Tag: IMF mission

اسلام آباد : آئی ایم ایف نے کہا ہے کہ پاکستان میں مہنگائی میں آنے والے مہینوں میں کمی متوقع ہے، جاری کھاتوں کے خسارے میں توقع سے زیادہ بہتری آئی ہے، پاکستان کے معاشی پلان کا آٖغاز تسلی بخش ہے۔

تفصیلات کے مطابق گزشتہ روز آئی ایم ایف کے ایک وفد نے پاکستان کا دورہ کیا جس سے متعلق ایک اعلامیہ جاری کیا ہے جس میں کہا گیا ہے کہ پاکستان میں جاری کھاتوں کے خسارے میں توقع سے زیادہ بہتری آئی ہے جس سے توقع ہے کہ آنے والے چند مہینوں میں مہنگائی میں کمی ہوسکتی ہے۔

اس کے علاوہ رواں سال کیلئے معاشی شرح نمو دو اعشاریہ چار فیصد رہنے کی توقع ہے، آئی ایم ایف اعلامیہ میں کہا گیا ہے کہ وسط مدتی معاشی اعشاریوں میں تبدیلی نہیں آئی اور ملکی معیشت کو مقامی اور بیرونی خدشات ابھی بھی لاحق ہیں۔

آئی ایم ایف قرض پروگرام کے تحت پہلا جائزہ اکتوبر کے اختتام میں ہوگا، آئی ایم ایف کا وفد دوبارہ پاکستان آئے گا، اعلامیہ کے مطابق ٹیکس وصولیوں میں نمایاں بہتری آئی ہے،

ایف بی آر کی جانب سے اصلاحاتی اقدامات قابل ذکر ہیں، حکومت کی جانب سے سماجی بہبود کے پروگرام شروع کیے گئے ہیں،

معاشی اصلاحاتی پروگرام اب ابتدائی مراحل میں ہے ،آئی ایم ایف اعلامیہ میں کہا گیا ہے کہ کچھ شعبوں میں بہتری دیکھی گئی ہے، روپے کی قدر میں اتار چڑھاؤ بھی کم ہوگیا۔

مانیٹری پالیسی سے افراط زر کو قابو کرنے میں مدد مل رہی ہے، اس کے علاوہ اسٹیٹ بینک کے زرمبادلہ ذخائر میں بہتری آئی ہے، پاکستان کے معاشی پلان کا آٖغاز تسلی بخش ہے۔

مزید پڑھیں: آئی ایم ایف مشن کا ملکی معیشت کی بہتری کیلیے حکومتی پالیسیوں پر اظہار اطمینان

واضح رہے کہ گزشتہ دنوں آئی ایم ایف مشن نے وزیراعظم عمران خان سے ملاقات کی تھی جس میں پاکستان کی معاشی صورتحال کی بہتری کیلیے کیے گئے حکومتی اقدامات کی تعریف کرتے ہوئے حکومت کی پالیسیوں پر اظہار اطمینان کیا تھا۔

اس موقع پر آئی ایم ایف وفد کا کہنا تھا کہ پاکستان میں معاشی اعشاریے بہتری ظاہر کررہے ہیں اور پاکستان میں ٹیکس نیٹ میں اضافہ ہورہا ہے جو خوش آئند ہے۔