واشنگٹن : امریکی صدر نے لِکن ریلی ایکٹ پر دستخط کردیئے، اس منصوبے کے مطابق امریکا میں مقیم غیر قانونی تارکین وطن کو جبری طور بے دخل کیا جاسکے گا۔
صدر ڈونلڈ ٹرمپ نے گزشتہ روز لکِن رائلی ایکٹ کو باقاعدہ قانون کا درجہ دے دیا، جس کے تحت امیگریشن افسران کو اختیار حاصل ہوگا کہ وہ غیر قانونی تارکینِ وطن کو حراست میں لے سکیں جو پہلے بھی کسی جرم میں گرفتار کیے گئے ہوں۔
یہ صدر ٹرمپ کے دوسرے صدارتی دور کا پہلا قانون ہے، جس کا وعدہ انہوں نے اپنی انتخابی مہم کے دوران عوام سے کیا تھا۔
اس حوالے سے ڈونلڈ ٹرمپ کا کہنا ہے کہ اس قانون سے ملک میں جاری "تارکین وطن کی یلغار” کو روکنے میں مدد ملے گی۔
ٹرمپ نے وائٹ ہاؤس میں صحافیوں سے گفتگو کرتے ہوئے کہا کہ یہ ایک تاریخی قانون ہے جس پر آج ہم دستخط کر رہے ہیں، ٹرمپ نے وائٹ ہاؤس میں گفتگو کے دوران کہا کہ یہ بے شمار معصوم امریکیوں کی جانیں بچانے والا قانون ہے۔
رپورٹ کے مطابق غیر قانونی تارکین وطن کو گرفتار کرکے گوانتاناموبے جیل بھیجنے کا منصوبہ ہے، اس سلسلے میں ڈونلڈ ٹرمپ نے ہوم لینڈ سیکیورٹی اور پینٹاگون کو ہدایت جاری کردی ہیں۔
رپورٹ کے مطابق مجرموں کیلئے گوانتاناموبے میں 30ہزار بستر موجود ہیں، اس کے علاوہ وفاقی امداد منجمد کرنے سے متعلق حکم نامہ منسوخ کردیا گیا۔
لکِن رائلی ایکٹ کیا ہے؟
یہ قانون لکِن رائلی کے نام پر رکھا گیا ہے، جو 22 سالہ نرسنگ کی طالبہ تھیں اور 22 فروری 2024 کو جارجیا کے شہر ایتھنز میں ریس کے دوران قتل کر دی گئی تھیں۔
اس قتل کا ملزم وینزویلا کا غیر قانونی تارکِ وطن تھا، ملزم اس سے قبل بھی ایک دکان میں چوری کے الزام میں گرفتار ہو چکا تھا، تایم اسے حراست میں نہیں لیا گیا تھا۔
یہ واقعہ 2024 کے انتخاب میں ٹرمپ اور ریپبلکن جماعت کے لیے ایک بڑا نعرہ بن گیا، جو غیر قانونی تارکینِ وطن کیخلاف سخت امیگریشن قوانین کا مطالبہ کر رہے تھے۔
ٹرمپ نے کہا کہ امریکہ لکِن ہوپ رائلی کو کبھی نہیں بھولے گا، یہ ہولناک جرم کبھی ہونے ہی نہیں دینا چاہیے تھا اور بطور صدر میں اس پر ہر دن کام کر رہا ہوں تاکہ اس بات کو یقینی بنایا جا سکے کہ ایسا کوئی اور سانحہ دوبارہ رونما نہ ہو۔
