کراچی: شہر قائد میں ایک گھر سے چین اور برطانیہ سمیت 5 بڑے ممالک کی ادویات کی فروخت کا انکشاف ہوا ہے۔
تفصیلات کے مطابق ایف آئی اے نے گارڈن ایسٹ میں ایک مشترکہ کارروائی میں ایک گھر سے کثیر تعداد میں جعلی اور غیر رجسٹرڈ ادویات برآمد کی ہیں۔
یہ کارروائی اسٹیٹ بینک سرکل اور ڈرگ ریگولیٹری اتھارٹی کی جانب سے کی گئی، جس میں ایک ملزم فہد کو گرفتار کیا گیا ہے، معلوم ہوا ہے کہ برآمد شدہ ادویات فرانس، آئرلینڈ، ترکی، چین، برطانیہ کی دوا ساز کمپنیوں کی تیار کردہ ہیں۔
ترجمان ایف آئی اے نے بتایا کہ ملزم اپنے گھر سے مذکورہ ادویات کی فروخت میں مصروف تھا، پکڑی گئی ادویات امراض قلب، کینسر، ذیابطیس اور دیگر امراض میں استعمال کی جاتی ہیں، جب کہ برآمد شدہ ادویات کی مالیت 70 لاکھ روپے سے زائد ہے۔
ابتدائی تفتیش میں ملزم نے کھیپیوں کی جانب سے ادویات مہیا کرنے کا انکشاف کیا، ملزم کے خلاف مقدمہ درج کر کے تفتیش کا آغاز کر دیا گیا ہے، جب کہ اس کیس میں ملوث دیگر ملزمان کی گرفتاری کے لیے بھی چھاپے مارے جا رہے ہیں۔
