پاکستان اور عالمی مالیاتی فنڈ (آئی ایم ایف) کے درمیان بحالی قرض کیلئے جاری مذاکرات میں وزارت خزانہ کو ایک اور مشکل درپیش ہے، عالمی ادارے نے ایک اور کڑی شرط عائد کردی۔
اس حوالے سے ذرائع کا کہنا ہے کہ پاکستان نے آئی ایم ایف جانب سے تمام پیشگی شرائط پرعمل درآمد مکمل کرلیا ہے، آخری شرط کمرشل بینکوں سے براہ راست قرض نہ لینے کی تھی، اب پاکستان نے اس شرط سے بھی اتفاق کرلیا ہے۔
ذرائع کے مطابق تمام پیشگی شرائط پر عملدرآمد کے بعد پاکستانی حکام کو آئی ایم ایف کی ایک اور کڑی شرط کا سامنا ہے، جس میں کہا گیا ہے کہ جن ممالک سے30جون تک فنانسنگ ہونی ہے، اس حوالے سے تحریری یقین دہانی فراہم کی جائے۔
آئی ایم ایف کا کہنا ہے کہ تحریری یقین دہانی سعودی عرب، قطر اور یو اے ای کی جانب سے فراہم کی جائے، حکام وزارت خزانہ کے مطابق یقین دہانی ان ممالک کے آئی ایم ایف میں ایگزیکٹو ڈائریکٹر فراہم کریں گے۔
ذرائع کے مطابق حکومت پاکستان ان ممالک سے تحریری یقین دہانی حاصل کرنے کے لئے متحرک ہوگئی ہے، اس سلسلے میں وزارت خزانہ کے ساتھ ساتھ وزیر اعظم کا دفتر بھی سرگرم ہے، پاکستانی حکام بھی جلد تحریری یقین دہانیاں حاصل کرنے کے لئے پُرامید ہیں۔
پاکستان اور آئی ایم ایف حکام ترمیم شدہ ایم ای ایف پی پر مذاکرات مکمل کرچکے، پاکستان چاہتا ہے ایگزیکٹو بورڈ اجلاس میں اسٹاف لیول معاہدے کی منظوری ہوجائے۔
