ARYNews.tv | Urdu – Har Lamha Bakhabar

Tag: Imran Khan firing

  • واقعہ قابل مذمت ہے، زخمیوں کی صحتیابی کیلئے دعاگو ہوں، شہباز شریف

    واقعہ قابل مذمت ہے، زخمیوں کی صحتیابی کیلئے دعاگو ہوں، شہباز شریف

    اسلام آباد : وزیراعظم شہباز شریف نے چیئرمین پی ٹی آئی عمران خان کو گولی لگنے کے واقعے کی شدید مذمت کرتے ہوئے غم و غصے کا اظہار کیا اور فوری طور پر واقعے کی رپورٹ طلب کرلی۔

    وزیراعظم نے سماجی رابطے کی ویب سائٹ ٹوئٹر پر اپنے جاری بیان میں کہا ہے کہ گوجرانولہ، اللہ والا چوک میں فائرنگ کے واقعے کی فوری رپورٹ طلب کرتے ہوئے واقعے کی مذمت کی ہے۔

    عمران خان پر فائرنگ کے واقعے کی شدید الفاظ میں مذمت کرتا ہوں، میں نے وزیرداخلہ سے واقعے کی فوری رپورٹ طلب کرلی ہے۔

    وزیر اعظم نے کہا کہ پی ٹی آئی چیئرمین اور دیگر زخمیوں کی صحتیابی کیلئے دعاگو ہوں، وفاقی حکومت پنجاب حکومت کو سیکیورٹی اور تفتیش کیلئے ہرممکن تعاون فراہم کرے گی، ان کا کہنا تھا کہ سیاست میں تشدد کی کوئی جگہ نہیں ہونی چاہیے۔

    علاوہ ازیں مسلم لیگ(ن) کے رہنما احسن اقبال نے چیئرمین تحریک انصاف عمران خان کے کنٹینر پر فائرنگ کی مذمت کی ہے۔

    سماجی رابطے کی ویب سائٹ ٹوئٹر پر اپنے پیغام میں احسن اقبال نے کہا کہ اللہ کا شکر ہے کہ عمران نیازی محفوظ ہیں، سیاست میں تشدد کی کوئی گنجائش نہیں۔

    انہوں نے کہا کہ میں عمران نیازی کے کنٹینر پہ وزیر آباد میں فائرنگ کے واقعے کی شدید مذمت کرتا ہوں اور حکومت پنجاب کو تجویز دی کہ انہیں سیکیورٹی انتظامات کا جائزہ لینا چاہیے۔

  • حملے کے بعد کیا لائحہ عمل ہوگا ؟ شاہ محمود قریشی نے بتادیا

    حملے کے بعد کیا لائحہ عمل ہوگا ؟ شاہ محمود قریشی نے بتادیا

    ملتان : پی ٹی آئی کے مرکزی رہنما شاہ محمود قریشی نے کہا ہے کہ ایسے بزدلانہ حملے ہمارے حوصلے پست نہیں کرسکتے، کارکنان پر امن رہیں۔

    حقیقی آزادی مارچ کے کنٹینر پر حملے کے واقعے کے بعد شاہ محمود قریشی نے میڈیا سے گفتگو کرتے ہوئے کہا کہ عمران خان ایک بہادر، نڈراور دیندار انسان ہیں۔

    انہوں نے کہا کہ عمران خان گھبرانے والے لیڈر نہیں، ہم چیئرمین پر حملے کی شدید مذمت اور واقعہ کے ذمہ داران کے خلاف فوری کارروائی کا مطالبہ کرتے ہیں۔

    پی ٹی آئی رہنما کا کہنا تھا کہ ایسے بزدلانہ حملے ہمارے حوصلے پست نہیں کرسکتے، عمران خان پر حملے کی خبرسن کر پوری قوم میں پریشانی کی لہردوڑ گئی ہے۔

    ایک سوال کے جواب میں ان کا کہنا تھا کہ پوری قوم کو اور بالخصوص پی ٹی آئی کارکنوں سے درخواست کروں گا کہ وہ جذبات پر قابو رکھیں اور پر امن رہیں۔

    شاہ محمودقریشی نے کہا کہ قانون کے دائرے میں رہیں، ہمیں برد باری اور تحمل کا مظاہرہ کرنا ہے، 6دن سے ہمارا لانگ مارچ پر امن چل رہا ہے، آئندہ کے لائحہ عمل پر عمران خان سے مشاورت کے بعد فیصلہ کریں گے۔

  • میرا ٹارگٹ صرف عمران خان تھا، مبینہ حملہ آور کا ویڈیو بیان

    میرا ٹارگٹ صرف عمران خان تھا، مبینہ حملہ آور کا ویڈیو بیان

    گجرانوالہ : حقیقی آزادی مارچ کے دوران عمران خان پر فائرنگ کرنے والے مبینہ حملہ آور نے ابتدائی تحقیقات میں اعتراف جرم کرلیا۔

    پولیس کو دیے گئے بیان میں اس کا کہنا ہے کہ میں نے عمران خان کو پوری طرح مارنے کی کوشش کی تھی،ان کو اچانک مارنے کا فیصلہ کیا۔

    مبینہ حملہ آور نے کہا کہ اپنی موٹرسائیکل پر آیا جو ماموں کی دکان پر کھڑی ہے، میرے پیچھے کوئی نہیں تنہا عمران خان کو مارنے کا فیصلہ کیا۔

    مبینہ ملزم کا مزید کہنا ہے کہ میرا ٹارگٹ صرف عمران خان تھا اور کسی کو نہیں مارنا چاہتا تھا۔

    پولیس کی جانب سے گرفتار مبینہ حملہ آور کے بیان کی ویڈیو جاری کی گئی ہے جس میں وہ کہہ رہا ہے کہ یہ اس لیے کیا عمران خان لوگوں کو گمراہ کر رہا تھا اور مجھ سے یہ چیز دیکھی نہیں گئی، اس لیے مارنے کی کوشش کی۔

    مبینہ ملزم نے کہا کہ میں نے سوچا کہ ادھر آذان ہو رہی ہے وہاں یہ لوگ ڈیک لگا کر شور شرابہ کر رہے تھے، یہ بات میرے ضمیر نے اچھی نہیں مانی۔ اس نے بتایا کہ میں نے اچانک فیصلہ کیا، صبح سے جس دن سے یہ لاہور سے چلا ہے، اس دن سے یہ سازش سوچی کہ میں نے اس کو مارنا ہے۔

    پولیس ذرائع کے مطابق عمران خان پر مبینہ حلمہ آور کا نام محمد نوید ولد محمد بشیر ہے، ملزم ذات کا آرائیں اور سودھراں کا رہائشی ہے مبینہ حملہ آور کو ایک نائن ایم ایم پستول اور دو خالی میگزین کے ساتھ گرفتار کیا گیا۔

    واضح رہے کہ فائرنگ کے بعد لانگ مارچ کے دوران بھگدڑ مچ گئی اور کینٹینر پر موجود رہنما بھی گھبرا گئے، فائرنگ کے وقت قافلہ ظفرعلی خان چوک کے قریب پہنچا تھا۔

  • عمران خان خیریت سے ہیں، تحریک نہیں رکے گی، فیصل جاوید

    عمران خان خیریت سے ہیں، تحریک نہیں رکے گی، فیصل جاوید

    وزیرآباد : پی ٹی آئی کے سینیٹر فیصل جاوید نے کہا ہے کہ عمران خان خیریت سے ہیں، تحریک نہیں رکے گی، حملے کی انکوائری ہونی چاہیے۔

    حقیقی آزادی مارچ کے دوران وزیر آباد میں چیئرمین پی ٹی آئی عمران خان کو بھرے مجمع میں کھڑے ایک شخص نے گولی ماری جو ان کی ٹانگ پر لگی۔

    فائرنگ سے سینیٹر فیصل جاوید، پی ٹی آئی کے رہنما احمد چٹھہ اور پی ٹی آئی عہدیدار راشد بھی زخمی ہوئے ، جنہیں اسپتال منتقل کیا جا رہا ہے۔

    اسپتال جاتے ہوئے رہنماؤں نے واقعے کی سخت مذمت کی، سینیٹر فیصل جاوید نے کہا کہ اس حملے کی انکوائری ہونی چاہیے، ہمارے حوصلے بلند ہیں، عمران خان خیریت سے ہیں انہوں نے اس عزم کا اعادہ کیا کہ یہ آزادی کی تحریک نہیں رکے گی۔

    اس کے علاوہ صوبائی وزیر صحت ڈاکٹر اختر ملک زخمیوں کی عیادت کے لئے لاہور سے روانہ ہوگئے، ڈاکٹر اختر ملک نے عمران خان کے کنٹینر پر فائرنگ کے واقعہ کی سختے الفاظ میں مذمت کی۔

    May be an image of 2 people

    کنٹینر پر فائرنگ کے نتیجے میں زخمی افراد ٹی ایچ کیو اسپتال میں زیر علاج ہیں، ڈاکٹر اختر ملک ٹی ایچ کیو اسپتال وزیر آباد میں زخمیوں کی عیادت کرینگے، فائرنگ کی مکمل تحقیقات کر کے اصل مجرموں کو پکڑا جائے گا۔