Tag: IMF

اسلام آباد: وزیر اعظم شہباز شریف نے کہا ہے کہ اسحاق ڈار نے نیندیں حرام کر کے آئی ایم ایف معاہدے کے لیے بھرپور کوشش کی ہے۔

تفصیلات کے مطابق آج منگل کو وزیر اعظم شہباز شریف کی زیر صدارت اتحادی رہنماؤں کا اجلاس منعقد ہوا، اجلاس میں سپریم کورٹ میں پنجاب میں انتخابات سے متعلق امور پر گفتگو کی گئی اور جماعت اسلامی کی مذاکرات کی کوششوں پر تبادلہ خیال کیا گیا۔

وزیر اعظم نے کہا خدا سے دعا ہے کہ آئی ایم ایف کا معاملہ حتمی نتیجے تک پہنچے، اسحاق ڈار نے نیندیں حرام کر کے اس کے لیے بھرپور کوشش کی ہے، آئی ایم ایف کی آخری شرط تھی کہ دوست ممالک سے پیسے جمع کریں، سپہ سالار نے اس سلسلے میں بے پناہ کاوشیں کیں جو بیان نہیں کر سکتا، 27 تاریخ کو چین کے وزیر اعظم سے ٹیلی فون پر گفتگو ہوگی، اتحادی حکومت میں سب اپنی جگہ محنت کر رہے ہیں۔

انھوں نے کہا ایک قانون نے ابھی حتمی شکل اختیار نہیں کی اور عدالت کے 3 ممبر کے بینچ نے حکم امتناع دے دیا، اس انوکھے فیصلے سے آئین اور عدل کو نقصان پہنچ سکتا ہے، جو ہو رہا ہے ایسا پہلے کبھی نہیں ہوا، بار کونسلز نے بھی کہا یہ فیصلہ غلط اور انصاف کے تقاضوں کے برعکس ہے۔

وزیر اعظم نے کہا حکومت کو ایک سال ہو گیا ہے، عمومی تاثر تھا کہ اتحاد زیادہ دیر نہیں چل سکتا، لیکن اتحادی حکومت نے چیلنجز کے ساتھ ایک سال مکمل کر لیا۔

شہباز شریف کا کہنا تھا کہ جب اختلاف رائے ہوتا ہے تو بیٹھ کر مسئلے کا حل نکالتے ہیں، کبھی بات مانتے ہیں کبھی منواتے ہیں، اتحادی جماعتوں نے مل کر اس کشتی کو فعال رکھا ہے، سوال ہی پیدا نہیں ہوتا کہ میں اکیلا اس حکومت کو چلا سکتا، سب اتحادیوں نے مشاورت میں ہمیشہ مؤثر کردار ادا کیا۔