ممکن کوشش کی گئی ہے،حزب اختلاف کی جماعتوں نے بجٹ اجلاس کا بائیکاٹ کیا۔
حزب اختلاف نے موقف اختیا رکیا کہ صوبائی حکومت اپوزیشن جماعتوں کو اعتماد میں نہیں لے رہی اور انہیں ہر معاملے میں دیوار سے لگانے کی کوشش کی جارہی ہے ،تاہم مشیر خزانہ نے اپوزیشن کے اقدام پر افسوس کا اظہار کیا ۔
بجٹ اجلاس بیس جون سہہ پہر تین بجے تک کے لئے ملتوی کردیا گیا۔