Tag: Imran Khan

پشاور: ترجمان خیبر پختونخوا حکومت بیرسٹر سیف نے حکومت کے بجلی پیکج پر ردعمل دیتے ہوئے کہا ہے کہ قوم کو 15 روپے فی یونٹ بجلی دینے والا آج پابند سلال ہے۔

بیرسٹر سیف نے اپنے ایک بیان میں کہا کہ 40 روپے فی یونٹ بجلی دینے والےعیش و عشرت کر رہے ہیں، بانی پی ٹی آئی عمران خان کا دوسرا جرم 150 روپے لیٹر پیٹرول تھا جسے 300 پر پہنچایا گیا۔

انہوں نے کہا کہ عالمی منڈی میں خام تیل کی قیمت میں مزید 7 فیصد کمی آئی ہے لیکن اس کا فائدہ عوام تک نہیں پہنچ رہا، عالمی منڈی کے حساب سے پاکستان میں پیٹرول کی لیٹر قیمت 100 سے بھی کم ہونی چاہیے۔

یہ بھی پڑھیں: ’بجلی کی قیمتوں میں کمی جماعت اسلامی کی تحریک کی بڑی کامیابی ہے‘

گزشتہ روز وزیر اعظم شہباز شریف نے گھریلو صارفین کیلیے بجلی کی قیمت میں 7 روپے 41 پیسے فی یونٹ روپے کمی کا اعلان کرتے ہوئے کہا کہ تمام صارفین کو 34 روپے 37 پیسے فی یونٹ بجلی فراہم کی جائے گی۔

شہاباز شریف نے کہا کہ جون 2024 میں گھریلو صارفین کیلیے بجلی کی قیمت 48 روپے 70 پیسے تھی جبکہ آج گھریلو صارفین کیلئے بجلی کی قیمت فی یونٹ 45 روپے5 پیسے پر ہے۔

انہوں نے صنعتوں کیلیے بھی بجلی کے نرخ میں مزید 7 روپے 59 پیسے فی یونٹ روپے کمی کا اعلان کیا۔ وزیر اعظم کا کہنا تھا کہ سال میں 600 ارب روپے کی بجلی چوری ہو رہی ہے جس کا خاتمہ ہمارا اگلا ہدف ہے۔

ڈی آئی خان: گورنر خیبر پختونخوا فیصل کریم کنڈی کا کہنا ہے کہ بانی پاکستان تحریک انصاف (پی ٹی آئی) عمران خان اور ان کی جماعت کی کوشش ہے کہ کسی طریقے سے این آر او مل جائے، نیشنل سکیورٹی کے ایشو میں نہ شرکت کر کے این ار او مانگنے کی کوشش کی گئی۔

میڈیا سے غیر رسمی گفتگو کرتے ہوئے فیصل کریم کنڈی نے کہا کہ پی ٹی آئی والے خواب دیکھتے ہیں کہ عمران خان کو عید نماز نہیں پڑھنے دی گئی، پی ٹی آئی کے 5 گروپ ہیں اور ہر گروپ کی روزانہ ملاقات نہیں ہو سکتی، جیل کا جو طریقہ کار اور پروسیجر ہے اس کے تحت ہی ہو سکتی ہے۔

یہ بھی پڑھیں: سزا یافتہ شخص کے نام پر کیسے اسٹیڈیم کا نام رکھا جاسکتا ہے: فیصل کریم کنڈی

فیصل کریم کنڈی نے کہا کہ امریکا میں عمران خان نے کہا تھا کہ فرج بھی نکال دو، ہر چیز نکال دو اور اب مرغے مانگتے ہیں، 26ویں ترمیم کا ڈرافٹ پی ٹی آئی نے بنایا اور آخر میں مولانا فضل الرحمان کو دھوکہ دے کر چلے گئے، اب یہ دوبارہ مولانا فضل الرحمان کو چکمہ دینے کی کوشش کر رہے ہیں۔

انہوں نے کہا کہ آرمی چیف جنرل عاصم منیر کا ڈی آئی خان کا دورہ اچھا اقدام ہے، خیبر پختونخوا اور بالخصوص جنوبی اضلاع میں انٹیلیجنس بیس آپریشن ہو رہے ہیں جس میں پاک فوج اور پولیس کے جوان شہید ہو رہے ہیں۔

ان کا کہنا تھا کہ لوگوں کا برا حال ہے عام شہری جس طریقے سے زندگی گزار رہے ہیں سب کے سامنے ہے، صوبائی حکومت امن و امان قائم کرنے میں ناکام ہو چکی ہے، ہمارا فوج پر اور ریاست پر مکمل اعتماد ہے، فوج اور ریاست امن و امان کو قائم کرنے میں کوئی کمی نہیں چھوڑیں گے۔

دریائے سندھ سے کینال نکالنے کے معاملے میں فیصل کریم کنڈی نے کہا کہ سندھ اور پنجاب کینال کا معاملہ خوش اسلوبی سے حل کرنا چاہیے، چیف ایگزیکٹو فیڈریشن کی ذمہ داری بنتی ہے کہ اس مسئلے کو حل کریں، سی سی آئی پر مسئلے ڈسکس ہوتے ہیں اور خوش اسلوبی سے حل کیا جاتا ہے۔

ان کا کہنا تھا کہ مسلم لیگ (ن) میڈیا کے ذریعے مسئلے حل کرے گی تو پھر حل نہیں ہوں گے، سندھ کو نہری نظام سے مسئلہ ہے کہ ان کے مسائل میں اضافہ ہوگا، سندھ حکومت ہو یا وزیر اعلیٰ عوام کو مسئلہ ہوگا تو وہ کھڑے ہوں گے۔

گورنر کے پی نے اپنی گفتگو میں یہ بھی کہا کہ کل بھی اگر کوئی جمہوری طریقے سے حکومت بنائے گا تو پیپلز پارٹی کی ضرورت ہوگی، یہ ایکسٹرا کنال پر رو رہے ہیں 1991 کے بعد خیبر پختونخوا کا جو حصہ ہے وہ بھی نہیں دیا گیا، ان شاء اللہ جون میں چشمہ لفٹ کنال کا باقاعدہ افتتاح ہو جائے گا۔

پشاور: وزیر اعلیٰ خیبر پختونخوا علی امین گنڈاپور کا کہنا ہے کہ بانی پاکستان تحریک انصاف (پی ٹی آئی) عمران خان ڈیل کر کے نہیں عدالت سے سرخرو ہو کر نکلیں گے۔

علی امین گنڈاپور نے اپنے ایک بیان میں کہا کہ عمران خان اور بشریٰ بی بی بغیر جرم کے قید ہیں، وہ آئین، قانون اور عدالتوں پر یقین رکھتے ہیں، ان کی باعزت رہائی کے بغیر ملک میں سیاسی استحکام نہیں آ سکتا، پی ٹی آئی کے ناحق قید کارکنوں کی رہائی کا عمل جاری ہے۔

انہوں نے کہا کہ انصاف لائرز فورم ٹیم روزانہ کی بنیاد پر عدالتوں سے ضمانتیں حاصل کر رہی ہیں، لیگل ٹیم نے اب تک 2 ہزار سے زائد ناحق قید کارکنوں کی ضمانتیں کروائیں، ہم نے بلا تفریق تمام کارکنوں کو یکساں لیگل سہولت فراہم کیں۔

یہ بھی پڑھیں: دہشتگردوں کے پیٹرن ان چیف بانی پی ٹی آئی ہیں، طلال چوہدری

وزیر اعلیٰ نے مزید کہا کہ رہا ہونے والے کارکنان کا تعلق خیبر پختونخوا، پنجاب، کراچی، بلوچستان اور کشمیر سے ہے، رمضان کے دوران 700 سے زائد کارکنوں کو رہا کروایا گیا، آج بھی 174 کارکنوں کی رہائی کی روبکار اٹک اور جہلم جیل بھیجے جا رہے ہیں۔

ان کا کہنا تھا کہ22 کروڑ مالیت سے زائد کی رقم کارکنوں کی رہائی کے مچلکوں میں جمع کروائی گئی، عید سے قبل مزید کارکنوں کو عدالتوں سے رہائی دلوانے کی کوشش کی جائے گی، جیلوں میں ناحق قید کارکنوں کو مالی امداد اور ضرورت کی اشیا فراہم کی گئیں۔

راولپنڈی: اڈیالہ جیل کے گیٹ نمبر 5 پر سیکریٹری جنرل پاکستان تحریک انصاف (پی ٹی آئی) سلمان اکرم راجہ اپنی مرتب کردہ ملاقاتی فہرست پر ڈٹ گئے۔

سلمان اکرم راجہ نے اڈیالہ جیل کے عملے سے مکالمہ کرتے ہوئے کہا کہ بابر اعوان کا نام لسٹ سے نکالیں وہ نام ہم نے نہیں دیا، آپ بابر اعوان کو بھیجیں گے تو میں اسی جگہ احتجاج کروں گا۔

انہوں نے کہا کہ آپ بابر اعوان کو روکیں گے تو ہم ملاقات کیلیے جائیں گے، حامد خان اور اعظم سواتی کا نام ملاقات کرنے والوں کی فہرست میں شامل کریں۔

جیل عملے نے سلمان اکرم راجہ کو جواب دیا کہ ہم بابر اعوان کو روکتے ہیں آپ جا کر ملاقات کر لیں۔ پی ٹی آئی 4 رہنماؤں کے پیچھے بابر اعوان بھی پیدل اڈیالہ جیل کے اندر روانہ ہو گئے۔

صحافی نے سلمان اکرام راجہ سے سوال کیا کہ آپ نے بابر اعوان کا نام نہیں دیا پھر انہیں کیسے ملاقات کی اجازت مل گئی؟ اس پر انہوں نے جواب دیا کہ جی ہم نے ان کا نام نہیں دیا، ہم احتجاج کریں گے ڈسپلن قائم کروائیں گے۔

اس سے قبل سلمان اکرم راجہ نے جیل عملے سے مکالمے میں کہا کہ آپ ڈسپلن قائم کریں بابر اعوان کا نام شامل نہیں، آپ بابر اعوان کو اندر کیوں لائے ان کی گاڑی بھی جیل گیٹ سے اندر منگوا لی گئی۔

انہوں نے کہا کہ ہم نے جو نام دیے ان کو ہی ملاقات کیلیے بھیجا جائے، بشریٰ بی بی کی جانب سے سلمان صفدر اور عثمان گل کے نام شامل کر لیں، تمام معاملہ کل ہائیکورٹ میں طے ہو چکا ہے۔

سیکریٹری جنرل نے مزید کہا کہ اعظم سواتی، حامد خان اور عزیز بھنڈاری کے نام بھی شامل کریں۔ اس پر جیل عملے نے بتایا کہ ہم نے تمام رہنماؤں کے نام بھجوائے جن کو ملاقات کی اجازت ملی آپ کو آگاہ کر دیا۔

یاد رہے کہ اسلام آباد ہائیکورٹ نے اڈیالہ جیل میں عمران خان اور ان کی اہلیہ بشریٰ بی بی سے اہل خانہ اور پارٹی رہنماؤں کی ملاقات کیلیے منگل اور جمعرات کا دن مقرر کیا ہے۔

اسلام آباد: وزیر مملکت برائے داخلہ طلال چوہدری نے بانی چیئرمین پاکستان تحریک انصاف (پی ٹی آئی) عمران خان کو دہشتگردوں کا پیٹرن ان چیف قرار دے دیا۔

پریس کانفرنس کرتے ہوئے طلال چوہدری نے کہا کہ ملک میں دہشتگردی ایک بار پھر زور پکڑ رہی ہے، پی ٹی آئی کے دور میں دہشتگردوں کو لا کر بسایا گیا، قومی سلامتی کمیٹی کے اجلاس میں بعض سیاسی جماعتوں نے شرکت نہیں کی، نئے آپریشن کا شوشا چھوڑنا صرف کنفیوژن پھیلانے کیلیے ہے۔

وزیر مملکت برائے داخلہ نے کہا کہ نیشنل ایکشن پلان پر من و عن عملدرآمد کروایا جائے گا، قومی سلامتی کمیٹی کے اجلاس میں کسی نئے آپریشن کی بات نہیں ہوئی، دہشتگردوں کو لا کر نہ بسایا جاتا تو آج یہ حالات نہ ہوتے، پی ٹی آئی والے دہشتگردوں کے آگے نہیں کھڑے ہو سکتے تو دوست بن کر بھی کھڑے نہ ہوں، سیاسی پوائنٹس اسکورنگ کیلیے نئے آپریشن کا شوشا چھوڑا گیا۔

انہوں نے کہا کہ انٹیلیجنس ایجنسیوں کا کام معلومات کی فراہمی ہے، وزیر اعلیٰ خیبر پختونخوا علی امین گنڈاپور کو چاہیے کہ وہ دہشتگردوں کے ساتھ نہ کھڑے ہوں، کے پی حکومت بتائے دہشتگردی کے خلاف کیا اقدامات کیے؟ صوبائی حکومت کو دہشتگردی کے خلاف وسائل فراہم کیے گئے لیکن اس نے کوئی اقدامات نہیں کیے۔

طلال چویدری نے مزید کہا کہ عمران خان نے ایک ہفتے بعد جعفر ایکسپریس حملے کی مذمت کی اور کہا کہ اداروں کی ناکامی تھی، سکیورٹی فورسز کے افسران اور جوان ملک کیلیے قربانیاں دے رہے ہیں، دہشتگردی کے زیادہ تر واقعات خیبر پختونخوا اور بلوچستان میں ہوئے۔

انہوں نے کہا کہ دہشتگردوں کا پیٹرن ان چیف عمران خان ہے، ہمارا مقابلہ ان لوگوں کیساتھ ہیں جن سے نہ مسجد اور نہ رمضان محفوظ ہے، قومی سلامتی کمیٹی کا اعلامیہ واضح ہے نیشنل ایکشن پلان اور عزم استحکام دونوں بھرپور طریقے سے چلیں گے، روزانہ کی بنیاد پر 180 انٹیلیجنس بیسڈ آپریشنز ہوتے ہیں، یہ جنگ جیتنے کیلیے لڑی جا رہی ہے، دہشتگرد پسپا ہوں گے اور چیزیں بہتر ہوں گی۔

راولپنڈی: بانی چیئرمین پاکستان تحریک انصاف (پی ٹی آئی) عمران خان سے ملنے کیلیے اڈیالہ جیل آنے والے سیاسی رہنماؤں کو ملاقات کی اجازت نہ مل سکی۔

علامہ راجہ ناصر عباس، صاحبزادہ حامد رضا، خالد یوسف و دیگر عمران خان سے ملاقات کیلیے اڈیالہ جیل پہنچنے تاہم انہیں اجازت نہ ملی جس کے باعث وہ واپس روانہ ہوگئے۔

میڈیا سے گفتگو کرتے ہوئے علامہ راجہ ناصر عباس نے کہا کہ دنیا جانتی ہے معاشرے رول آف لا کے بغیر نہیں چلتے، جہاں عوام کو بنیادی حقوق نہ ملیں وہ معاشرہ بھی آگے نہیں چلتا، آج بھی ہمیں ملاقات کی اجازت نہیں دی گئی۔

یہ بھی پڑھیں: بانی پی ٹی آئی آدھی رات کو بھی بلائیں گے تو جاؤں گا، فیصل واوڈا

علامہ راجہ ناصر عباس نے کہا کہ کئی کئی گھنٹے انتظار کروا کر پھر واپس بھیج دیا جاتا ہے، عمران خان سے ملاقات ہمارا قانونی حق ہے۔

انہوں نے کہا کہ عوام کا حکومت پر کوئی اعتماد نہیں، حکومت غلط بیانی سے کام لے رہی ہے، اپوزیشن کا مل بیٹھنا اچھی بات ہے، اپوزیشن کا اتفاق ہے آئین کی حکمرانی کیلیے اکٹھے ہونا پڑے گا، ان شاء اللہ عید کے بعد اپوزیشن کا اتحاد پوری طرح سامنے آئے گا۔

آج عمران خان کی ملاقاتوں سے متعلق کیسز میں پیشرفت سامنے آئی جس میں اسلام آباد ہائیکورٹ کے حکم کے بعد ڈپٹی رجسٹرار کے خلاف توہین عدالت کیس کی کاز لسٹ جاری کی گئی۔

عدالت نے ڈپٹی رجسٹرار اور ایڈووکیٹ جنرل سے تحریری جواب طلب کر رکھا ہے، عدالت نے ریمارکس دیے تھے کہ کیس آج بھی کاز لسٹ میں نہ ہوا تو بھی سماعت ہوگی۔

مشال یوسفزئی کی عمران خان ملاقات سے متعلق توہین عدالت کیس سنگل بینچ میں مقرر نہیں ہوا۔

لاہور: پنجاب کی سینئر وزیر مریم اورنگزیب نے پاکستان تحریک انصاف (پی ٹی آئی) پر تنقید کرتے ہوئے کہا ہے کہ یہ ملک کیلیے نہیں جی ایچ کیو پر حملے کیلیے اکٹھے ہو جاتے ہیں۔

نیوز کانفرنس کرتے ہوئے مریم اورنگزیب نے کہا کہ کل نیشنل سکیورٹی پر پارلیمانی کمیٹی کی میٹنگ ہوئی جس میں تمام سیاسی جماعتیں مخالفت بھلا کر پارلیمنٹ میں موجود تھیں، کل تمام عسکری قیادت اور سکیورٹی اداروں کے حکام موجود تھے اور پارلیمنٹ سے دہشتگردی اور دہشتگردوں کیخلاف ایک اعلامیہ آیا، اس اعلامیہ پر صرف ایک جماعت کے دستخط نہیں اور یہ کوئی نئی بات نہیں۔

یہ بھی پڑھیں: ثابت ہوگیا ملکی سلامتی اور امن پی ٹی آئی کیلیے اہمیت نہیں رکھتے، خواجہ آصف

مریم اورنگزیب نے کہا کہ کل پی ٹی آئی نے کمیٹی اجلاس میں شرکت نہ کر کے سپورٹ کرنے والوں کی ترجمانی سے گریز کیا، بانی پی ٹی آئی عمران خان اور ان کی پارٹی کا واضح پیغام ہے کہ ہم دہشتگردی کے خلاف قوم کے ساتھ نہیں ہیں۔

سینئر صوبائی وزیر نے کہا کہ عمران خان سے سوال بنتا ہے کہ جب سب کو متحد ہونے کی ضرورت ہے تو یہ انکار کیوں کرتے ہیں؟ قوم کی نظریں تھیں ایک بیانیہ آئے گا لیکن یہ جماعت ایک قیدی کی طرف دیکھ رہی تھی، عمران خان نے 190 ملین پاؤنڈ کی چوری کی ہے، نیشنل سکیورٹی کی میٹنگ کیلیے چور کا ذکر کہاں سے آگیا؟

انہوں نے کہا کہ پی ٹی آئی نے ملک کیلیے اکٹھے نہیں ہونا لیکن جی ایچ کیو پر حملے کیلیے اکٹھے ہو جاتے ہیں، پی ٹی آئی نے قومی سلامتی کے کسی اجلاس میں شرکت نہیں کی، یہ ان کا نعرہ ہے کہ ’خان نہیں تو پاکستان نہیں‘، پی ٹی آئی نے سوشل میڈیا پر فوج کے خلاف ہرزہ سرائی کی۔

ان کا مزید کہنا تھا کہ پہلے بھی خیبر پختونخوا کو دہشتگردی سے نمٹنے کیلیے 800 ملین دیے گئے لیکن وہاں سی ٹی ڈی آج تک کرائے کی عمارت پر قائم ہے، کہتے ہیں وفاق کی وجہ سے صوبے میں دہشتگردی پھیل رہی ہے، جب یہ وزیر اعظم تھا تب بھی یہ کسی کے ساتھ ملکی معاملات پر نہیں بیٹھا تھا۔

مریم اورنگزیب نے مطالبہ کیا کہ وزیر اعلیٰ علی امین گنڈاپور سے حکومت نہیں چلتی تو استعفیٰ دیں۔

انہوں نے کہا کہ سوشل میڈیا کے عالمی اکاؤنٹس سے مذمتی بیان کیوں نہیں آیا؟ انھیں صرف نفرت پھیلانا اور آگ لگانے کا کام آتا ہے، جب دہشتگردی ہوتی ہے تو یہ لوگ فوج کے خلاف بیانیہ بنانا شروع کر دیتے ہیں۔