کراچی: روسی قونصل جنرل نے کہا ہے کہ وہ کبھی بھی اپنے مغربی ’’پارٹنرز‘’ اور آئی ایم ایف جیسے بین الاقوامی مالیاتی اداروں کی غیر منتخب وائٹ کالر اسٹیبلشمنٹ کے طور پر کام نہیں کریں گے۔
تفصیلات کے مطابق روس کے کراچی میں تعینات قونصل جنرل آندرے وکٹرووچ فیڈروفنے کہا ہے کہ وہ یوکرین کی صورت حال سمیت بین الاقوامی ایجنڈے پر موجود دیگر مسائل کے حوالے سے پاکستان کے متوازن اور سمجھ دار انداز کا خیر مقدم کرتے ہیں۔
انھوں نے کہا گزشتہ دو سالوں کے دوران تینوں پاکستانی حکومتوں نے تعمیری مؤقف کا مظاہرہ کیا اور بے بنیاد الزامات اور غیر ذمہ دارانہ بیان بازی سے گریز کیا۔
ان کا کہنا تھا کہ ابھرتی ہوئی روس پاکستان شراکت داری کچھ مبہم مغربی ’قواعد‘ پر نہیں بلکہ بین الاقوامی قانون پر مبنی جمہوری اور منصفانہ عالمی نظام کے عین مطابق ہے، دونوں ممالک کی اقوام باہمی اشتراک سے خاطر خواہ اقتصادی اور علاقائی ترقی کر سکتے ہیں۔
انھوں نے کہا روس نے اپنی طرف سے پاکستان کے اندرونی معاملات میں مداخلت یا اثر انداز ہونے کی کوشش نہیں کی، ہم کبھی بھی اپنے مغربی ’پارٹنرز‘ اور آئی ایم ایف جیسے بین الاقوامی مالیاتی اداروں کی غیر منتخب وائٹ کالر اسٹیبلشمنٹ کے طور پر کام نہیں کریں گے، جو یہ حکم دیتے ہیں کہ پاکستان کو اپنی داخلی پالیسی کو کس طرح تشکیل دینا چاہیے۔
ان خیالات کا اظہار انھوں نے جامعہ کراچی میں منعقدہ سیمینار ’’پاک روس 75 سالہ تعلقات:ایک ابھرتی ہوئی شراکت داری‘‘ میں خطاب کے دوران کیا۔
آندرے وکٹرووچ نے کہا پاکستان اسٹریم گیس پائپ لائن معاہدے کے ساتھ ساتھ توانائی کے دیگر شعبوں کے ذریعے توانائی کے مسائل سے نمٹ سکتا ہے، تین ماہ قبل روس نے پاکستان کو خام تیل کی فراہمی بھی شروع کر دی ہے۔
جامعہ کراچی کے وائس چانسلر پروفیسر ڈاکٹر خالد محمودعراقی نے کہا کہ پاکستان اور روس کے مابین 2021 سے 2022 تک 567 ملین جب کہ 2022 سے 2023 تک 760 ملین کی تجارت ہوئی، یہ آگے بڑھنے کا راستہ اور مثبت اشارہ ہے۔ انھوں نے روسی قونصل جنرل کو مخاطب کرتے ہوئے کہا کہ جامعہ کراچی میں رشین لینگویج سینٹر کا قیام عمل میں لایا جائے تاکہ جامعہ کراچی کے اساتذہ اور طلبہ اس سے استفادہ کر سکیں۔
اُردو یونیورسٹی کے شعبہ بین الاقوامی تعلقات کے اسسٹنٹ پروفیسر ڈاکٹر فیصل جاوید نے کہا کہ اگر پاکستان روس کو گرم پانی تک رسائی کی سہولت فراہم کرتا ہے تو یہ دونوں ممالک کے تعلقات میں مزید مضبوطی کا ذریعہ بنے گا۔
