ترکیہ کی کرد عسکریت پسند تنظیم کردستان ورکرز پارٹی (پی کے کے) نے اپنے اسیر رہنما عبداللہ اوجلان کی اپیل پر عمل کرتے ہوئے ترکیہ سے جنگ بندی کا اعلان کردیا۔
کالعدم تنظیم کے حامی کرد میڈیا میں جاری بیان میں کہا گیا ہےکہ وہ اپنے رہنما عبداللہ عسقلان کی پرامن اور جمہوری معاشرے کے قیام کی اپیل پر عمل کرتے ہوئے ترک ریاست کے ساتھ فوری جنگ بندی پر عمل کر رہے ہیں۔
بیان میں کہا گیا ہے کہ ہم جنگ بندی کی اپیل سے مکمل طور پر متفق ہیں اور اس پر عمل کریں گے، ہماری جانب سے اس وقت تک کوئی مسلح کارروائی نہیں ہوگی جب تک ہم پر حملہ نہیں ہوگا۔
کرد تنظیم کے اعلان کے ساتھ ترکیہ میں40 سالہ تنازع کے خاتمےکا آغاز ہوا ہے جس سے خطے میں سیاسی اور امن و امان کے حوالے سے دور رس نتائج مرتب ہوسکتے ہیں۔
عبد اللہ عسقلان 1999 سے ترکی کی امرالی جیل میں قید ہیں، پی کے کے کی جانب سے 1984میں شروع ہونے والی لڑائی میں اب تک 40 ہزار سے زائد افراد ہلاک ہو چکے ہیں۔
ابتدا میں پی کے کے کا مقصد کردوں کے لیے علیحدہ ریاست کا قیام تھا، تاہم بعد میں اس نے اپنے علیحدگی پسند نظریات کو ترک کر کے جنوب مشرقی ترکیہ میں زیادہ خودمختاری اور کردوں کے حقوق کے لیے جدوجہد پر توجہ مرکوز کی۔
