Tag: ijlas

اسلام آباد :  تحریک انصاف کی رہنماء ڈاکٹرشیریں مزاری نے کہا ہے کہ کراچی کے ضمنی انتخابات کے حوالے سے جماعت اسلامی سے رابطے میں ہیں، امید ہے کہ جماعت اسلامی جلد اپنا امیدوار دستبردار کروا لے گی۔

یہ بات انہوں نے اسلام آباد میں پی ٹی آئی کی کور کمیٹی کے اجلاس سے خطاب کرتے ہوئے کہی،انہوں نے کہا کہ کراچی میں تحریک انصاف نے خوف کے بت کو پاش پاش کردیا ہے،جوڈیشل کمیشن کے سامنے اپنا ثبوت رکھیں گے۔

تفصیلات کے مطابق اسلام آباد میں پاکستان تحریک انصاف کی کور کمیٹی کا اجلاس مرکزی دفتر میں ہوا،ورکرز ویلفیئر بورڈ کے مظاہرین کے عمران خان کی رہائش گاہ کے باہر دھرنے کی وجہ سے چیئرمین نے کور کمیٹی کے اجلاس میں بذریعہ وڈیو لنک شرکت کی۔

اجلاس کے بعد میڈیا سے گفتگو کرتے ہوئے تحریک انصاف کی سیکیریٹری اطلاعات شیری مزاری نے کہا کہ جوڈیشل کمیشن کے قیام کے لئے تحریک  انصاف نے جدوجہد کی اور اب اکیس جماعتیں دھاندلی کے شواہد لے کر جوڈیشل  کمیشن کے سامنے پیش ہوئی ہیں۔

انہوں نے کہا کہ ہمیں امید ہے جوڈیشل کمیشن سے تحریک انصاف کو انصاف ملے گا،کراچی کی صورت حال پر بات کرتے ہوئے شیریں مزاری نے کہا کہ این اے 246 میں الیکشن مہم سے کراچی میں خوف کے بت ٹوٹ گئے ہیں۔

ان کا کہنا تھا کہ جماعت اسلامی سے رابطےمیں ہیں،امید کرتے ہیں کہ جماعت اسلامی کراچی میں جلد اپنا امیدوار دستبردار کروا لے گی۔

ڈاکٹر شیریں مزاری نے کہا کہ تحریک  انصاف جوڈیشل کمیشن کے سامنے اپنےشواہد پیش کرے گی،اس موقع پر ورکرز بورڈ کے مظاہرین نے مرکزی دفتر کے باہر احتجاج کیا مگر ڈاکٹر شیریں مزاری صرف یہی دلاسہ دے سکیں کہ میں آپ کی بات اعلیٰ قیادت کو پہنچا دوں گی۔